រដ្ឋាភិបាលរកឃើញជនបរទេសដែលធ្វើការនៅកម្ពុជាជិត៩០ភាគរយកំពុងបំពានច្បាប់

កម្លាំងជំនាញអធិការដ្ឋាន សហការជាមួយផែនអន្តោប្រវេសន៍ខេត្ត កម្លាំងប្រឆាំងការជួញដូរ កម្លាំងប្រឆាំងបទល្មើសគ្រឿងញៀន និងមន្ត្រីពាក់ព័ន្ធច្រើនផ្នែកទៀត ចុះត្រួតពិនិត្យជនបរទេសស្នាក់នៅសណ្ឋាគារថាន់តាយ ស្ថិតនៅភូមិ៣ សង្កាត់ស្មាច់មានជ័យ ក្រុងខេមរភូមិន្ទ ខេត្តកោះកុង ដោយជនបរទេសខ្លះមិនមានលិខិតឆ្លងដែន ឬហួសសុពលភាព នៅថ្ងៃទី២១ ខែកញ្ញា ឆ្នាំ២០២២។ (អគ្គស្នងការនគរបាលជាតិ)

រ​ដ្ឋ​មន្ត្រី​ក្រសួងម​ហាផ្ទៃ​ លោ​ក ស​ ​ខេង​ ព្រ​មា​នពី​វិធា​ន​ការ​ផាក​ពិន័​យ​ធ្ងន់​ធ្ង​រ ​ចំ​ពោះជ​​ន​​​បរទេសទាំង​ឡាយណាមិនគោរពច្បាប់កម្ពុជា ​​រួមទាំ​ងអ្នកគ​ប់គិត​ ដែលជាផ្នែកមួយដើ​ម្បី​ប​ង្កើន​​ប្រា​​​ក់​ចំណូ​ល​ជាតិ ​ក្រោយ​​ពី​រក​​ឃើញ​ថា ជនបរទេសដែលធ្វើការនៅកម្ពុជាជិត៩០ភាគរយកំពុងបំពានច្បាប់កម្ពុជា។

ក្នុ​​​ងពិធី​មួ​យនៅខេត្តបា​ត់​ដំប​ង កាលពី​ថ្ងៃទី២៧ ខែតុលា​នេះ​​​ លោក ស ខេង បា​​ន​រំឭកថា​ ក្រោយបង្កើតហ្វេ​​សប៊ុកសម្រាប់ទ​​ទួល​ពាក្យ​ប​ណ្តឹង ជុំវិ​ញ​បញ្ហាជួញ​ដូរ​មនុស្ស នា​​ប៉ុន្មាន​​ខែចុង​​ក្រោ​​យនេះ​​ លោក​​ទទួ​​ល​បា​​​ន​ព័​​​ត៌​មា​ន​ច្រើនជាងពីមន្ត្រីពាក់ព័ន្ធក្រោមឱវាទ។

លោកគូសបញ្ជាក់ថា​​ មកដ​ល់ពេលនេះ ​លោក​ទ​ទួ​​លបានពាក្យបណ្តឹ​ងស​រុប​ជិ​ត៦០០ករណី ​ហើយ​ថា​ករណី​ចុះបង្ក្រាប​តាម​រយៈពាក្យ​បណ្តឹងនោះ​​ទៀត​សោត គឺបាន​រកឃើញការពិតមែន​ គ្រាន់តែ​ទម្រង់​នៃ​ការ​ជួញដូរ​នោះមាន​ទម្រង់​ខុស​គ្នា។

ក្នុងន័យនេះ លោក​ពន្យល់​ថា ជន​រងគ្រោះខ្លះត្រូវបានគេធ្វើទារុណកម្ម ខ្លះត្រូវបានបង្ខាំងមិន​ឱ្យចេញ​ក្រៅ ខ្លះ​បង្ខំ​ឱ្យ​ធ្វើការ​លើស​ម៉ោង និង​ខ្លះ​ទៀតចាញ់​បោ​​​ក​គេ​តាមរយៈ​​ការសន្យាឱ្យប្រាក់ខែ១ ០០០ដុល្លារ​ក្នុងមួយ​ខែ តែ​បា​​​នតែ៣០​០​​ដុ​ល្លា​​រ ជាដើ​ម ដែលកា​រណ៍នេះ លោកថា ​​រដ្ឋាភិ​បាលកំ​ពុងបន្ត​ស្រាវជ្រាវ និង​ចាត់វិធាន​ការតាមច្បាប់។

បើតាម​លោក ស ខេង រាជធានី-ខេត្ត​​ដែល​លោក​ទទួល​បាន​បណ្តឹងច្រើនជាងគេ មានខេត្ត​កោះកុង ឧត្តរ​មាន​ជ័យ ពោធិ៍​សាត់ ស្វាយរៀង និងរាជធានីភ្នំពេញ ជាដើម។

