គណៈកម្មាធិការជាតិរៀបចំការបោះឆ្នោត(គ.ជ.ប) អះអាងថា រយៈពេល២ថ្ងៃ នៃដំណើរការពិនិត្យបញ្ជីឈ្មោះ និងចុះឈ្មោះបោះឆ្នោតឆ្នាំ២០២២ គឺមានពលរដ្ឋដែលបានមកចុះឈ្មោះបោះឆ្នោតថ្មីចំនួនជាង៣ម៉ឺននាក់។
ក្នុងសេចក្តីប្រកាសព័ត៌មានរបស់ គ.ជ.ប នៅថ្ងៃទី២២ ខែតុលា ឆ្នាំ២០២២ បានបង្ហាញពីលទ្ធផលបណ្ដោះអាសន្នថ្ងៃទី២ នៃការពិនិត្យបញ្ជីឈ្មោះ និងការចុះឈ្មោះបោះឆ្នោត នៅទូទាំងប្រទេស សម្រាប់ថ្ងៃទី២១ ខែតុលា ឆ្នាំ២០២២ ឱ្យដឹងថា ពលរដ្ឋចុះឈ្មោះបោះឆ្នោតថ្មីមានចំនួន ១៥ ៧៣២នាក់។ អ្នកដែលនឹងត្រូវលុបឈ្មោះចេញពីបញ្ជីបោះឆ្នោត មានចំនួន ៤១៥នាក់ ហើយពលរដ្ឋដែលបានកែតម្រូវទិន្នន័យ មានចំនួន ៤៤នាក់ និងពលរដ្ឋដែលបានផ្ទេរទីលំនៅចូលក្នុងឃុំ-សង្កាត់ថ្មី មានចំនួន ៥ ០២៨នាក់។
ស្ថាប័នជាតិរៀបចំការបោះឆ្នោតដដែលបន្តថា បើសរុបលទ្ធផលដំណើរការចុះឈ្មោះ និងពិនិត្យបញ្ជីឈ្មោះបោះឆ្នោតបង្ហាញថា រយៈពេល២ថ្ងៃ ប្រជាពលរដ្ឋចុះឈ្មោះបោះឆ្នោតថ្មី មានចំនួន ៣២ ១៦៥នាក់។ ដោយឡែក ពលរដ្ឋដែលនឹងត្រូវលុបឈ្មោះចេញពីបញ្ជីបោះឆ្នោត មានចំនួនសរុប ៥ ៨៥៧នាក់។ រីឯ ក្នុងពេល២ថ្ងៃនេះ ពោលគឺថ្ងៃទី២០ និង២១ ខែតុលា ពលរដ្ឋដែលបានកែតម្រូវទិន្នន័យមានចំនួន ៩៩៤នាក់ និងអ្នកដែលបានផ្ទេរទីលំនៅចូលក្នុងឃុំ-សង្កាត់ថ្មី មានចំនួនសរុប ១០ ១៧០នាក់។
ការពិនិត្យបញ្ជីឈ្មោះ និងការចុះឈ្មោះបោះឆ្នោត ឆ្នាំ២០២២ ប្រព្រឹត្តទៅចាប់ពីថ្ងៃទី២០ ខែតុលា ដល់ថ្ងៃទី៨ ខែធ្នូ ឆ្នាំ២០២២ ដោយគិតរួមទាំងថ្ងៃសៅរ៍ និងថ្ងៃអាទិត្យ។
គ.ជ.ប អំពាវនាវដល់ពលរដ្ឋទាំងអស់ ឱ្យទៅពិនិត្យមើលឈ្មោះក្នុងបញ្ជីបោះឆ្នោតចុងក្រោយ និងស្នើសុំកែតម្រូវឈ្មោះ ឬទិន្នន័យ ប្រសិនបើកត់ត្រាមិនបានត្រឹមត្រូវ។ ជាមួយគ្នានេះ ប្រជាពលរដ្ឋដែលទើបគ្រប់អាយុ ១៨ឆ្នាំ គិតដល់ថ្ងៃបោះឆ្នោតជ្រើសតាំងតំណាងរាស្ត្រ ថ្ងៃទី២៣ ខែកក្កដា ឆ្នាំ២០២៣ គឺអ្នកដែលកើតមុន ឬត្រឹមថ្ងៃទី២៤ ខែកក្កដា ឆ្នាំ២០០៥ និងប្រជាពលរដ្ឋដែលមិនធ្លាប់ចុះឈ្មោះបោះឆ្នោតពីមុនមក អាចនាំទៅចុះឈ្មោះបោះឆ្នោតឱ្យបានគ្រប់ៗគ្នា។
តារាងស្ថិតិប្រជាពលរដ្ឋ និងចំនួនការិយាល័យបោះឆ្នោតប៉ាន់ស្មានសម្រាប់បម្រើឱ្យការពិនិត្យបញ្ជីឈ្មោះ និងចុះឈ្មោះបោះឆ្នោតឆ្នាំ២០២២ បានឱ្យដឹងថា ចំនួនឈ្មោះក្នុងបញ្ជីឈ្មោះបោះឆ្នោតឆ្នាំ២០២១ មានជាង ៩លាន២សែននាក់ (៩ ២០៥ ៦៨១នាក់) ខណៈការិយាល័យបោះឆ្នោតឆ្នាំ២០២២ នៅទូទាំងប្រទេសមានចំនួន ២៣ ៧៦០ការិយាល័យ។ គ.ជ.ប ធ្លាប់ឱ្យដឹងថា ចំនួនអ្នកចុះឈ្មោះថ្មីក្នុងឆ្នាំ២០២២ ត្រូវបានប៉ាន់ស្មានថា មានជាង ៤០ម៉ឺននាក់ (៤០៩ ០៥៦នាក់)៕
