ក្រសួង​នឹង​ចាត់​មន្ត្រី​ជំនាញ​ចុះពិនិត្យ​បច្ចេកទេស​ទូកចម្លង ដើម្បី​ទប់ស្កាត់​ការ​លិច​បណ្ដាល​ឱ្យ​មនុស្សស្លាប់​បន្តទៀត

លោក ស៊ុន ចាន់ថុល រដ្ឋមន្ត្រីក្រសួងសាធារណការ និងដឹកជញ្ជូន ថ្លែងក្នុងសន្និសីទសារព័ត៌មានស្ដីពី “សមិទ្ធផលសម្រេចបានរយៈពេល៥ឆ្នាំកន្លងមក របស់ក្រសួងសាធារណការ និងដឹកជញ្ជូន” ថ្ងៃទី២៧ ខែតុលា ឆ្នាំ២០២២។ (អង្គភាពអ្នកនាំពាក្យរាជរដ្ឋាភិបាល)

រដ្ឋមន្ត្រីក្រសួងសាធារណការ និងដឹកជញ្ជូន បានលើកឡើងថា នឹងចាត់ម​ន្ត្រីជំនាញចុះត្រួតពិនិត្យទូកចម្លង​អ្នកដំណើរ​នៅ​ទូទាំងប្រទេស ឱ្យស្រប​តាម​ស្ដង់​ដារ​បច្ចេក​ទេស និងពន្លឿន​​ការ​ចេញសេចក្តីព្រាង​​ច្បាប់​ពាក់ព័ន្ធនឹង​ការ​ដឹកជញ្ជូនតាមផ្លូវទឹក និងសេចក្តីព្រាង​​ច្បាប់កំពង់ផែ​ឱ្យ​បាន​លឿន ដើម្បីទ​​ប់​ស្កាត់​​កុំ​ឱ្យ​មាន​ករណីលិចទូក​ចម្លង​​បណ្តាល​ឱ្យ​មនុស្ស​ស្លាប់​បន្ត​ទៀត។

នៅក្នុង​សន្និសីទ​សារព័ត៌មានស្តីពី «សមិទ្ធផលសម្រេចបានរយៈពេល៥ឆ្នាំ របស់ក្រសួងសាធារណការ និងដឹកជញ្ចូន» នៅទីស្តីការ​គណៈរដ្ឋមន្ត្រី នាថ្ងៃទី២៧ ខែតុលា ឆ្នាំ២០២២នេះ លោក ស៊ុន ចាន់ថុល រដ្ឋមន្ត្រីក្រសួងសាធារណការ និងដឹកជញ្ជូន បានថ្លែង​ថា កាលពីពេលថ្មីៗនេះ មានឧបទ្ទវហេតុ​លិច​ទូក​ចម្លង​នៅ​ភូមិ​កោះ​ចំរើន ឃុំកំពង់ភ្នំ ស្រុកលើកដែក ខេត្តកណ្ដាល​ បណ្ដាល​​ឱ្យសិស្សសាលាស្លាប់ចំនួន១១នាក់ និង៤នាក់ទៀតរួចផុតជីវិតពីហេតុការណ៍ដ៏​អាក្រក់​នេះ។

ទូកចម្លងដែលបង្កនូវ​ឧបទ្ទវ​ហេតុ​លិច​ទូក​ដ​ កាលពីយប់ថ្ងៃទី១៣ នៅ​​​ភូមិកោះចំរើន ឃុំកំពង់ភ្នំ ស្រុកលើកដែក ខេត្តកណ្ដាល។ (ហ្វេសប៊ុក៖ ស្នងការដ្ឋាននគរបាលខេត្តកណ្តាល)

លោក​បង្ហាញការសោកស្តាយនៅពេលដែលទទួលបានព័ត៌មានដ៏អាក្រក់បែបនេះកើតឡើង។ តែយ៉ាងណា លោកថា នឹង​ចាត់​មន្ត្រី​ជំនាញ​ចុះ​ត្រួតពិនិត្យទូកដឹកជញ្ជូន​អ្នកដំណើរ​នៅទូទាំងប្រទេស ឱ្យស្រ​ប​តាម​ស្តង់​ដារ​បច្ចេកទេស ដើម្បីទប់ស្កាត់កុំឱ្យមាន​រឿង​បែប​នេះ​កើត​ឡើងបន្តទៀត ។

លោកថ្លែងថា៖ «ខ្ញុំក៏ឱ្យអគ្គនាយកដឹកជញ្ជូនតាមផ្លូវទឹក ពិនិត្យពិចារណាក្នុងការត្រួតពិនិត្យ​ទូកនៅកម្ពុជា​យើង។ ឡាន​យើង​យកទៅ​ឆៀក ប៉ុន្តែ​ទូក យើង​មិន​ទាន់​ [ពិនិត្យ] ដោយសារតែច្បាប់ដឹកជញ្ជូនផ្លូវទឹក​មិនទាន់បាន​ធ្វើចេញនៅឡើយ ដូច្នេះយកទៅអនុវត្តបង្ខំ​គេ​ឱ្យ​មក​បញ្ជាក់​ទូក​មិន​ទាន់​បាន​ត្រឹម​ត្រូវ អ៊ីចឹង​ខ្ញុំ​ឱ្យ​ឯកឧត្តម អៀង វ៉េងស៊ុន រដ្ឋលេខាធិការទទួលបន្ទុកជំរុញច្បាប់ដឹក​ជញ្ជូនតាម​ផ្លូវ​ទឹក ច្បាប់​កំពង់​ផែ ឱ្យបាន​លឿន ដើម្បីយើងមើលឱ្យ​បានត្រឹមត្រូវ»។

