អង្គការយូនីសេហ្វ រកឃើញថា កុមារកម្ពុជាប្រមាណ២,២លាននាក់កំពុងប្រឈមនឹងហានិភ័យផ្នែកសុខភាព ដោយសាររលកកម្ដៅខ្ពស់ជាញឹកញាប់នៃការបម្រែបម្រួលអាកាសធាតុ ដែលករណីនេះទាមទារឱ្យមានការចាត់វិធានការជាបន្ទាន់ ក្នុងការបង្កើនមូលនិធិសម្រាប់ធ្វើការបន្សាំ ដើម្បីការពារកុមារ និងសហគមន៍ដែលងាយរងគ្រោះ ពីរលកកម្ដៅកាន់តែអាក្រក់ឡើងៗ និងគ្រោះមហន្តរាយអាកាសធាតុផ្សេងៗទៀត។
សេចក្ដីប្រកាសព័ត៌មានរបស់មូលនិធិសហប្រជាជាតិដើម្បីកុមារ (យូនីសេហ្វ) នៅថ្ងៃទី២៥ ខែតុលា ឆ្នាំ២០២២ បានផ្សព្វផ្សាយនូវការសិក្សាថ្មីមួយរបស់ខ្លួនថា កុមារកម្ពុជាប្រមាណ២,២លាននាក់ ឬ ៣៧,១% នៃចំនួនកុមារសរុបក្នុងប្រទេស កំពុងប្រឈមនឹងរលកកម្តៅខ្ពស់ជាញឹកញាប់ ដោយសារបម្រែបម្រួលអាកាសធាតុ។
ស្ថាប័នអន្តរជាតិមួយនេះបន្ថែមថា រលកកម្តៅបង្កគ្រោះថ្នាក់ដល់កុមារជាពិសេស ដោយសារពួកគេមិនអាចសម្របសីតុណ្ហភាពរាងកាយបានដូចមនុស្សពេញវ័យ ហើយនៅពេលកុមារប្រឈមមុខនឹងរលកកម្តៅកាន់តែច្រើន ពួកគេកាន់តែប្រឈមនឹងបញ្ហាសុខភាពកាន់តែច្រើន ដែលរួមមានជំងឺរលាកផ្លូវដង្ហើមរ៉ាំរ៉ៃ ជំងឺហឺត និងជំងឺសរសៃឈាមបេះដូង។
សេចក្តីប្រកាសព័ត៌មានរបស់យូនីសេហ្វ បញ្ជាក់ថា៖ «ទារក និងកុមារតូចៗ ងាយនឹងបាត់បង់ជីវិតបណ្ដាលមកពីការកើនឡើងនៃកម្ដៅ។ រលកកម្ដៅក៏អាចប៉ះពាល់លើបរិស្ថាន សុវត្ថិភាព អាហារូបត្ថម្ភ ទឹកប្រើប្រាស់ ការអប់រំ និងជីវភាពរស់នៅនាពេលអនាគតរបស់កុមារផងដែរ»។
របាយការណ៍ដដែលរកឃើញថា កម្ពុជាជាប្រទេសមួយស្ថិតក្នុងចំណោមប្រទេសចំនួន២៣ ដែលត្រូវបានចាត់ថ្នាក់ថាជាប្រទេសដែលកុមារមានការប្រឈមខ្ពស់បំផុតទៅនឹងសីតុណ្ហភាពខ្ពស់ខ្លាំង។
ប្រភពដដែលបន្ថែមថា នៅកម្ពុជា បើទោះជាការកើនឡើងនៃកម្តៅផែនដីនៅលើពិភពលោកមានកម្រិតត្រឹម១,៧ដឺក្រេ ឬទាបជាងក៏ដោយ កុមារកម្ពុជាទាំងអស់នឹងទទួលរងនូវរលកកម្ដៅក្នុងមួយឆ្នាំ ខ្ពស់ជាងស្ថានភាពនាពេលបច្ចុប្បន្ន ចំនួន៤,៥ដង ដែលក្នុងនោះ កុមារ ៥៥,៧% នឹងជួបប្រទះនឹងសីតុណ្ហភាពខ្ពស់ខ្លាំង ដែលក្នុងនោះចំនួនថ្ងៃច្រើនជាង៨៣ថ្ងៃក្នុងមួយឆ្នាំ នឹងមានសីតុណ្ហភាពប្រចាំថ្ងៃក្ដៅលើសពី៣៥អង្សាសេ។
របាយការណ៍បញ្ជាក់ថា៖ «បើកម្ដៅផែនដីកើនឡើងដល់២,៤ដឺក្រេ នោះមិនមែនត្រឹមតែ ១០០% នៃកុមារកម្ពុជាដែលប្រឈមនឹងរលកកម្តៅលើសពី៤,៥ដងក្នុងមួយឆ្នាំប៉ុណ្ណោះទេ ប៉ុន្តែជាង ៨៧,២% នៃពួកគេពិតជាជួបប្រទះទៅនឹងស្ថានភាពសីតុណ្ហភាពខ្ពស់ខ្លាំងជាក់ជាមិនខាន។ ការណ៍នេះមានន័យថា ប្រទេសកម្ពុជានឹងក្លាយជាប្រទេសទី២១ ក្នុងពិភពលោក ដែលទទួលរងផលប៉ះពាល់ខ្លាំងពីបាតុភាពនេះ»។
