គណបក្សភ្លើងទៀន បដិសេធចំពោះការចោទប្រកាន់នានាអំពីទំនាក់ទំនងជាមួយលោក សម រង្ស៊ី និងថ្កោលទោសបុគ្គលទាំងឡាយណាដែលមានចេតនាប្រមាថ ឬរំលោភបំពានរដ្ឋធម្មនុញ្ញ អង្គព្រះមហាក្សត្រ និងរបបរាជានិយមអាស្រ័យរដ្ឋធម្មនុញ្ញ។
ក្នុងសេចក្ដីថ្លែងការណ៍របស់គណបក្សភ្លើងទៀន ចេញនៅថ្ងៃទី២៧ ខែតុលា ឆ្នាំ២០២២នេះ បានលើកឡើងថា គណបក្សភ្លើងទៀន គោរពនូវព្រះរាជតួនាទីដ៏ខ្ពង់ខ្ពស់នៃអង្គព្រះមហាក្សត្រ ដែលមានចែងក្នុងរដ្ឋធម្មនុញ្ញដែលជាច្បាប់កំពូលនៃព្រះរាជាណាចក្រកម្ពុជា។
ជាមួយគ្នានេះដែរ គណបក្សភ្លើងទៀន បានថ្កោលទោសចំពោះបុគ្គលទាំងឡាយណាដែលមានចេតនាប្រមាថ ឬរំលោភបំពានរដ្ឋធម្មនុញ្ញ អង្គព្រះមហាក្សត្រ និងរបបរាជានិយមអាស្រ័យរដ្ឋធម្មនុញ្ញ ដែលការពារដោយរដ្ឋធម្មនុញ្ញនៃព្រះរាជាណាចក្រកម្ពុជា និងបដិសេធចំពោះការប្រកាន់នានាអំពីទំនាក់ទំនងជាមួយលោក សម រង្ស៊ី។
សេចក្ដីថ្លែងការណ៍បញ្ជាក់ថា៖ «គណបក្សភ្លើងទៀន គោរពនិងអនុវត្តយ៉ាងខ្ជាប់ខ្ជួននូវរដ្ឋធម្មនុញ្ញ ច្បាប់ស្ដីពីគណបក្សនយោបាយ និងច្បាប់ជាធរមាននានានៃព្រះរាជាណាចក្រកម្ពុជា ព្រមទាំងលក្ខន្តិកៈគណបក្សដែលបានតម្កល់នៅក្រសួងមហាផ្ទៃ»។
ប្រភពដដែលបន្តថា គណបក្សភ្លើងទៀនបានដំណើការការងារ និងធ្វើសេចក្ដីសម្រេចចិត្តនានាដោយមានការទទួលខុសត្រូវក្នុងអធិបតេយ្យភាពពេញលេញរបស់ខ្លួនស្របតាមលក្ខន្តិកៈ ដោយមិនស្ថិតនៅក្រោមការបង្គាប់បញ្ជាដោយផ្ទាល់ ឬប្រយោលពីបុគ្គល ឬគណបក្សនយោបាយណាមួយឡើយ។
គណបក្សភ្លើងទៀន ក៏បានអំពាវនាវឱ្យប្រជាពលរដ្ឋដែលមិនទាន់មានឈ្មោះក្នុងបញ្ជីបោះឆ្នោតផ្លូវការរបស់គណៈកម្មាធិការជាតិរៀបចំការបោះឆ្នោត ទៅចុះឈ្មោះបោះឆ្នោតឱ្យបានគ្រប់ៗគ្នាចាប់ពីថ្ងៃទី២០ ខែតុលា រហូតដល់ថ្ងៃទី៨ ខែធ្នូ ឆ្នាំ២០២២ នៅតាមសាលាឃុំ-សង្កាត់ ឬនៅតាមបណ្ដាភូមិសាម៉ី ដើម្បីមានសិទ្ធិបោះឆ្នោតនៅថ្ងៃទី២៣ ខែកក្កដា ឆ្នាំ២០២៣ ខាងមុខនេះ។
