សមាជិក​ក្រុម​ប្រឹក្សា​ឃុំ-​សង្កាត់​បក្ស​ភ្លើង​ទៀន​ហៅ​ការ​បន្ត​បង្ខំ​ឱ្យ​​​ផ្តិត​មេ​ដៃ​ថ្កោល​ទោស​ ​លោក​ ​សម​ ​រង្ស៊ី​ ជា​ការ​គំរាម​ផ្នែក​នយោបាយ​

គណបក្សភ្លើងទៀន ធ្វើការហែក្បួនឃោសនាបក្សបម្រើឱ្យការបោះឆ្នោតក្រុមប្រឹក្សាឃុំសង្កាត់ នៅរាជធានីភ្នំពេញ ថ្ងៃទី២១ ខែឧសភា ឆ្នាំ២០២២។ (ហ៊ាន រង្សី)

សមាជិកក្រុមប្រឹក្សាឃុំ-សង្កាត់ មកពីគណបក្សភ្លើងទៀនតាមបណ្ដាខេត្តមួយចំនួនបានហៅការបង្ខិតបង្ខំឱ្យពួកគេផ្តិតមេដៃលើញត្តិថ្កោលទោស លោក សម រង្ស៊ី ថាជាការគំរាមកំហែងផ្នែកនយោបាយ ហើយពួកគេក៏ស្នើទៅអាជ្ញាធរទាំងអស់ឱ្យបញ្ឈប់សកម្មភាពទាំងនេះបន្តទៀត ដោយថា ថ្នាក់ដឹកនាំពួកគេក៏បានចេញញត្តិបញ្ជាក់រួចហើយលើបញ្ហានេះ។

កាលពីថ្ងៃទី២៨ ខែតុលា ឆ្នាំ២០២២ គណបក្សភ្លើងទៀនបានចេញសេចក្ដីថ្លែងការណ៍មួយ ដោយ អំពាវនាវដល់អាជ្ញាធរបញ្ឈប់សកម្មភាពគំរាមកំហែង និងបង្ខិតបង្ខំឱ្យសមាជិក-សមាជិកាក្រុមប្រឹក្សាឃុំ-សង្កាត់របស់ខ្លួន ឱ្យចូលរួមអនុម័ត និងចុះហត្ថលេខាលើញត្តិដែលរៀបចំដោយអាជ្ញាធរ ដើម្បីថ្កោលទោសចំពោះបុគ្គលទាំងឡាយណាដែលមានចេតនាប្រមាថអង្គព្រះមហាក្សត្រ។

ជំបន់ទី២ ភូមិប្រាសាទ ឃុំព្រែកស្លែង ស្រុកកណ្ដាលស្ទឹង ខេត្តកណ្ដាល អ្នកស្រី អឿង សារី ប្រាប់វីអូឌីនៅថ្ងៃសៅរ៍នេះថា អ្នកស្រីនិងអ្នកផ្សេងទៀតដែលជាសមាជិកក្រុមប្រឹក្សាឃុំ-សង្កាត់មកពីគណបក្សភ្លើងទៀនត្រូវអភិបាលស្រុកកណ្ដាលស្ទឹង ​បានហៅពួកគាត់ឱ្យទៅផ្ដិតមេដៃលើញត្តិថ្កោលទោសលោក សម រង្ស៊ី បន្ថែមទៀត។

អ្នកស្រី បន្តថា ទោះបីពួកគាត់មិនព្រមផ្ដិតមេដៃលើញត្តិក្ដី ប៉ុន្តែអាជ្ញាធរស្រុក និងឃុំនៅតែបន្តគំរាមកំហែង និងបង្ខិតបង្ខំ​ពួកគាត់ម្ដងហើយម្ដងទៀត​។

អ្នកស្រីបន្តថា៖«ខ្ញុំបានយកសេចក្ដីថ្លែងការណ៍រួចយកដាក់ ប៉ុន្តែគេថាអានឹងជារឿងរបស់បក្សទេ​ ព្រោះយើងជាមន្ត្រីរាជការក្នុងជួរដ្ឋាភិបាល ត្រូវតែធ្វើតាម ជួរតាមរដ្ឋបាលមន្ត្រីរាជការ ប្រើពាក្យដល់បើយើងមិនផ្ដិត មិនអី ​វាពាក់ព័ន្ធនឹងការផុយស្រួយ គេអនុវត្តច្បាប់ទៅផ្នែកខាងមុខ​ ពាក់ព័ន្ធនឹងការងារអ្វីក៏គេមិនធានាមិនដឹងអីចឹង ​វាមិនដឹងថា ម៉េចគេអនុវត្តផ្លូវច្បាប់ទៅ វាលក្ខណៈនិយាយមកដូចគំរាមអ៊ីចឹង ​។ និយាយដាក់បន្ទុកដល់គ្រួសារចេះចុះ​​សួរដល់គ្រួសារយើង​ក៏នៅនឹងអីនឹង។ ​អ៊ីចឹងយើងគួរគិតមើលតួនាទីយើង ​ប្រាក់អីនឹងចង់ឱ្យបាត់បង់មែន»។