លោកថ្លែង​បន្ត​ថា៖ «រាល់ថ្ងៃនេះ អត់ដែលបានទៅត្រួតពិនិត្យ[ទូក]ទេ អ៊ីចឹង​​ការងារនះ​ជា​កំហុស​របស់​យើង​ដែរ យើង​មិន​បាន​ត្រួត​ពិនិត្យ​​ទេ ថា​ទូកដ​មាន​គ្នាជិះ​ប៉ុន្មាន​នាក់? បើ​ថា​បាន​៥០​នាក់ ត្រូវ​មាន​អាវ​ពោង​៥០ ប៉ុន្តែ​យើង​អត់​បាន​ធ្វើ ច្បាប់​អត់​ទាន់​មាន ប៉ុន្តែ​យើង​ក៏​ប្រហែស​​ដែរ​ បើយើង​អត់​មាន​ច្បាប់​ ក៏​យើង​ជួយ​ទៅណែនាំដែរ​។ អ៊ីចឹង​យកឱកាសនេះ ឱកាសអកុសល យក​ទៅ​ជំរុញ​ធ្វើច្បាប់​ឱ្យ​បាន​លឿន ចុះត្រួត​ពិនិត្យ​ឱ្យបានដិតដ​ល់អំ​ពី​អាវពោង​សុវត្ថិភាពនៅ​តាមទូកនីមួយៗ»។

លោក សុខ ចាន់ វ័យ​៣៩​ឆ្នាំ ប្រជាពលរដ្ឋរស់នៅឃុំកំពង់ភ្នំ ស្រុកលើកដែក​ ដែល​​ត្រូវ​ជា​ឪពុក​បង្កើត​របស់​កុមារ ចាន់ សុខ​ជីម ដែលស្លាប់​ក្នុងឧបទ្ទវហេតុលិចទូក​នៅខេត្តកណ្តាល​​នោះ សាទរចំពោះចំណាត់ការរបស់ក្រសួង ដែលឱ្យ​មន្ត្រីចុះត្រួតពិនិត្យ​បច្ចេក​ទេស​​ទូក​ដឹក​អ្នកដំណើរ និង​ពន្លឿនការបង្កើត​ច្បាប់ពាក់ព័ន្ធ ដើម្បី​ទប់ស្កាត់​​បញ្ហា​លិច​ទូកបណ្តាលឱ្យ​មនុស្ស​ស្លាប់នេះបន្ត​ទៅ​ទៀត​​។

លោកថា៖ «អាជ្ញាធរត្រូវតាមដានមើល ត្រូវនិយាយប្រាប់ម្ចាស់អាជីវកម្មទូក មានអាវពោងពាក់ ពេលមានគ្រោះថ្នាក់ យើងកាត់បន្ថយពេលមានគ្រោះថ្នាក់អ៊ីចឹងទៅ»។

នាយក​​ទទួល​បន្ទុក​កិច្ចការទូទៅ​ នៃអង្គការសិទ្ធិមនុស្សលីកាដូ លោក អំ សំអាត បង្ហាញ​​ការ​សោក​ស្តាយចំពោះករណីឧបទ្ទវហេតុ​លិចទូកចម្លងដែលបណ្តាល​ឱ្យកុមារ​ជាង​១០នាក់ស្លាប់នា​ពេល​កន្លង​មក​នេះ ហើយ​អាជ្ញាធរ​ពាក់​ព័ន្ធទើប​តែ​ខ្នះខ្នែង​នាំ​គ្នា​យកចិត្ត​ទុក​ដាក់​លើ​ការ​តាម​ដាន និងត្រួតពិនិត្យ​បច្ចេកទេស​ទូក​ដ ឬទូកដឹកអ្នកដំណើរ​​នៅពេលនេះ។

យ៉ាងណា លោកអំពាវនាវទៅក្រសួងសាធារណការ និងដឹកជញ្ជូន ជំរុ​ញទៅ​អាជ្ញាធរពាក់ព័ន្ធត្រូវធ្វើការត្រួតពិនិត្យទូកដឹកអ្នកដំណើរ​​ឱ្យមាន​តម្លាភា​ព និង​កុំឱ្យមានអំពើពុករលួយ ទើប​អាចទប់​ស្កាត់បញ្ហា​នេះបាន។

