អូស្ត្រាលី បានឱ្យដឹងនៅថ្ងៃព្រហស្បតិ៍នេះថា ខ្លួននឹងបញ្ជូនទាហានជំនាញចំនួន៧០នាក់ទៅកាន់ចក្រភពអង់គ្លេស ដើម្បីជួយបណ្តុះបណ្តាលដល់ទាហានអ៊ុយក្រែននៅទីនោះ និងបញ្ជូនរថពាសដែកចំនួន៣០គ្រឿងបន្ថែមទៀតដល់អ៊ុយក្រែនផងដែរ។ បើតាមការចុះផ្សាយដោយទីភ្នាក់ងារសារព័ត៌មាន Reuters។
ថ្លែងប្រាប់ទូរទស្សន៍ក្នុងស្រុកមួយ រដ្ឋមន្រ្តីការពារជាតិអូស្រ្តាលី លោក Richard Marles បានលើកឡើងថា៖ «ស្ថានភាព [សង្រ្គាមនៅអ៊ុយក្រែន] នៅពេលនេះ អាចជាជម្លោះដែលនឹងអូសបន្លាយរយៈពេលយូរ។ ដូច្នេះហើយ យើងយល់ថា អ៊ុយក្រែនសម្រាប់ពេលបច្ចុប្បន្ននេះ គឺពិតជាត្រូវការការគាំទ្រក្នុងរយៈពេលវែង ប្រសិនបើពួកគេត្រូវដោះស្រាយជម្លោះនេះដោយខ្លួនឯងផ្ទាល់»។
ជាការឆ្លើយតប រដ្ឋមន្ត្រីការបរទេសអ៊ុយក្រែន លោក Dmytro Kuleba តាមរយៈបណ្តាញសង្គមធ្វីតធ័រ (Twitter) ក៏បានថ្លែងអំណរគុណដល់អូស្ត្រាលីសម្រាប់ជំនួយចុងក្រោយនេះផងដែរ ដោយលោកថា រថពាសដែកដែលបានផ្ដល់ជូននេះពិតជាមានសារៈសំខាន់ក្នុងសមរភូមិ។
ទាក់ទិននឹងករណីនេះ លោកបន្ថែមថា៖ «យើងនឹងចងចាំជានិច្ចនូវការគាំទ្ររបស់អូស្ត្រាលី»។
អូស្ត្រាលីបានផ្គត់ផ្គង់ជំនួយ និងឧបករណ៍យោធាសម្រាប់អ៊ុយក្រែនជាបន្តបន្ទាប់ ខណៈកញ្ចប់ជំនួយដែលត្រូវបានផ្ដល់ជូន គិតរហូតមកដល់ពេលនេះ បានឈានដល់ចំនួនប្រមាណជា៤២៥លានដុល្លារហើយ គិតចាប់តាំងពីរុស្ស៊ីបានបើកការឈ្លានពានកាលពីខែកុម្ភៈកន្លងទៅ។
ភាពតានតឹងរវាងរុស្ស៊ី និងអ៊ុយក្រែន ក្នុងរយៈពេលចុងក្រោយនេះ បានចាប់ផ្ដើមកើនឡើងខ្លាំងបន្ទាប់ពីរុស្ស៊ីបានបើកការឈ្លានពានទ្រង់ទ្រាយធំទៅលើប្រទេសក្បែរខាងរបស់ខ្លួនមួយនេះ ដែលធ្វើឡើងបន្ទាប់ពីការប្រកាសសង្រ្គាមមួយដោយប្រធានាធិបតី លោក វ្លាឌីមៀរ ពូទីន។
ទោះជាយ៉ាងណា រុស្ស៊ីធ្លាប់បានលើកឡើងកាលពីពេលកន្លងទៅថា សកម្មភាពរបស់ខ្លួននេះ គឺជាការអនុវត្ត «ប្រតិបត្តិការយោធាពិសេសមួយ» ដើម្បីបញ្ឈប់រដ្ឋាភិបាលអ៊ុយក្រែនពីការប្រព្រឹត្តអំពើប្រល័យពូជសាសន៍ប្រឆាំងនឹងប្រជាជនរបស់ខ្លួន ខណៈដែលការចោទប្រកាន់នេះ ត្រូវបានបណ្ដាប្រទេសមួយចំនួនចាត់ទុកថាជាការលើកឡើងដោយគ្មានមូលដ្ឋានច្បាស់លាស់៕