អ្នកស្រី អឿង សារី  បន្តថា បើសិនបុគ្គលណាប្រមាថព្រះមហាក្សត្រអ្នកស្រីលើទឹកចិត្តឱ្យអាជ្ញាធរ និងរដ្ឋាភិបាលអនុវត្តទៅតាមច្បាប់ដែលមានចែងក្នុងរដ្ឋធម្មនុញ្ញ មិនគួរមកគំរាមកំហែង ​ ព្រមទាំងដាក់សម្ពាធលើពួកគាត់ឱ្យផ្ដិតមេដៃបែបនេះទេ។  អ្នកស្រីបង្ហាញក្ដីបារម្ភ ប្រសិនជាអាជ្ញាធរទៅតែបន្តធ្វើសកម្មភាពគំរាមកំហែងបែបនេះ វានឹងប៉ះពាល់ដល់សតិអារម្មណ៍ដែលធ្វើឱ្យឃើញមានរូបភាពកាន់តែអាក្រក់។

អ្នកស្រីបន្តថា៖«មានការកោះប្រជុំបន្ទាន់ នៅពេលយើងមិនទៅត្រូវដាក់លិខិត ដល់ដាក់លិខិតហើយ យើងអត់មានមេឃុំ តេហៅ ​ជជែកគាប់សង្កត់យើងមែនទែន ​។ ខ្ញុំមិនអាចទទួលយកបានត្រង់ថា​​ បើសិនជាហៅទៅរៀនដើរតួនាទីបម្រើប្រជាពលរដ្ឋ​ហៅប៉ុណ្ណឹង  ក្រុមប្រឹក្សាទៅរៀនហើយយកមកបម្រើប្រជាពលរដ្ឋល្អហើយ ប៉ុន្តែនេះជារឿងញត្តិសោះបែរជាគាត់យកចិត្តទុកដាក់ណាស់»។

ជំទប់ទី២ ឃុំដា ស្រុកមេមត់ ខេត្តត្បូងឃ្មុំ លោក ​សន មាង លើកឡើងថា មេឃុំបានហៅពួកគាត់ទាំង ៤នាក់ដែលសមាជិកក្រុមប្រឹក្សាមកពីគណបក្សភ្លើងទៀនឱ្យផ្ដិតមេដៃលើញត្តិថ្កោលទោសលោក សម រង្ស៊ី  ប៉ុន្តែពួកគាត់បដិសេធ ដោយយល់ថា ថ្នាក់ដឹកនាំគណបក្សភ្លើងទៀនបានសេចក្ដីថ្លែងការណ៍រួចហើយ។

លោកចាត់ទុកការសកម្មភាពទាំងអស់នេះ ជារូបភាពគំរាមកំហែងផ្នែកនយោបាយ ដោយថា ប្រជាពលរដ្ឋមានសិទ្ធិ សម្រេចចិត្ត ក្នុងការធ្វើអ្វីមួយបាន ឬមិនធ្វើបាន ដោយគ្មានការបង្ខិតបង្ខំ​និងគំរាមកំហែងឡើយ។

លោកស្នើទៅអាជ្ញាធរ និងរដ្ឋាភិបាលបញ្ឈប់សកម្មភាពបង្ខិតបង្ខំ និងកៀរគរសមាជិកក្រុមប្រឹក្សាឃុំ-សង្កាត់មកពីគណបក្សភ្លើងទៀនទៅគាំទ្រ ឬចុះចូលជាមួយបក្សផ្សេងទៀត ដែលធ្វើឡើងផ្ទុយពីគោលការណ៍សិទ្ធិនយោបាយ និងលទ្ធិប្រជាធិបតេយ្យ។

