កូដករម្នាក់ទៀតបានស្នើសុំពន្យារពេលចូលឆ្លើយបំភ្លឺចំពោះមុខតុលាការករណីក្រុមហ៊ុនណាហ្គាវើលដ៍ប្ដឹង ក្រោយវិវាទការងារនៅក្រុមហ៊ុនល្បែងមួយនេះបានអូសបន្លាយជិត១ឆ្នាំ ដោយពុំទាន់មានដំណោះស្រាយ។
ក្នុងដីកាកោះចុះថ្ងៃទី៣០ ខែកញ្ញា ឆ្នាំ២០២២ ព្រះរាជអាជ្ញារងនៃអយ្យការអមសាលាដំបូងរាជធានីភ្នំពេញ លោក ឆាយ ហុង បានកោះហៅកូដករម្នាក់ទៀតគឺ អ្នកស្រី ម៉ម សុវឌិ្ឍន ឱ្យចូលបំភ្លឺនៅចំពោះមុខតុលាការ នៅថ្ងៃទី១ ខែវិច្ឆកា ខាងមុខនេះ ទៅតាមបណ្តឹងរបស់ក្រុមហ៊ុនណាហ្គាវើលដ៍ដែលប្តឹងពីបទ «រំលោភលើលំនៅឋាន, ធ្វើឱ្យខូចខាតដោយចេតនាមានស្ថានទម្ងន់ទោស និងចាប់ឃុំឃាំង និងបង្ខាំងដោយខុសច្បាប់» ប៉ុន្តែត្រូវកូដកររូបនេះស្នើសុំពន្យារពេលចូលបំភ្លឺតាមការកំណត់របស់តុលាការ។
ក្នុងពាក្យស្នើសុំពន្យារពេលដាក់ទៅសាលាដំបូងរាជធានីភ្នំពេញ នៅថ្ងៃទី២៧ ខែតុលានេះ អ្នកស្រី ម៉ម សុវឌិ្ឍន បានបញ្ជាក់ប្រាប់តុលាការថា មូលហេតុដែលអ្នកស្រីសុំពន្យារពេលចូលបំភ្លឺនៅតុលាការនេះ ដោយសារអ្នកស្រីមិនទាន់រកបានមេធាវីការពារសិទ្ធិបាននៅឡើយ។
កូដករ និងជាអ្នកនាំពាក្យឱ្យក្រុមកូដករ អ្នកស្រី ទិត្យ បូរ៉ាវី មានប្រសាសន៍ថា ករណីតុលាការកោះហៅកូដករណាហ្គាវើលដ៍ឱ្យឆ្លើយបំភ្លឺជាបន្តបន្ទាប់នេះ ជារឿងអយុត្តិធម៌មួយសម្រាប់ពួកគាត់។ អ្នកស្រីថា ក្រុមហ៊ុនណាហ្គាបានរំលោភបំពានសិទ្ធិ និងធ្វើទុក្ខបុកម្នេញលើពួកគាត់ហើយ ហើយប្តឹងពួកគាត់ទៅតុលាការថែមទៀត។
អ្នកស្រីបន្ថែមថា៖ «វាអយុត្តិធម៌ខ្លាំងណាស់សម្រាប់កូដករ ព្រោះក្រុមហ៊ុនណាហ្គាវើលដ៍ប្រើប្រព័ន្ធតុលាការមកដាក់សម្ពាធ និងគំរាមកំហែងលើក្រុមកូដករ។ រឿងនេះជារឿងវិវាទការងារ ហើយអូសបន្លាយជិត១ឆ្នាំហើយ បែរជាមិនដោះស្រាយ ហើយបែរជា[យក]ប្រព័ន្ធតុលាការមកដាក់សម្ពាធលើក្រុមកូដករទៅវិញ»។
គិតមកដល់ថ្ងៃទី២៧ ខែតុលានេះ មានកូដករណាហ្គាចំនួន៧រូបហើយ រួមមានឈ្មោះ សៀក បញ្ញា, ជួប សោភ័ណ្ឌ, សុខ ថាវុធ, នេត ចរិយា, ឆាន បូរ៉ា, សាំង សុផល និង ម៉ម សុវឌ្ឍិន ដែលបានទទួលដីកាកោះឱ្យចូលឆ្លើយបំភ្លឺនៅសាលាដំបូងរាជធានីភ្នំពេញ ប៉ុន្តែកូដករទាំងនោះបានដាក់ពាក្យស្នើសុំពន្យារចូលបំភ្លឺជាបន្តបន្ទាប់ ដោយពួកគេអះអាងថា ទើបតែទទួលបានដីកាកោះមុនពីរទៅបីថ្ងៃនៃកាលបរិច្ឆេទដែលតុលាការឱ្យចូលទៅបំភ្លឺ។
កាលពីថ្ងៃទី២១ ខែតុលា ឆ្នាំ២០២២ សហជីពទ្រទ្រង់សិទ្ធិការងារបុគ្គលិកកម្មករខ្មែរនៃក្រុមហ៊ុនណាហ្គាវើលដ៍មួយ ចាត់ទុកករណីតុលាការកោះហៅកូដករឱ្យចូលបំភ្លឺជាបន្តបន្ទាប់នោះថា ជាលេសរបស់ថៅកែក្រុមហ៊ុនណាហ្គា ក្នុងការប្រើប្រាស់ប្រព័ន្ធតុលាការដាក់បន្ទុកលើកម្មកររងគ្រោះ ជំនួសឱ្យការផ្តល់យុត្តិធម៌ដល់ពួកគេ ហើយថាការប្ដឹងផ្ដល់នោះទៀតសោតបង្ហាញពីការរំលោភសិទ្ធិការងារនៅកម្ពុជាមានគ្រប់ទម្រង់។
វិវាទការងារក្រុមហ៊ុនណាហ្គាវើលដ៍ បានកើតឡើងជាង១ឆ្នាំមកហើយ ក្រោយពេលក្រុមហ៊ុននេះបានបញ្ឈប់បុគ្គលិកចំនួន១ ៣២៩នាក់ ក្នុងចំណោមបុគ្គលិកសរុបជាង៨ ០០០នាក់ ពីការងារ ក្រោមហេតុផលថា «ជួបវិបត្តិហិរញ្ញវត្ថុដោយសារតែបញ្ហាជំងឺកូវីដ-១៩»។ យ៉ាងណា បុគ្គលិកដែលចេញធ្វើកូដកម្មរយៈពេល១០ខែមកនេះ អះអាងថា ការបញ្ឈប់នោះដោយសារថៅកែមានចេតនារំលាយសហជីពការពារសិទ្ធិកម្មករឱ្យអស់ពីក្រុមហ៊ុនមួយនេះ៕
