ជន​បរទេស​ចំនួន​២៦៣​នាក់​ត្រូវបានបណ្តេញចេញពីកម្ពុជាពាក់ព័ន្ធបទល្មើស​ឆ្លងដែននិងស្នាក់នៅខុសច្បាប់

ជនបរទេសដែលត្រូវបានសមត្ថកិច្ចកម្ពុជា ឃាត់ខ្លួនពាក់ព័ន្ធបទល្មើសលួចឆ្លងដែនខុសច្បាប់ គ្មានលិខិតឆ្លងដែន និងលួចស្នាក់នៅធ្វើការងារខុសច្បាប់ ហើយត្រូវបានបណ្ដេញចេញពីកម្ពុជា ចន្លោះថ្ងៃទី២០ដល់ថ្ងៃទី២២ ខែតុលា ឆ្នាំ២០២២ តាមច្រកទ្វារព្រំដែនអន្តរជាតិប៉ោយប៉ែត។ (អគ្គនាយកដ្ឋានអន្តោប្រវេសន៍)

មន្ត្រីជំនាញនៃក្រសួងមហាផ្ទៃ បានបណ្ដេញជនបរទេស ២៦៣នាក់ ចេញពីកម្ពុជា ក្រោយចាប់ខ្លួនពួកគេដោយរកឃើញថា ពួកគេទាំងនោះបានឆ្លងដែន និងស្នាក់នៅក្នុងប្រទេសកម្ពុជាដោយខុសច្បាប់។

​សេចក្ដីប្រកាសព័ត៌មានរបស់អ្នកនាំពាក្យអគ្គនាយកដ្ឋានអន្តោប្រវេសន៍នៃក្រសួងមហាផ្ទៃ នៅថ្ងៃទី២២ ខែតុលា​ បានឱ្យដឹងថា ​ពីថ្ងៃទី២០ដល់ទី២២ ខែតុលា ​អគ្គនាយកដ្ឋានអន្តោប្រវេសន៍ បាន​បណ្ដេញជនបរទេសចំនួន ២៦៣នាក់ ស្រី២៦នាក់ មាន៤សញ្ជាតិចេញពីកម្ពុជា។ ប្រភពដដែលថា ក្នុងនោះ មានជនជាតិបង់ក្លាដេស ចំនួន២នាក់, ជនជាតិថៃ ចំនួន១៦នាក់ ជនជាតិវៀតណាមចំនួន ១៧១នាក់ និងជនជាតិចិនចំនួន ៧៤នាក់។

សេចក្តីប្រកាសព័ត៌មាននេះឱ្យដឹងថា ការបណ្តេញចេញនោះ  ​ដោយអនុលោមតាមច្បាប់ស្តីពីអន្តោប្រវេសន៍ ហើយជនបរទេសទាំងនោះ ត្រូវបានបណ្តេញចេញតាមប៉ុស្តិ៍នគរបាលច្រកទ្វារអាកាសយានដ្ឋានអន្តរជាតិភ្នំពេញ ​ប៉ុស្តិ៍នគរបាលច្រកទ្វារព្រំដែនអន្តរជាតិប៉ោយប៉ែត និងត្រពាំងផ្លុង ខេត្តត្បូងឃ្មុំ។

អ្នកនាំពាក្យអគ្គនាយកដ្ឋានអន្តោប្រវេសន៍នៃក្រសួងមហាផ្ទៃ អះអាងថា ជនបរទេសទាំង ២៦៣នាក់​ ត្រូវបានសមត្ថកិច្ច​ឃាត់ខ្លួនពាក់ព័ន្ធបទល្មើសលួចឆ្លងដែនខុសច្បាប់គ្មានលិខិតឆ្លងដែន លួចស្នាក់នៅធ្វើការងារខុសច្បាប់ ដែលល្មើសនឹងច្បាប់ស្តីពីអន្តោប្រវេសន៍ ហើយ​ត្រូវបណ្ដេញចេញតាមប្រកាសរបស់ក្រសួងមហាផ្ទៃ និងហាមឃាត់ការចូលប្រទេសកម្ពុជារយៈពេល ៣ឆ្នាំ។

អគ្គនាយកដ្ឋានអន្តោប្រវេសន៍ បានឱ្យដឹងថា ជនជាតិវៀតណាម និងចិនចំនួន២៣០នាក់ ត្រូវបានបណ្តេញចេញពីកម្ពុជា កាលពីម្សិលមិញ ពាក់ព័ន្ធបទល្មើសលួចស្នាក់នៅខុសច្បាប់គ្មានលិខិតឆ្លងដែន លើសទិដ្ឋាការកំណត់ និងប្រើប្រាស់ទិដ្ឋាការខុសគោលដៅ។

