សហរដ្ឋអាមេរិក បាននិយាយកាលពីថ្ងៃព្រហស្បតិ៍ម្សិលមិញថា យោធាអ៊ីរ៉ង់កំពុងបង្វឹកកងកម្លាំងរុស្ស៊ីអំពីរបៀបប្រើប្រាស់យន្តហោះគ្មានមនុស្សបើក ដែលផលិតដោយអ៊ីរ៉ង់ នៅក្នុងតំបន់គ្រីមេ ដើម្បីវាយប្រហារគោលដៅនានាក្នុងប្រទេសអ៊ុយក្រែន។ នេះបើយោងតាមការចេញផ្សាយរបស់ទីភ្នាក់ងារសារព័ត៌មាន Reuters នៅថ្ងៃទី២១ ខែតុលា ឆ្នាំ២០២២នេះ។
អ្នកនាំពាក្យក្រសួងការបរទេសអាមេរិក លោក ណេត ប្រាយស៍ (Ned Price) បានប្រាប់អ្នករាយការណ៍ព័ត៌មានថា៖ «យើងអាចបញ្ជាក់ថា យោធារុស្ស៊ីដែលមានមូលដ្ឋាននៅគ្រីមេ បាននិងកំពុងសាកល្បងប្រើប្រាស់យន្តហោះគ្មានមនុស្សបើក ប្រភេទ UAVs ដែលផលិតនៅអ៊ីរ៉ង់ និងដើម្បីធ្វើការវាយប្រហារគោលដៅមួយចំនួននៅអ៊ុយក្រែន រួមទាំងការវាយប្រហារនៅទីក្រុងកៀវ [Kyiv] ក្នុងរយៈពេលប៉ុន្មានថ្ងៃថ្មីៗនេះ»។
លោកបន្ថែមថា៖ «យើងសន្និដ្ឋានថា យោធាអ៊ីរ៉ង់ដែលនៅតំបន់គ្រីមេ បានជួយកងទ័ពរុស្ស៊ីក្នុងប្រតិបត្តិការទាំងនេះ […] យើងមានព័ត៌មានគួរឱ្យទុកចិត្ត»។
ទោះយ៉ាងណា លោកមិនបានផ្តល់ភស្តុតាងឡើយ។
មិនមានប្រតិកម្មជាសាធារណៈភ្លាមៗពីទីក្រុងតេអេរ៉ង់ ចំពោះការចោទប្រកាន់របស់សហរដ្ឋអាមេរិកនោះទេ ប៉ុន្តែអ៊ីរ៉ង់បានបដិសេធថា យន្តហោះគ្មានមនុស្សបើកដែលត្រូវបានប្រើដោយរុស្ស៊ី មិនមែនជារបស់អ៊ីរ៉ង់ទេ រីឯរុស្ស៊ីក៏បានបដិសេធថាមិនបានប្រើដែរ។
ក្រសួងការពារជាតិ និងក្រសួងការបរទេសរុស្ស៊ី មិនបានឆ្លើយតបចំពោះសំណើសុំការអត្ថាធិប្បាយឡើយ។
អ្នកនាំពាក្យសន្តិសុខជាតិសេតវិមាន លោក ចន ឃឺប៊ី (John Kirby) បានប្រាប់អ្នករាយការណ៍ព័ត៌មានថា ក្រុងវ៉ាស៊ីនតោន នឹងប្រើគ្រប់មធ្យោបាយ ដើម្បីទប់ស្កាត់ និងប្រឈមមុខចំពោះការផ្គត់ផ្គង់អាវុធរបស់អ៊ីរ៉ង់ដល់រុស្ស៊ី រួមទាំងការដាក់ទណ្ឌកម្មបន្ថែមទៀត ខណៈកំពុងពិចារណាលើការការពារដែនអាកាសសម្រាប់អ៊ុយក្រែនផងដែរ។
លោកបន្តថា សមាជិកសហភាពអឺរ៉ុបបានយល់ព្រមលើវិធានការថ្មីប្រឆាំងនឹងអ៊ីរ៉ង់ ខណៈចក្រភពអង់គ្លេសបានដាក់ទណ្ឌកម្មលើឥស្សរជនយោធាជាន់ខ្ពស់ និងក្រុមហ៊ុនដែលខ្លួនបាននិយាយថា ពាក់ព័ន្ធនឹងការផ្គត់ផ្គង់យន្តហោះគ្មានមនុស្សបើករបស់អ៊ីរ៉ង់ដល់ទីក្រុងម៉ូស្គូ។
លោកបន្ថែមថា៖ «អ៊ីរ៉ង់ និងរុស្ស៊ី អាចកុហកពិភពលោក ប៉ុន្តែមិនអាចលាក់បាំងការពិតបានទេ ហើយការពិតនោះ គឺឥលូវនេះ ទីក្រុងតេអេរ៉ង់បានចូលរួមដោយផ្ទាល់ [សង្រ្គាមនៅអ៊ុយក្រែន]»។
រដ្ឋមន្ត្រីការបរទេសអ៊ុយក្រែន លោក ឌីមីត្រូ គូឡាបា (Dmytro Kuleba) បាននិយាយនៅលើបណ្តាញសង្គម Twitter ថាលោកបានពិភាក្សាលម្អិតជាមួយនាយករដ្ឋមន្ត្រីអ៊ីស្រាអែល លោក យ៉ាអៀរ ឡាភីដ (Yair Lapid) លើសំណើសុំប្រព័ន្ធ និងបច្ចេកវិទ្យាការពារដែនអាកាស និង
មីស៊ីល។ ការិយាល័យរបស់លោក Lapid បាននិយាយថា មេដឹកនាំអ៊ីស្រាអែលបានសម្តែង «ការព្រួយបារម្ភយ៉ាងខ្លាំង» អំពីទំនាក់ទំនងយោធារវាងអ៊ីរ៉ង់ និងរុស្ស៊ី។
ក្នុងរយៈពេលប៉ុន្មានថ្ងៃមកនេះ រុស្ស៊ីបានប្រើប្រាស់យន្តហោះគ្មានមនុស្សបើក ដើម្បីវាយប្រហារតំបន់មួយចំនួនរបស់អ៊ុយក្រែន ជាពិសេសសំដៅលើរោងចក្រថាមពល ដែលធ្វើឱ្យអ៊ុយក្រែនត្រូវបង្ខំចិត្តរឹតត្បិតការប្រាស់អគ្គិសនីនៅក្នុងប្រទេស។ ចំពោះការប្រើប្រាស់ Drone ក្នុងការវាយប្រហារនេះ ត្រូវបានអាមេរិកចោទប្រកាន់ថា អ៊ីរ៉ង់ជាអ្នកផ្គត់ផ្គង់ឱ្យរុស្ស៊ី៕