ប្រធានស្ដីទីយូនីសេហ្វប្រចាំកម្ពុជា លោកវេជ្ជបណ្ឌិត អានៀរបាន ឆាតឺរជី មានប្រសាសន៍ថា កុមារកម្ពុជាកំពុងរងគ្រោះដោយសារបម្រែបម្រួលអាកាសធាតុ ខណៈនាពេលអនាគត កម្ពុជាអាចនឹងរងផលប៉ះពាល់ធ្ងន់ធ្ងរ។
លោកថា៖ «បម្រែបម្រួលអាកាសធាតុកំពុងបង្កគ្រោះថ្នាក់ដល់អាយុជីវិត និងសុខុមាលភាពកុមារកម្ពុជារួចទៅហើយ ប៉ុន្តែរបាយការណ៍នេះ បង្ហាញថា នៅពេលអនាគត ប្រទេសកម្ពុជានឹងក្លាយជាប្រទេសមួយក្នុងចំណោមប្រទេសដែលរងផលប៉ះពាល់ធ្ងន់ធ្ងរបំផុតក្នុងពិភពលោក»។
យូនីសេហ្វ បន្តទៀតថា ខ្លួនកំពុងធ្វើការជាមួយរដ្ឋាភិបាលកម្ពុជា ដើម្បីដោះស្រាយបញ្ហាប្រឈមនៃបម្រែបម្រួលអាកាសធាតុ និងការពារបរិស្ថាន តាមរយៈការវាយតម្លៃគ្រោះថ្នាក់ និងបង្កើតដំណោះស្រាយ ដើម្បីធានាថា កុមារអាចការពារខ្លួនពីផលប៉ះពាល់នៃបម្រែបម្រួលអាកាសធាតុ និងការសឹករេចរឹលនៃបរិស្ថាន។
លទ្ធផលនៃការស្រាវជ្រាវ បានគូសបញ្ជាក់ពីតម្រូវការបន្ទាន់ដែលកុមារត្រូវការដើម្បីសម្របខ្លួន ខណៈបើទោះកម្ពុជាបានប្តេជ្ញាចិត្តខ្ពស់ ប៉ុន្តែទាមទារឱ្យផ្តោតការយកចិត្តទុកដាក់បន្ថែមទៀត។ ក្នុងនោះ យូនីសេហ្វ អំពាវនាវដល់រដ្ឋាភិបាលនានា រួមទាំងកម្ពុជាផង ការពារកុមារពីមហន្តរាយអាកាសធាតុ តាមរយៈការកែសម្រួលសេវាសង្គម ដូចជា ទឹកស្អាតនិងអនាម័យ សុខភាព ការអប់រំ អាហារូបត្ថម្ភ កិច្ចគាំពារសង្គម និងការការពារកុមារនិងយុវជន។
រដ្ឋលេខាធិការ និងជាអ្នកនាំពាក្យក្រសួងសង្គមកិច្ច អតីតយុទ្ធជន និងយុវនីតិសម្បទា លោក តូច ចាន់នី មានប្រសាសន៍នៅថ្ងៃពុធនេះថា លោកមិនទាន់បានឃើញសេចក្តីប្រកាសព័ត៌មាននេះនៅឡើយ។ លោកថា កន្លងមក រដ្ឋាភិបាលមានវិធានការច្រើនហើយក្នុងកិច្ចគាំពារកុមារ ប៉ុន្តែលោកពុំបានបញ្ជាក់លម្អិតពីវិធានការនោះបានទេ ដោយសារជាប់ប្រជុំ។
លោកថា៖ «យើងមានវិធានការច្រើនហើយ ក៏ប៉ុន្តែសម្រាប់ climate change [បម្រែបម្រួលអាកាសធាតុ] ដែលថាកុមារប៉ុន្មានលាននាក់ដែលប្រឈមខ្លាំងហ្នឹង ខ្ញុំអត់ទាន់បានទទួលព័ត៌មានហ្នឹងទេ ហើយតួលេខក៏អត់ទាន់ឃើញដែរ។ សំណួរហ្នឹង ខ្ញុំអត់ទាន់ឆ្លើយ តែគ្រាន់ថាជារួម ជាគោលការណ៍ យើងបានគិតច្រើនហើយ មិនមែនទាល់តែ climate change ហ្នឹងមកដល់ បានយើងគិតគូរទេ»។
ជាការកត់សម្គាល់ របាយការណ៍មួយរបស់យូនីសេហ្វ ចេញផ្សាយកាលពីឆ្នាំ២០២១ ក៏បានរកឃើញរួចមកហើយថា កម្ពុជាជាប្រទេសមួយក្នុងចំណោមប្រទេសចំនួន៥០ ដែលមានហានិភ័យខ្ពស់ពីផលប៉ះពាល់នៃបម្រែបម្រួលអាកាសធាតុ៕