សមត្ថកិច្ចខេត្តស្វាយរៀង បានឱ្យដឹងថា ពលករបរទេសបានគប់ដុំថ្មទៅលើរថយន្តក្រុង ក្នុងក្រុងបាវិត ហើយអ្នកដំណើរបានព្យាយាមសម្រុកចាកចេញពីរថយន្តក្រុងនោះ ខណៈប្រជាពលរដ្ឋក្នុងតំបន់និយាយថា មានមនុស្សរាប់រយនាក់បានចាកចេញពីទីតាំងប្រតិបត្តិការឆបោកក្នុងក្រុងបាវិត ខេត្តស្វាយរៀង នៃប្រទេសកម្ពុជា ជាប់ព្រំដែនប្រទេសវៀតណាម ជារៀងរាល់ថ្ងៃ។
ការសម្រុកចាកចេញនេះកើតឡើងបន្ទាប់ពីកម្មករប្រតិបត្តិការឆបោក ត្រូវបានផ្ទេរទៅកាន់កាស៊ីណូ ក្នុងក្រុងបាវិត បន្ទាប់ពីសមត្ថកិច្ចធ្វើការឆ្មក់ចូលទីតាំងផ្សេងៗក្នុងប្រទេស។ បន្ទាប់ពីពលករបរទេសអំពាវនាវរកជំនួយជាច្រើនខែពីទីតាំងផ្សេងៗនៅក្នុងប្រទេសកម្ពុជា ដែលពួកគេនិយាយថាត្រូវបានបង្ខាំង និងបង្ខំឱ្យប្រព្រឹត្តអំពើឆបោកតាមអ៊ីនធឺណិត ប្រទេសកម្ពុជាត្រូវបានទម្លាក់ចំណាត់ថ្នាក់ក្នុងករណីជួញដូរមនុស្ស។
អធិការនគរបាលក្រុងបាវិត លោក ឯម សុវណ្ណារិទ្ធ មានប្រសាសន៍ថា នៅវេលាម៉ោងប្រមាណ៤និង៣០នាទីទៀបភ្លឺ ថ្ងៃអង្គារ [ទី២៥ ខែតុលា ឆ្នាំ២០២២] មានមនុស្សប្រមូលផ្តុំគ្នានៅជិតច្រកទ្វារព្រំដែនកម្ពុជា-វៀតណាម។ លោកបន្ថែមថា ពួកគេបានគប់ដុំថ្ម ខណៈអ្នកផ្សេងទៀតព្យាយាមសម្រុកចេញពីរថយន្តក្រុង។ ទោះយ៉ាងណា ហ្វូងមនុស្សបានចាកចេញ នៅពេលនគរបាលទៅដល់។
លោកបានថ្លែងថា៖ «មានមនុស្សប្រមាណពី៥០ទៅ៦០នាក់ ហើយយើងមិនដឹងថាភាពចលាចលនេះបានកើតឡើងដោយរបៀបណា ឬដោយសារមូលហេតុអ្វីនោះទេ។ ពួកគេសុទ្ធតែជាជនជាតិវៀតណាម ហើយពេលព្រំដែនបើក ពួកគេទៅស្រុកកំណើត»។
វីដេអូដែលបានបង្ហោះក្នុងបណ្ដាញសង្គម TikTok បានបង្ហាញពីទិដ្ឋភាពដ៏ចលាចលនៅខាងក្រៅកាស៊ីណូក្រោន ក្នុងក្រុងបាវិត ខេត្តស្វាយរៀង ដោយមានហ្វូងមនុស្សបិទផ្លូវរថយន្តក្រុងដែលកំពុងចេញដំណើរ និងខ្លះទៀតលោតផ្លោះរបាំងការពារព្រំដែន។ មន្ត្រីនគរបាលបាននិយាយថា គាត់បានឃើញវីដេអូនៅក្នុង TikTok ហើយបានបញ្ជាក់ថា ពិតជាមានករណីនេះកើតឡើងមែន។
លោក សុវណ្ណារិទ្ធ បានបន្ថែមថា បុរសជនជាតិថៃម្នាក់ត្រូវបានគេប្រទះឃើញស្លាប់នៅក្នុងបរិវេណកាស៊ីនក្រោនមួយថ្ងៃ មុនករណីនេះកើតឡើង។
លោកបាននិយាយថា៖ «គាត់បានធ្លាក់ពីអគារ»។
អ្នកបើកបរម៉ូតូកង់បីក្នុងតំបន់ម្នាក់ដែលសុំមិនបញ្ចេញឈ្មោះដោយបារម្ភពីសុវត្ថិភាព បាននិយាយថា គាត់បានឃើញមនុស្សរាប់រយនាក់ចាកចេញពីកាស៊ីណូក្រោន កាស៊ីណូម៉ុកបាយ និងកាស៊ីណូហេងហេង ជារៀងរាល់ថ្ងៃ ក្នុងរយៈពេល៣ថ្ងៃកន្លងមកនេះ។
ទីតាំងទាំង៣នេះ ប្រឈមនឹងការចោទប្រកាន់ពីបទឆបោកពលករបរទេសឱ្យប្រព្រឹត្តអំពើឆបោកជាសកល។
អ្នកបើកបរម៉ូតូកង់បីរូបនោះបានបន្តថា គាត់ឃើញមនុស្សដើរឆ្លងកាត់ព្រំដែនដោយមានវ៉ាលី ហើយជាច្រើននាក់ផ្សេងទៀតធ្វើដំណើរតាមរថយន្ត និងរថយន្តក្រុង។
គាត់និយាយថា៖ «នៅសល់មនុស្សតែប៉ុន្មាននាក់ប៉ុណ្ណោះនៅក្នុងទីតាំងទាំងនោះ»។
អ្នករត់ម៉ូតូឌុបម្នាក់បាននិយាយថា មនុស្សភាគច្រើនចាកចេញនៅពេលយប់ និងព្រឹកព្រលឹម។
ទាំងនគរបាល ឬប្រជាពលរដ្ឋក្នុងតំបន់ បានឱ្យដឹងថា ពួកគេមិនដឹងពីមូលហេតុដែលនាំឱ្យមានការសម្រុកចាកចេញនេះឡើយ និងមិនដឹងថារថយន្តក្រុងដឹកមនុស្សទាំងនោះយកទៅណាឡើយ៕
បកប្រែនិងសម្រួលចេញពីអត្ថបទដើមភាសាអង់គ្លេស៖ Chaotic Scenes in Bavet Amid Apparent Exodus