សមត្ថកិច្ចខេត្តកណ្ដាល បានឱ្យដឹងថា អនុប្រធានការិយាល័យនីតិកម្មស្រុកលើកដែក ត្រូវបានចាប់ខ្លួនជាមួយនឹងបុរសម្នាក់ទៀតក្នុងសប្ដាហ៍នេះ ពីបទ «បង្ខាំង និងរំលោភសេពសន្ថវៈ» លើកុមារីម្នាក់អាយុ១៤ឆ្នាំ នៅផ្ទះសំណាក់។
មេប៉ុស្តិ៍នគរបាលរដ្ឋបាលឃុំកំពង់ភ្នំ លោក តុង ទីន មានប្រសាសន៍ថា ជនសង្ស័យឈ្មោះ ម៉ម សិលា ដែលមានតួនាទីជាអនុប្រធានការិយាល័យនីតិកម្មស្រុកលើកដែក ទទួលបន្ទុកដោះស្រាយវិវាទ ត្រូវបានចាប់ខ្លួនកាលពីថ្ងៃទី២៥ ខែតុលា ឆ្នាំ២០២២ នៅភូមិអំពិល ឃុំកំពង់ភ្នំ ស្រុកលើកដែក ខេត្តកណ្តាល។
លោក តុង ទីន បានបន្តថា ឈ្មោះ ម៉ម សិលា អាយុ៣៥ឆ្នាំ និង អ៊ុក ទឹង អាយុ៣៦ឆ្នាំ ត្រូវបានចោទប្រកាន់ពីបទ «បង្ខាំង និងរំលោភសេពសន្ថវៈ» លើកុមារីម្នាក់អាយុ១៤ឆ្នាំជាច្រើនដង។
លោកបន្ថែមថា កាលពីថ្ងៃទី៧ ខែតុលា ឆ្នាំ២០២២ បុរសម្នាក់ទៀតជាជនទី៣ ដែលមិនត្រូវបានចាប់ខ្លួន បានហៅកុមារីរងគ្រោះទៅញ៉ាំបាយជាមួយឈ្មោះ ម៉ម សិលា និងបានឱ្យកុមារីរងគ្រោះផឹកស្រារហូតដល់ស្រវឹង មុនពេលនាំកុមារីរងគ្រោះទៅផ្ទះដើម្បីរំលោភ។
លោកបន្ថែមថា ប្រហែល៣ថ្ងៃក្រោយមក បក្ខពួកជនសង្ស័យបានប្រើវិធីសាស្រ្តដដែល ដើម្បីលួងលោមកុមារីរងគ្រោះយកទៅរំលោភម្តងទៀត ប៉ុន្តែនាងបានពួននៅក្រោមសាឡុង ពួកគេក៏យកនាងទៅផ្ទះវិញ។
មួយសប្តាហ៍ក្រោយមក ឈ្មោះ ម៉ម សិលា បាននាំកុមារីរងគ្រោះទៅផ្ទះសំណាក់ម្តងទៀត។ លើកនេះ ជនសង្ស័យ ឈ្មោះ អ៊ុក ទឹង បានរំលោភកុមារីរងគ្រោះ។
លោក តុង ទីន បន្ថែមថា៖ «យើងអញ្ជើញជនសង្ស័យឱ្យមកញ៉ាំអី ហើយយើងចាប់ខ្លួនពួកគេ។ យើងសហការជាមួយនគរបាលស្រុក ដើម្បីចាប់ខ្លួនពួកគេ»។
លោកបន្តថា ឥលូវនេះ នគរបាលស្រុកកំពុងពិនិត្យមើលករណីនេះ។
វីអូឌី មិនអាចទាក់ទងអធិការនគរបាលស្រុកលើកដែក លោក អាំ ធូ សុំការអធិប្បាយបានទេ ខណៈលោក ឯក ស៊ុនរស្មី អ្នកនាំពាក្យអយ្យការអមសាលាដំបូងខេត្តកណ្តាល បានបញ្ជាក់ថាមានករណីនេះកើតឡើងពិតប្រាកដមែន ប៉ុន្តែលោកថា ករណីនេះស្ថិតក្នុងដៃសមត្ថកិច្ចនៅឡើយ៕
បកប្រែនិងសម្រួលចេញពីអត្ថបទដើមភាសាអង់គ្លេស៖ Kandal District Official Arrested for Alleged Child Rape
