ក្រុមប្រឆាំង និងប្រព័ន្ធផ្សព្វផ្សាយ បានឱ្យដឹងកាលពីថ្ងៃចន្ទថា ការវាយប្រហារតាមអាកាសបានសម្លាប់មនុស្សយ៉ាងហោចណាស់៥០នាក់ នៅកន្លែងប្រគុំតន្ត្រីមួយក្នុងប្រទេសមីយ៉ាន់ម៉ា ដែលរៀបចំឡើងដោយក្រុមជនជាតិភាគតិច ដែលមានជម្លោះជាមួយយោធាដែលកំពុងកាន់អំណាច។ អង្គការសហប្រជាជាតិ និងស្ថានទូតលោកខាងលិច បានថ្កោលទោសការវាយប្រហារនោះ។ នេះបើយោងតាមការចេញផ្សាយរបស់ទីភ្នាក់ងារសារព័ត៌មាន Reuters នៅថ្ងៃទី២៤ ខែតុលា ឆ្នាំ២០២២។
ប្រព័ន្ធផ្សព្វផ្សាយបានរាយការណ៍ថា ការវាយប្រហារដោយយន្តហោះកាលពីល្ងាចថ្ងៃអាទិត្យ [ទី២៣ ខែតុលា ឆ្នាំ២០២២] នៅរដ្ឋភាគខាងជើងនៃកាជីន (Kachin) បានសម្លាប់ជនស៊ីវិល អ្នកចម្រៀងក្នុងស្រុក និងមន្ត្រីនៃកងទ័ពឯករាជ្យកាជីន (KIA)។ បើតាមសម្តីរបស់សាក្សីបានឱ្យដឹងថា យន្តហោះចំនួន៣គ្រឿងបានបើកការវាយប្រហារ។
សារព័ត៌មាន BBC ភាសាភូមា (BBC Burmese) បាននិយាយថា ការវាយប្រហារនេះបានកើតឡើងនៅក្នុងតំបន់អាណាងប៉ា (A Nang Pa) នៃទីប្រជុំជនប៉ាកខាន់ (Hpakant) និងបានសម្លាប់មនុស្សយ៉ាងហោចណាស់៥០នាក់ ខណៈសារព័ត៌មាន Irrawaddy បានចេញផ្សាយថា ចំនួនអ្នកស្លាប់កើនដល់១០០នាក់។ ភ្លាមៗ Reuters មិនអាចផ្ទៀងផ្ទាត់តួលេខបានទេ។
អ្នកនាំពាក្យកងទ័ពឯករាជ្យកាជីន (KIA) ឈ្មោះ ណ ប៊ូ (Naw Bu) បាននិយាយថា ការវាយប្រហារនេះមានគោលដៅវាយប្រហារការប្រារព្ធខួបលើកទី៦២ នៃការបង្កើតបក្សនយោបាយរបស់កងទ័ព Kachin គឺអង្គការឯករាជ្យកាជីន (KIO)។
លោកបាននិយាយតាមទូរសព្ទថា៖ «នេះជាទង្វើដ៏អាក្រក់មួយ ដែលអាចចាត់ទុកជាឧក្រិដ្ឋកម្មសង្គ្រាមផងដែរ»។
អង្គការសហប្រជាជាតិប្រចាំនៅមីយ៉ាន់ម៉ា បានបង្ហាញក្ដីបារម្ភយ៉ាងខ្លាំង និងសោកស្ដាយចំពោះការវាយប្រហារនោះ។
អង្គការសហប្រជាជាតិ បានលើកឡើងនៅក្នុងសេចក្តីថ្លែងការណ៍មួយថា៖ «ការប្រើប្រាស់កម្លាំងវាយប្រហារលើជនស៊ីវិលដែលគ្មានអាវុធ គឺមិនអាចទទួលយកបានឡើយ»។
នៅក្នុងសេចក្តីថ្លែងការណ៍រួមមួយ ប្រមុខបេសកកម្មការទូតក្នុងប្រទេសមីយ៉ាន់ម៉ា រួមទាំងប្រទេសអូស្ត្រាលី អង់គ្លេស សហរដ្ឋអាមេរិក និងសមាជិកសហភាពអឺរ៉ុប បានលើកឡើងថា ការវាយប្រហារនេះ «គូសបញ្ជាក់ពីការទទួលខុសត្រូវរបស់របបយោធាចំពោះវិបត្តិ និងអស្ថិរភាព និងការមិនយកចិត្តទុកដាក់ចំពោះភារកិច្ចរបស់ខ្លួនក្នុងការការពារជនស៊ីវិល»។
រដ្ឋាភិបាលរួបរួមជាតិរបស់មីយ៉ាន់ម៉ា បានជំរុញឱ្យអង្គការសហប្រជាជាតិ និងសហគមន៍អន្តរជាតិ អន្តរាគមន៍ និងបញ្ឈប់ជាបន្ទាន់នូវអំពើឃោរឃៅនេះ។
យោធាបានរិះគន់អង្គការសហប្រជាជាតិម្តងហើយម្តងទៀត ចំពោះអ្វីដែលខ្លួនហៅថាជាការជ្រៀតជ្រែកកិច្ចការផ្ទៃក្នុងរបស់មីយ៉ាន់ម៉ា ហើយនិយាយថា ប្រតិបត្តិការរបស់ខ្លួន គឺសំដៅលើ «ភេរវករ»៕