បន្ថែមពីនេះ លោក​ថា បញ្ហា​មួយ​ទៀត​ដែល​កំពុង​កើត​ឡើង​យ៉ាង​ធ្ងន់​ធ្ងរ​ដែរ​នោះ​​ គឺ​ហត្ថ​ព​លក​រ​​បរ​ទេស​​ ​​កំពុ​​​ង​ធ្វើការនៅកម្ពុជា ភាគច្រើនខុសច្បាប់​រហូត​ដល់៨៥​ភាគ​រយ ដែល​ខ្លះ​មាន​លិ​ខិត​ឆ្លងដែន ​តែ​គ្មាន​បណ្ណ​​កា​រ​​​ងារ និងខ្លះទៀត​អត់ទាំងអស់តែម្តង ដែលការណ៍នេះ ជនបរទេស​ទាំងនោះ​ត្រូវ​បាន​ប​ណ្តេញចេញ ឬដាក់ក្នុងបញ្ជីខ្មៅ។

លោកថា៖ «ពីម្សិលម៉្ងៃ [ថ្ងៃទី២៥ ខែតុលា] ខ្ញុំឱ្យទៅឆែក​ទីតាំង​មួយ​កន្លែង​នៅបាវិត គេហៅ​ ម៉ុក​បាយ គ្រាន់​តែ​ទៅ​មួយ​ឆាច់​​ ឃើ​​ញ​​ជនជាតិវៀតណាមជិត៣០០នាក់អត់​មាន​ទិដ្ឋាការ អត់​មាន​ប៉ាស្ព័រ [លិខិត​ឆ្លងដែន] ចូល​ស្រុក​ខ្មែរ​ទេ​។ ​អា​​​ហ្នឹ​​ងស្រួលដោះ​ស្រាយ ដោះស្រាយ​​យ៉ា​ងម៉េ​ច? ​គឺ​ថា​​ធ្វើប​ញ្ជីហើយ​ យើ​​ងធ្វើ​ប្រកាស​​ប​ណ្តេញចេញ ​ដោយដាក់ជា​បញ្ជី​​​ខ្មៅហាមឃា​ត់ចូ​លស្រុក​ខ្មែរប៉ុន្មាន​ឆ្នាំ។ អាង​ហ្នឹង​ស្រួ​ល​ដោះស្រាយ»។​

លោកបានគូសបញ្ជាក់បន្ថែមថា៖ «ព្រោះអាហ្នឹង វាជាបេសកកម្មរបស់យើងដែលច្បាប់បានចែង អ៊ីចឹងយើងត្រួតពិនិត្យពលករបរទេសមកធ្វើការត្រឹមត្រូវ ឬមិនត្រឹមត្រូវ ត្រង់អ្នកឯងមានអាជ្ញាបណ្ណ ឬគ្មាន​ពេលហ្នឹង ​រក​ឃើញ​ហើយ ​តាម​ជាក់​ស្តែង​របស់​គេហ្នឹង​ទៅ ព្រោះបើយើងមិនសម្អាត​អ៊ីចឹង ​មិន​បាន​ទេ វាបាត់បង់ចំណូលរបស់រដ្ឋ ព្រោះបណ្ណការងារ បើបណ្ណការងារ វាត្រូវបង់ចំណាយថវិការដ្ឋ ចុះបើមនុស្សរាប់ពាន់រាប់ម៉ឺនអត់មានបណ្ណការងារ វាមិនងាប់ហើយ!»

បញ្ហានេះ លោកគូស​បញ្ជាក់​ថា លោក​កំពុងសហការជាមួយរដ្ឋមន្ត្រីក្រសួងការងារ និងបណ្តុះបណ្តាលវិជ្ជាជីវៈ លោក អ៊ិត សំហេង ដើម្បីបង្កើតវិធានការច្បាប់ និងបង្កើនការផាកពិន័យ​ក្នុងកម្រិត​ធ្ងន់​ធ្ងរ ទាំង​ជន​បរទេ​​ស​ ទាំងភាគីក្រុមហ៊ុន​ដែលផ្តល់ការងារឱ្យជនបរទេសខុសច្បាប់ទាំង​នោះ។

លោក ស ខេង ធ្លាប់បង្ហាញ​ជំហរក្នុងការ​​ស្វែងរកអ្នកពាក់ព័ន្ធនៅពីក្រោយបទឧក្រិដ្ឋនានា រួមទាំងពង្រឹងការគ្រប់គ្រងជនអន្តោប្រវេសន៍ ដើម្បីស្តារមុខមាត់កម្ពុជា ក្រោយពីសហរដ្ឋអាមេរិកដាក់ប្រទេសកម្ពុជាក្នុងបញ្ជីខ្មៅ​នៃការជួញដូរមនុស្ស​របស់​ខ្លួន កាលពីថ្ងៃទី១៩ ខែកក្កដា ឆ្នាំ២០២២។