អ្នកនាំពាក្យគណបក្សភ្លើងទៀន លោក ថាច់ សេដ្ឋា មានប្រសាសន៍នៅថ្ងៃព្រហស្បតិ៍នេះថា ការចេញសេចក្ដីថ្លែងការណ៍របស់គណបក្សភ្លើងទៀន ដើម្បីបង្ហាញពីភាពស្អាតស្អំ។ ប៉ុន្តែលោកថា ប្រសិនបើគណបក្សនេះបញ្ជាក់ហើយនៅតែមានចោទប្រកាន់ទៀតនោះ នោះជាការបំពានទៅលើគណបក្សភ្លើងទៀនហើយ។ លោកបន្តថា គណបក្សនេះអនុវត្តទៅតាមលក្ខន្តិកៈដែលបានតម្កល់នៅក្រសួងមហាផ្ទៃ និងច្បាប់ស្ដីពីគណបក្សនយោបាយ ហើយរាល់សេចក្ដីសម្រេច និងគោលនយោបាយរបស់បក្ស ធ្វើឡើងដោយថ្នាក់ដឹកនាំបក្សភ្លើងទៀនផ្ទាល់ និងមិនមានអ្នកបង្គាប់បញ្ជាឡើយ។
លោកថា៖ «យើងកំពុងធ្វើការតស៊ូមតិដែរ ដោយឃើញអាជ្ញាធរមួយចំនួនបានទៅគំរាមកំហែងដល់ក្រុមប្រឹក្សារបស់យើងនៅឃុំសង្កាត់ដែលបានជាប់ឆ្នោតហ្នឹង ឱ្យផ្ដិតមេដៃថ្កោលទោស ថ្កោលអីហ្នឹង។ ដូច្នេះ យើងចាត់ទុកថា នេះជាការគំរាមកំហែងមួយ ពីព្រោះអ្វីក៏ដោយ ទាល់តែគោរពសិទ្ធិការសម្រេចចិត្តរបស់បុគ្គលម្នាក់ៗ ក្នុងការសម្រេចចិត្តថា ផ្ដិតមេដៃ ឬធ្វើអី្វមួយនោះ»។
អ្នកនាំពាក្យគណបក្សប្រជាជនកម្ពុជា លោក សុខ ឥសាន ចាត់ទុកការចេញសេចក្ដីថ្លែងការណ៍របស់គណបក្សភ្លើងទៀនថាគ្រាន់តែជាទ្រឹស្ដីតែប៉ុណ្ណោះ ប៉ុន្តែការអនុវត្តជាក់ស្ដែងវិញនោះ អាស្រ័យទៅសមត្ថកិច្ច និងតុលាការ។ តែយ៉ាងណា លោកថា ការចេញសេចក្ដីថ្លែងការណ៍ថ្កោលទោសនេះ ឆ្លុះបញ្ចាំងឱ្យឃើញពីទំនាក់ទំនងថ្នាក់ដឹកនាំបក្សភ្លើងទៀន ជាមួយនឹងលោក សម រង្ស៊ី បានបែកបាក់។
លោកថា៖ «អត់ទេ! បញ្ជាក់យ៉ាងម៉េចក៏អត់កើតដែរ មិនមែនសាម៉ីខ្លួនជាអ្នកបញ្ជាក់ទេ វាអាស្រ័យទៅលើសមត្ថកិច្ចគេស្រាវជ្រាវ និងតុលាការគេស្រាវជ្រាវយ៉ាងម៉េច។ បើសិនជាមានពិរុទ្ធភាព ទោះបីជាធ្វើសេចក្ដីថ្លែងការណ៍ថ្កោលទោស ឬបដិសេធយ៉ាងណា ក៏វាមិនអាចលាងការពិតជាក់ស្ដែងបានដែរ»។
តែយ៉ាងណា លោកនាយករដ្ឋមន្ត្រី ហ៊ុន សែន នៅថ្ងៃព្រហស្បតិ៍នេះ បានបង្ហាញការកោតសរសើរ និងថ្លែងអំណរគុណចំពោះថ្នាក់ដឹកនាំគណបក្សភ្លើងទៀន ដែលបានចេញសេចក្តីថ្លែងការណ៍ថ្កោលទោសអ្នកទាំងឡាយណាដែលមានចេតនាប្រមាថព្រះមហាក្សត្រ តាមការស្នើរបស់លោកផងដែរ។