លោកថា៖«សំណូមពរឱ្យអាជ្ញាធរក៏ដូចជារាជរដ្ឋាភិបាលឈប់ការបង្ខិតបង្ខំ ឬការកៀរគរអីឱ្យសមាជិក-សមាជិកាអីគាំទ្រអ្នកណាផ្សេងទៀត ព្រោះអីរក្សាសិទ្ធិ ក្នុងការបញ្ចេញមតិ និងការគោរពសិទ្ធិមនុស្ស ក្នុងរបបប្រជាធិបតេយ្យ។ មានការព្រួយបារម្ភខ្លះដែរ ពេលខ្លះអាជ្ញាធរដូចជាយប់ថ្ងៃទី២៦ ខែតុលានេះ គាត់ហៅទាំងយប់តែម្ដង ដល់យើងអត់បានទៅ គេថាយើងអត់បានគោរពគេ ប៉ុន្តែ​គេអត់ដឹងផុតម៉ោងរដ្ឋបាល »។

អ្នកនាំពាក្យគណបក្សប្រជាជនកម្ពុជា លោក សុខ ឥសាន មានប្រសាសន៍ថា ​ការប្រមាថព្រះមហាក្សត្រដែលតំណាងឱ្យជាតិនេះ បានធ្វើឱ្យប៉ះពាល់ដល់ប្រទេសជាតិទាំងមូល  ទោះបីជាថ្នាក់ដឹកនាំបក្សភ្លើងទៀនបានចេញសេចក្ដីថ្លែងការណ៍រួមក៏ពិតមែន។ លោកថា សមាជិក-សមាជិកាក្រុមប្រឹក្សាឃុំ-សង្កាត់បក្សក្រៅរដ្ឋាភិបាលនេះ ​គប្បីត្រូវផ្ដិតមេដៃគាំទ្រដែរ ​ប៉ុន្តែបើមិនគាំទ្រទេ វាបង្ហាញឱ្យឃើញថា បក្ស​នេះកំពុងបែកបាក់ដោយសារមេនិងកូនចៅដើរផ្ទុយគ្នា។

លោកបន្តថា​ ​ក្រុមប្រឹក្សាឃុំ-សង្កាត់ណាក៏ដោយ ឱ្យតែចូលកាន់តួនាទីមន្ត្រីរាជការនោះ  វាជាបុគ្គលិករដ្ឋដែលដឹកនាំដោយរដ្ឋាភិបាល។ ដូច្នេះ លោកថា រដ្ឋាភិបាល​ដែលជាកូនចៅព្រះមហាក្សត្រត្រូវការពារព្រះអង្គ។

លោកលើកឡើងថា៖«កុំចោទប្រកាន់គេថា គេគាបសង្កត់ អត់មានអ្នកណាគាបសង្កត់ទេ ព្រោះអានេះ វាជាកាតព្វកិច្ច​និងករណីកិច្ចរបស់ខ្លួនឯង ត្រូវតែការពារជាតិ  មិនមែនតែកាពារតែព្រះមហាក្សត្រទេ  ការពារព្រះមហាក្សត្រ មានន័យថាការពារជាតិហ្នឹង ព្រោះព្រះមហាក្សត្រតំណាងឱ្យជាតិ។ ការពារខ្លួនឯង ការពារអាយុជីវិតខ្លួនកុំឱ្យមានការប្រមាថទៀត។  អាហ្នឹងវាជាការត្រឹមត្រូវ ហើយ​កុំឱ្យប្រកាន់គេថា គេគាបសង្កត់ខ្លួន​ពីព្រោះខ្លួនឯងមិនយល់ពីកាតព្វកិច្ចខ្លួនឯងយើងទៅប្រកែកម៉េច»។

នាយកប្រតិបត្តិ​អង្គការ​​អ្នកឃ្លាំមើលការបោះឆ្នោត​និកហ្វិច លោក សំ គន្ធាមី មានប្រសាសន៍ថា គណបក្សភ្លើងទៀនបានសេចក្ដីថ្លែងការណ៍រួចហើយ។ ដូច្នេះ លោកថា អាជ្ញាធរមិនមានសិទ្ធិបង្ខិតបង្ខំ និងគំរាមកំហែងឱ្យសមាជិក-សមាជិកាក្រុមប្រឹក្សាឃុំសង្កាត់មកពីបក្សភ្លើងទៀននៅតាមមូលដ្ឋានធ្វើអី្វទៅតាមការចង់បានរបស់គណបក្សប្រជាជនកម្ពុជា​នោះទេ។

លោកចាត់ទុកការបង្ខិតបង្ខំ​ទាំងនេះ ថាបានធ្វើឱ្យប៉ះពាល់ដល់សិទ្ធិសេរីភាពបញ្ចេញមតិ ​និងសិទ្ធិនយោបាយដែលមានចែងក្នុងច្បាប់។