ការទម្លាក់ចំណាត់ថ្នាក់នេះ អាមេរិក​រកឃើញ​ថា ​​​កា​​រ​ជួញ​ដូរ​​ជ​នបរទេស​​​​​ចូល​​មក​​​​ប្រ​​ទេ​​ស​​​កម្ពុជា​​កំពុ​​​ង​​​​មាន​ការ​​​កើ​​ន​ឡើង រួមទាំង​ការ​រំលោភ​​​បំ​ពាន​​ក្នុងវិស័យការងា​រ ហើយ​​ម​ន្ត្រី​​​​​មួ​​យ​​ចំនួនបាន​​ស​ម​​​​គំនិត​​​ក្នុង​​​ប្រតិ​​ប​ត្តិ​ការឆបោក​តាម​ប្រព័​ន្ធ​អ៊ីន​ធឺ​ណិ​ត។ បញ្ហានេះ​​ អាមេរិក​ក៏​បា​ន​អំ​ពាវ​នា​វ​​ឱ្យរដ្ឋាភិបាល​​​កម្ពុជាបង្កើន​​កិច្ច​ខិត​​ខំ​ប្រឹ​ង​ប្រែ​ង​​​​​ក្នុងការ​​​​អនុវត្ត​ច្បាប់ ប្រឆាំ​ង​​នឹ​ង​ប​ទ​ឧក្រិដ្ឋ​ទាំងនោះ​​ រួ​មទាំង​​ប្រឆាំ​ង​​​ម​​ន្ត្រី​​​ដែ​ល​សម​​គំនិ​ត​ និងឧក្រិ​ដ្ឋកម្ម​ជួញដូ​រដែលពា​ក់ព័ន្ធ។

ស្នងការនគរបាល​​ខេត្ត​ស្វាយ​រៀង លោក ពេជ្រ វីរៈ នៅថ្ងៃសុក្រនេះ បានឱ្យដឹងតាមបណ្តាញសង្គមតេឡេក្រាម​ថា ស​មត្ថ​កិច្ចកំពុងអនុវត្តច្បាប់អន្តោប្រវេសន៍ និងច្បាប់ការងារទៅលើជនជាតិវៀតណាម​ដែលធ្វើ​ការដោយខុសច្បាប់​​នៅ​កាស៊ីណូម៉ុកបាយ ក្រោយសមត្ថកិច្ច​បាន​ចុះឆែកឆេរទីតាំងនោះ និងរកឃើញនូ​វបទល្មើស។​

ប៉ុន្តែនៅពេលសួរថា ក្រោយរដ្ឋមន្ត្រីក្រសួងមហាផ្ទៃទម្លាយរឿងនេះ តើសមត្ថកិច្ចខេត្តនេះមានបានរកឃើ​ញ​ជនបរទេសខុ​សច្បា​ប់ធ្វើការនៅទីតាំងផ្សេងទៀតឬទេ? បញ្ហានេះ លោកឱ្យទាក់ទងទៅក្រុមការងារអន្តរក្រ​សួង​​ដែល VOD មិនអាចទាក់ទងបាន។

នាយកប្រតិបត្តិអង្គការតម្លាភាពកម្ពុជា លោក ប៉ិច ពិសី ស្វាគមន៍​ចំពោះចំ​ណាត់​ការ​របស់​ក្រសួង​មហា​ផ្ទៃ នេះ ដោយសម្អាងថា បើក​ម្ពុជា​គ្រប់​គ្រង​ជនបរទេស​បាន​ល្អ អាច​ទប់ស្កាត់បាន​ទំាង​បទ​ឧក្រិដ្ឋជួញ​ដូរមនុស្ស និង​ទាញបាន​ប្រាក់​ចូល​ថវិកា​ជាតិ​ពីការ​បង់​ពន្ធអាករ។

លោកថា៖ «ព្រោះបច្ចុប្បន្ន មានជនបរទេសច្រើនណាស់ ដែលពួកគាត់ត្រូវបានគេជួញដូរ គេនាំដោយខុស​ច្បាប់ចូល​មក​កម្ពុជា ហើយ​មកធ្វើកិច្ចការ​ជាច្រើន ​ដែល​កិច្ច​ការ​ខ្លះ​ជា​បទ​ឧក្រិដ្ឋ​ទៅ​ទៀត។ បើ​កាលណា​គាត់​មក​ដោយ​ខុស​ច្បាប់​ បាន​ន័យ​ថា គាត់​អត់​នៅ​ក្នុង​ប្រព័ន្ធ​ទិន្នន័យ​ដែល​គាត់​ធ្វើការ​ ដើម្បី​បាន​ប្រាក់បៀវត្ស ​ហើយ​មាន​ការ​បរិច្ចាគ​ផ្នែក​ខាង​បង់​ពន្ធអាករអី​ជូនរដ្ឋទេ ព្រោះគាត់អត់មាន​ឈ្មោះក្នុង​បញ្ជី​ទេ អ៊ីចឹងវា​ជាការខាតបង់ថវិកាជាតិមួយដែរ»។

