មេធាវីការពារសិទ្ធិឱ្យជនជាប់ចោទ ឱ្យដឹងថា ក្រុមប្រឹក្សាជំនុំជម្រះនៃតុលាការកំពូល គ្រោងនឹងប្រកាសសេចក្ដីសម្រេចចិត្តរបស់ខ្លួនលើបណ្ដឹងសាទុក្ខសុំលិខិតឆ្លងដែនរបស់អតីតអ្នករាយការណ៍ព័ត៌មានអាស៊ីសេរី នៅថ្ងៃសុក្រស្អែកនេះវិញ។
កាលពីថ្ងៃម្សិលមិញ តុលាការកំពូលបានបើកសវនាការលើបណ្តឹងសុំដកលិខិតឆ្លងដែនទៅកាន់កាប់របស់លោក យាង សុធារិន្ទ ហៅ យាង សុជាមេត្តា អតីតអ្នករាយការណ៍ព័ត៌មានអាស៊ីសេរី។ ក្រោយបញ្ចប់ការសួរដេញដោលរួច ប្រធានក្រុមប្រឹក្សាជំនុំជម្រះ លោក គង់ ស្រ៊ីម គ្រោងនឹងប្រកាសសាលដីកាលើសំណុំរឿងនេះ នៅថ្ងៃទី២ ខែវិច្ឆិកា ឆ្នាំ២០២២។
តែយ៉ាងណា មេធាវីការពារក្តីឱ្យអតីតអ្នកសារព័ត៌មានអាស៊ីសេរី គឺលោក សំ ចំរើន បានឱ្យដឹងនៅថ្ងៃព្រហស្បតិ៍នេះថា ប្រធានក្រុមប្រឹក្សាជំនុំជម្រះ ប្តូរពេលវេលានៃការប្រកាសសាលដីកាលើសំណុំរឿងស្នើសុំដកលិខិតឆ្លងដែនរបស់កូនក្តីខ្លួន ពីថ្ងៃទី២ ខែវិច្ឆិកា មកថ្ងៃទី២៨ ខែតុលា ស្អែកនេះវិញ។
ប្រាប់ក្រុមអ្នកសារព័ត៌មាននៅខាងមុខបរិវេណតុលាការកំពូល នៅព្រឹកថ្ងៃទី២៦ ខែតុលា ម្សិលមិញ លោក យាង សុធារិន្ទ មានសុទិដ្ឋិនិយមថា ការស្នើសុំលិខិតឆ្លងដែនដើម្បីយកមកប្រើប្រាស់នេះ តុលាការនឹងបើកផ្លូវសម្រាប់ខ្លួន ដោយយោងលើស្ថានភាពជាក់ស្តែង ខណៈសាច់ញាតិរបស់លោក នៅឯដែនដីកំណើតកម្ពុជាក្រោម កំពុងជួបទុក្ខ ដែលលក្ខខណ្ឌនេះ តុលាការគួរពិចារណាក្នុងការផ្តល់លទ្ធភាពសម្រាប់លោក។
លោកបន្តថា៖ «រឿងនេះ ខ្ញុំយល់ថា ប្រសិនជាការសម្រេចហ្នឹង វាអត់មានផ្សារភ្ជាប់នឹងរឿងនយោបាយ ហើយបើការសម្រេចហ្នឹងឈរលើគោលការណ៍មនុស្សធម៌ ដូចជា ខ្ញុំបានស្នើសុំហើយថា ករណីខ្ញុំនេះ វាអភព្វមែនទែន ដែលថាមិនមានឱកាសសូម្បីទៅជួបឪពុកម្តាយ ពេលឪពុកម្តាយឈឺ។ ឥលូវនេះ បងឈឺធ្ងន់មែនទែន ឈឺដល់ដំណាក់កាលចុងក្រោយហើយ ហើយប្រសិនបើតុលាការពិចារណាទៅលើគោលការណ៍មនុស្សធម៌ ហើយផ្សារភ្ជាប់ទៅនឹងការអះអាងរបស់មេធាវីខ្ញុំ ទាក់ទងនឹងផ្លូវច្បាប់ ថាពួកខ្ញុំលែងជាប់កាតព្វកិច្ចក្រោមការត្រួតពិនិត្យរបស់តុលាការ។ បើគិតពីរយៈពេលនៃការស៊ើបអង្កេតមកដល់ពេលនេះ មានរយៈពេល៥ឆ្នាំហើយ ដែលអត់មានដំណើរការអីជាលទ្ធផលសោះហ្នឹង គឺផ្អែកលើហេតុផលទាំងបីហ្នឹង ខ្ញុំគិតថាលិខិតឆ្លងដែនដែលខ្ញុំស្នើសុំហ្នឹង វាគួរតែបាន»។
លោក យាង សុធារិន្ទ ហៅ យាង សុជាមេត្តា និងលោក អ៊ួន ឈិន អ្នករាយការណ៍ព័ត៌មានវិទ្យុអាស៊ីសេរី ត្រូវបានសមត្ថកិច្ចចាប់ខ្លួនកាលពីថ្ងៃទី១៤ ខែវិច្ឆិកា ឆ្នាំ២០១៧ នៅផ្ទះសំណាក់ ម៉ារឌី ក្នុងខណ្ឌមានជ័យ រាជធានីភ្នំពេញ។ អ្នកទាំង២ ត្រូវរងការចោទប្រកាន់ពីបទ «ប្រគល់ឱ្យរដ្ឋបរទេសនូវព័ត៌មានជាអាទិ៍ ដែលអាចឱ្យអន្តរាយការការពារជាតិ»។ គិតពីថ្ងៃដែលសមត្ថកិច្ចចាប់ខ្លួនមកដល់ពេលនេះ សំណុំរឿងព្រហ្មទណ្ឌមួយនេះបានអូសបន្លាយជិត៥ឆ្នាំទៅហើយ។
កាលពីថ្ងៃទី៧ ខែមេសា ឆ្នាំ២០២២ ចៅក្រមជំនុំជម្រះនៃសាលាដំបូងរាជធានីភ្នំពេញ លោក ពេជ្រ វិជ្ជាធរ បានច្រានចោលម្តងរួចហើយ នៅបន្ទាប់ពីលោក យាង សុធារិន្ទ តាមរយៈមេធាវីការពារសិទ្ធិរបស់ខ្លួន ដាក់សំណើសុំលិខិតឆ្លងដែននេះដើម្បីយកទៅប្រើប្រាស់។ កាលពីថ្ងៃទី១២ ខែកក្កដា ជនជាប់ចោទ បានធ្វើបណ្តឹងសាទុក្ខ ប្តឹងមកតុលាការកំពូលបន្ត ក្រោយពីសភាស៊ើបសួរនៃតុលាការថ្នាក់កណ្តាលបដិសេធជាថ្មីទៀត កាលពីខែមិថុនា ឆ្នាំ២០២២ ចំពោះការស្នើសុំដកលិខិតឆ្លងដែននេះ៕