កាលពីថ្ងៃម្សិលមិញ នៅក្នុងពិធីជួបសំណេះសំណាលជាមួយពលរដ្ឋនៅខេត្តកំពង់ឆ្នាំង លោកនាយករដ្ឋមន្ត្រី ហ៊ុន សែន បានជំរុញឱ្យថ្នាក់ដឹកនាំគណបក្សភ្លើងទៀន ក្នុងនោះមានលោក ទាវ វណ្ណុល លោក សុន ឆ័យ និងលោក ថាច់ សេដ្ឋា ចេញមុខមកបញ្ជាក់ចំពោះការលើកឡើងរបស់លោក សម រង្ស៊ី ដែលបានប្រមាថព្រះមហាក្សត្រ ដោយលោកថា ដើម្បីឱ្យអស់មន្ទិលសង្ស័យ ខណៈបក្សភ្លើងទៀននេះ លោក សម រង្ស៊ី ជាអ្នកបង្កើតឡើង។ លោកបន្តថា បច្ចុប្បន្ន ដ្បិតលោក សម រង្ស៊ី មិនបានដឹកនាំគណបក្សនេះក៏ពិតមែន ប៉ុន្តែដើម្បីជម្រះមន្ទិលនោះ ថ្នាក់ដឹកនាំគណបក្សភ្លើងទៀនត្រូវចេញបកស្រាយឱ្យច្បាស់លាស់។
ស្ថាបនិកអង្គការអភិវឌ្ឍន៍ផ្នត់គំនិត លោក សេក សុជាតិ មានប្រសាសន៍ថា ទំនាក់ទំនងរវាងលោក សម រង្ស៊ី និងថ្នាក់ដឹកនាំគណបក្សភ្លើងទៀន មិនអាចកាត់បានទេ ដោយសារលោក សម រង្ស៊ី ជាអ្នកបង្កើតគណបក្សនេះ។ ប៉ុន្តែដើម្បីបង្ហាញឱ្យសាធារណជនបានដឹងនោះ លោកថា គណបក្សភ្លើងទៀន ត្រូវធ្វើការផ្សព្វផ្សាយ និងបញ្ជាក់ពីជំហររបស់ខ្លួនឱ្យបានច្បាស់ បើពុំនោះទេ អាចនឹងត្រូវប្រឈមនឹងការរំលាយតាមច្បាប់ស្ដីពីគណបក្សនយោបាយ។
លោកថា៖ «ឧទាហរណ៍យើងធ្វើយ៉ាងម៉េច ឧបមាថា លោក សម រង្ស៊ី លោកថាមិនបានពាក់ព័ន្ធទេ គណបក្សភ្លើងទៀនថាគាត់មិនបានពាក់ព័ន្ធជាមួយនឹងលោក សម រង្ស៊ី ទេ តែពីរនាក់នឹងជួបគ្នា យើងដឹងហើយថា វាអាចមានតាមបណ្ដាញ ធ្វើម៉េចក៏ដោយកុំឱ្យគេចាប់យកបណ្ដាញយកមកធ្វើភស្ដុតាង ជាពិសេសយើងដឹងហើយ គណបក្សភ្លើងទៀន ទោះបីជាអនុប្រធាន ឬប្រធានបក្សបច្ចុប្បន្ន មិនទាក់ទងផ្ទាល់ ក៏ប៉ុន្តែអាចទាក់ទងប្រយោលតាមរយៈណាមួយ ឬតាមរយៈអ៊ីម៉ែល ឬក៏តាមរយៈបណ្ដាញសង្គម ឬក៏ប្រព័ន្ធអីមួយដែលគេចាប់ អាហ្នឹងសុទ្ធតែជារឿង។ ដូច្នេះ យើងគួរតែបញ្ចប់ទំនាក់ទំនង ដោយប្រកាសជាឱឡារិក ដើម្បីឱ្យសាធារណជនជាតិ និងអន្តរជាតិ គេបានមើលឃើញអំពីការប្ដេជ្ញាចិត្ត»៕