តែយ៉ាងណា លោក​ ប៉ិច ពិសី បារម្ភថា វិធាននេះនឹង​មិន​ជោគជ័យ​ទេ បើ​ក្រសួង​ខ្វះ​យន្ត​ការ​តាម​ដាន​ការអនុវត្តច្បាប់​របស់មន្ត្រីនៅថ្នាក់ក្រោម រួមទាំងវិធានការវះកាត់មន្ត្រីខិលខូចនោះ។

ដោយឡែក សាស្ត្រាចារ្យវិទ្យាសាស្ត្រនយោបាយ លោក ឯម សុវណ្ណរ៉ា យល់​ថា បញ្ហានេះអាច​មក​ពី​កត្តាធំ​ពីរ ដែល​ទី១​​ គឺអំពើពុករលួយ​បែប​ប្រទាក់​ក្រឡា​គ្នា រវាងមន្ត្រីខិលខូចពីថ្នាក់ក្រោមមកថ្នាក់ជាតិ និងទី២ អាច​មក​ពី​ផល​ប្រយោជន៍​នយោបាយ​ដែរ ដោយសារ​តែ​ជនបរទេសខ្លះ​មាន​កាន់​អត្តសញ្ញាបណ្ណសញ្ជាតិខ្មែរ​ ហើយ​ពួក​គេ​ក៏​បោះឆ្នោត​គាំទ្របក្សនយោបាយ ដែល​លោកថា ចង់មិនចង់ សារ​នេះ​ជាផ្នែក​មួយ​ដើម្បី​បិទបាំង​ផង និ​ង​ក៏ដើម្បីទាក់ទាញសន្លឹកឆ្នោត​បានខ្លះពីពលរដ្ឋខ្មែរផង។

លោកថា៖ «ពលរដ្ឋកម្ពុជារងផលប៉ះពាល់ច្រើនពីជនអន្តោប្រវេសន្ត ពីការបាត់បង់ការងារ ​រត់​ទៅ​ក្រៅ​ប្រ​ទេស​ជា​ដើម ធ្វើឱ្យបក្សកាន់អំណាចហ្នឹង​ក៏ចង់កៀរគររកប្រជាប្រិយភាពដែរ អាហ្នឹងគេហៅថា ដើម្បីរក្សាសន្តិសុខ​ផង ដើម្បីកៀរគរសំឡេងផង»។

តែយ៉ាងណា លោកថា រដ្ឋាភិបាលអាចទប់ស្កាត់លំហូរជនបរទេសខុសច្បាប់នេះបាន បើ​ការអនុវត្តច្បាប់ឈាន​ទៅ​កាត់ផ្តាច់​ឫសគល់​អំពើ​ពុក​រលួយ រួម​ទាំង​មិន​ប្រើ​យន្ត​ការ​ច្បាប់ដើម្បី​បម្រើ​ផល​ប្រយោជន៍នយោ​បាយ​នោះ៕

រក្សាសិទ្វិគ្រប់យ៉ាងដោយ ស៊ីស៊ីអាយអឹម

សូមបញ្ជាក់ថា គ្មានផ្នែកណាមួយនៃអត្ថបទ រូបភាព សំឡេង និងវីដេអូទាំងនេះ អាចត្រូវបានផលិតឡើងវិញក្នុងការបោះពុម្ពផ្សាយ ផ្សព្វផ្សាយ ការសរសេរឡើងវិញ ឬ ការចែកចាយឡើងវិញ ដោយគ្មានការអនុញ្ញាតជាលាយលក្ខណ៍អក្សរឡើយ។
ស៊ីស៊ីអាយអឹម មិនទទួលខុសត្រូវចំពោះការលួចចម្លងនិងចុះផ្សាយបន្តណាមួយ ដែលខុស នាំឲ្យយល់ខុស បន្លំ ក្លែងបន្លំ តាមគ្រប់ទម្រង់និងគ្រប់មធ្យោបាយ។ ជនប្រព្រឹត្តិ និងអ្នកផ្សំគំនិត ត្រូវទទួលខុសត្រូវចំពោះមុខច្បាប់កម្ពុជា និងច្បាប់នានាដែលពាក់ព័ន្ធ។

អត្ថបទទាក់ទង

សូមផ្ដល់មតិយោបល់លើអត្ថបទនេះ