លោកអំពាវនាវដូច្នេះថា៖ «មន្ត្រីក្រសួងសាធារណការ ដែលចុះទៅពិនិត្យនិងណែនាំទៅដល់មន្ត្រីផ្សេង ឬក៏អ្នកដែលជាម្ចាស់អាជីវកម្ម​ផ្ទាល់ ហើយ​បើសិនជាមន្ត្រីមូលដ្ឋាន ឬម្ចាស់អាជីវកម្មគប់គិត​គ្នា មិនអនុវត្តតាម មិនធ្វើតាមទេ នៅពេលដែលមានបញ្ហា ត្រូវតែចាត់វិធានការតាមផ្លូវច្បាប់ ឬក៏មិនទាន់មានបញ្ហា នៅពេលដែលដាក់វិធានការហើយ អ្នកទាំងអស់ហ្នឹងមិនអនុវត្ត ត្រូវចាត់វិធានការតា​ម​ផ្លូវច្បាប់ ផ្អាកអាជីវកម្ម ឬបិទអាជីវកម្មជាដើម»។

ឧបទ្ទវហេតុ​លិច​ទូក​ចម្លង​នៅ​ភូមិ​កោះ​ចំរើន ឃុំកំពង់ភ្នំ ស្រុកលើកដែក ខេត្តកណ្ដាល​ បានកើតឡើងនៅម៉ោងជិត៧យប់ ថ្ងៃទី១៣ ខែតុលា ឆ្នាំ២០២២ ដែលបណ្ដាល​​ឱ្យសិស្សសាលាចំនួន១៥នាក់ ​មាន​អាយុ​ចន្លោះពី១២ឆ្នាំ ទៅ​១៤ឆ្នាំ​ បានបាត់ខ្លួន។ ក្រោយមក ​សមត្ថកិច្ច និងក្រុមជួយសង្គ្រោះ បានរកឃើញកុមារចំនួន១១នាក់ស្លាប់​បាត់​បង់​ជីវិត ខណៈកុមារ៤នាក់ទៀត​បានរួចផុតជីវិតពីហេតុការណ៍ដ៏​អាក្រក់​នេះ។

ហេតុការណ៍​​នេះបានកើត​ឡើង ដោយសមត្ថកិច្ចបញ្ជាក់ថា ​​បណ្ដាល​មក​ពីម្ចាស់ទូកដាក់​លើស​ចំណុះ ធ្វេស​ប្រហែស និង​មិនមាន​ការប្រុងប្រយ័ត្ន​ ដោយគ្មានអាវពោងសម្រាប់ការពារ។

ក្រោយកើតហេតុ សមត្ថកិច្ចបានឃាត់ខ្លួនម្ចាស់ទូកដ ២នាក់ និងអ្នកបើកទូកម្នាក់ កាលពីថ្ងៃទី១៥ ខែតុលា ឆ្នាំ២០២២ ដើម្បីសួរនាំ និងបញ្ជូនសំណុំរឿង​ទៅតុលាការ។ បន្ទាប់​មក ​នៅ​ថ្ងៃទី​១៧ ខែតុលា ព្រះរាជអាជ្ញាអមសាលាដំបូងខេត្តកណ្ដាល លោក លាវ ស្រេង ដែលកាន់សំណុំរឿងនេះ បានសម្រេចដោះលែងពួកគេវិញ ក្រោយ​​​សមត្ថកិច្ចបានសួរចម្លើយ និង​ធ្វើកំណត់​ហេតុ​ស្រប​តាម​ច្បាប់​​រួច​ហើយ។ យ៉ាងណា លោកថា សំណុំរឿងនេះនៅតែបន្តតាមនីតិវិធីច្បាប់នៅតុលាការ​​ដដែល៕

រក្សាសិទ្វិគ្រប់យ៉ាងដោយ ស៊ីស៊ីអាយអឹម

សូមបញ្ជាក់ថា គ្មានផ្នែកណាមួយនៃអត្ថបទ រូបភាព សំឡេង និងវីដេអូទាំងនេះ អាចត្រូវបានផលិតឡើងវិញក្នុងការបោះពុម្ពផ្សាយ ផ្សព្វផ្សាយ ការសរសេរឡើងវិញ ឬ ការចែកចាយឡើងវិញ ដោយគ្មានការអនុញ្ញាតជាលាយលក្ខណ៍អក្សរឡើយ។
ស៊ីស៊ីអាយអឹម មិនទទួលខុសត្រូវចំពោះការលួចចម្លងនិងចុះផ្សាយបន្តណាមួយ ដែលខុស នាំឲ្យយល់ខុស បន្លំ ក្លែងបន្លំ តាមគ្រប់ទម្រង់និងគ្រប់មធ្យោបាយ។ ជនប្រព្រឹត្តិ និងអ្នកផ្សំគំនិត ត្រូវទទួលខុសត្រូវចំពោះមុខច្បាប់កម្ពុជា និងច្បាប់នានាដែលពាក់ព័ន្ធ។

អត្ថបទទាក់ទង

សូមផ្ដល់មតិយោបល់លើអត្ថបទនេះ

VODEnglish.news

VODEnglish.news

Everybody Well-Informed, Everybody Empowered