កាលពីខែកញ្ញា អគ្គនាយកដ្ឋានអន្តោប្រវេសន៍នៃក្រសួងមហាផ្ទៃ ​ បាន​បណ្ដេញជនបរទេសចំនួន២៣០នាក់ ​មានស្រី៥០នា​ក់ និងមានពីរសញ្ជាតិចេញពីកម្ពុជា។ លិខិតបន្តថា ក្នុងនោះជនជាតិវៀតណាមមាន ២២៨នាក់ និងជនជាតិចិនចំនួន២នាក់ ពាក់ព័ន្ធបទល្មើសដូចគ្នានេះដែរ ពោលគឺ ​បទល្មើសលួចស្នាក់នៅខុសច្បាប់គ្មានលិខិតឆ្លងដែន លើសទិដ្ឋាការកំណត់ និងប្រើប្រាស់ទិដ្ឋាការខុសគោលដៅ ដែលល្មើសនឹងច្បាប់ស្ដីពីអន្តោប្រវេសន៍។

ក្នុងសេចក្ដីប្រកាសព័ត៌មានរបស់គណៈកម្មាធិការជាតិប្រយុទ្ធប្រឆាំងអំពើជួញដូរមនុស្ស គ.ជ.ប.ជ ចេញផ្សាយនាថ្ងៃទី៧ ខែតុលា ឆ្នាំ២០២២ បានឱ្យដឹងថា ក្នុងរយៈពេល ៥១​ថ្ងៃដោយគិតចាប់ពីថ្ងៃ១៨ ខែសីហាដល់ថ្ងៃទី៤ ខែតុលា ឆ្នាំ២០២២ ក្រុមការងារបានសហការចុះត្រួតពិនិត្យ ទីតាំងចំនួន១០ ក្នុងខេត្តព្រះសីហនុ។

គ.ជ.ប.ជ ថា ក្នុងពេលចុះពិនិត្យ១០ទីតាំងនោះ រកឃើញមានជនបរទេសចំនួន ២ ៧៦០នាក់ ក្នុងនោះជនបរទេសដែលមានលិខិតឆ្លងដែនត្រឹមត្រូវ ១ ៩៤៦នាក់ ប៉ុន្តែ គ្មានបណ្ណការងារ ១ ៥១២នាក់។ សមត្ថកិច្ចជំនាញអះអាងថា ក្នុងចំណោមជនបទល្មើសទាំងនោះ ​មាន​ជនបរទេស ៦៨៥នាក់ សមត្ថកិច្ចកំពុងរៀបចំបែបបទបណ្ដេញពីកម្ពុជា ហើយចំនួន ៩២០នាក់ទៀត កំពុងស្នាក់នៅក្នុងទីស្នាក់ការដែលត្រៀម​រៀបចំបណ្ដេញពីកម្ពុជាផងដែរ៕

រក្សាសិទ្វិគ្រប់យ៉ាងដោយ ស៊ីស៊ីអាយអឹម

សូមបញ្ជាក់ថា គ្មានផ្នែកណាមួយនៃអត្ថបទ រូបភាព សំឡេង និងវីដេអូទាំងនេះ អាចត្រូវបានផលិតឡើងវិញក្នុងការបោះពុម្ពផ្សាយ ផ្សព្វផ្សាយ ការសរសេរឡើងវិញ ឬ ការចែកចាយឡើងវិញ ដោយគ្មានការអនុញ្ញាតជាលាយលក្ខណ៍អក្សរឡើយ។
ស៊ីស៊ីអាយអឹម មិនទទួលខុសត្រូវចំពោះការលួចចម្លងនិងចុះផ្សាយបន្តណាមួយ ដែលខុស នាំឲ្យយល់ខុស បន្លំ ក្លែងបន្លំ តាមគ្រប់ទម្រង់និងគ្រប់មធ្យោបាយ។ ជនប្រព្រឹត្តិ និងអ្នកផ្សំគំនិត ត្រូវទទួលខុសត្រូវចំពោះមុខច្បាប់កម្ពុជា និងច្បាប់នានាដែលពាក់ព័ន្ធ។

អត្ថបទទាក់ទង

សូមផ្ដល់មតិយោបល់លើអត្ថបទនេះ

VODEnglish.news

VODEnglish.news

Everybody Well-Informed, Everybody Empowered