លោកថា៖«មានអីត្រូវពាក់ព័ន្ធ ហើយច្បាប់មាត្រាណា ​អត់ផ្ដិតមេដៃ​ប្រឈមនឹងផ្លូវច្បាប់ ព្រោះអីអាហ្នឹងជាសេរីភាពរបស់គេតើ។ ស្នាក់ការកណ្ដាលរបស់គេ ក៏គេបានរៀបចំ ​អស់ហើយគេធ្វើអស់ហើយតើ ព្រោះអី​គេតំណាងគណបក្សមួយទាំងមូលគេធ្វើរួចហើយតើ។ អាហ្នឹងអត់មានទៅគំរាមគេអ៊ីចឹងទេ ប្រឈម ច្បាប់មាត្រាណា ដែល​អត់ផ្ដិតមេដៃសុទ្ធប្រឈមផ្លូវច្បាប់ គណបក្សគេចេញរួម មានអីទៅពាក់ព័ន្ធសមាជិកគេនៅតាម​បណ្ដាឃុំសង្កាត់ ។ អាហ្នឹងវាប៉ះពាល់ដល់ដំណើរការបោះឆ្នោតដែរ ព្រោះអីវាគំរាមកំហែង អាហ្នឹងក៏ជាផ្នែកនយោបាយដែរ ព្រោះអីសម្ដេច ស ខេង ក៏ដោយ ចង់ឱ្យដំណើរការវារលូន កុំឱ្យមានការគំរាមកំហែងគាបសង្កាត់ណា រឿងសិទ្ធិពលរដ្ឋ សិទ្ធិនយោបាយ »។​

កាលពី​​ថ្ងៃទី​២៧ ខែ​តុលា ឆ្នាំ២០២២​នេះ គណបក្ស​ភ្លើង​ទៀន ក៏បានចេញសេចក្តីថ្លែងការណ៍មួយ​ផងដែរ បដិសេធ​ចំពោះការចោទ​​ប្រកាន់​នានាអំពី​ទំនាក់​ទំនង​ជាមួយ​លោក សម រង្ស៊ី និង​​ថ្កោល​​ទោសបុគ្គល​ទាំង​ឡាយ​ណាដែល​មាន​ចេតនា​ប្រមាថ ឬ​រំលោភ​បំពាន​រដ្ឋធម្មនុញ្ញ អង្គ​ព្រះ​ម​ហាក្សត្រ និងរបបរាជានិយមអាស្រ័យរដ្ឋធម្មនុញ្ញ។

ភ្លាមៗក្រោយគណបក្សភ្លើងទៀនចេញសេចក្តីថ្លែងការណ៍នេះ​ លោក ហ៊ុន សែន តាមរយៈទំព័រហ្វេសប៊ុករបស់លោកក៏បានកោតសរសើរ និងថ្លែងអំណរគុណចំពោះថ្នាក់ដឹកនាំគណបក្សក្រៅរដ្ឋាភិបាលមួយនេះ ដែលបានចេញលិខិតថ្កោលទោសអ្នកទាំងឡាយណា​ដែលមានចេតនាប្រមាថព្រះមហាក្សត្រតាមការស្នើសុំរបស់លោក កាលពីថ្ងៃទី២៦ ខែតុលា ឆ្នាំ២០២២៕

រក្សាសិទ្វិគ្រប់យ៉ាងដោយ ស៊ីស៊ីអាយអឹម

សូមបញ្ជាក់ថា គ្មានផ្នែកណាមួយនៃអត្ថបទ រូបភាព សំឡេង និងវីដេអូទាំងនេះ អាចត្រូវបានផលិតឡើងវិញក្នុងការបោះពុម្ពផ្សាយ ផ្សព្វផ្សាយ ការសរសេរឡើងវិញ ឬ ការចែកចាយឡើងវិញ ដោយគ្មានការអនុញ្ញាតជាលាយលក្ខណ៍អក្សរឡើយ។
ស៊ីស៊ីអាយអឹម មិនទទួលខុសត្រូវចំពោះការលួចចម្លងនិងចុះផ្សាយបន្តណាមួយ ដែលខុស នាំឲ្យយល់ខុស បន្លំ ក្លែងបន្លំ តាមគ្រប់ទម្រង់និងគ្រប់មធ្យោបាយ។ ជនប្រព្រឹត្តិ និងអ្នកផ្សំគំនិត ត្រូវទទួលខុសត្រូវចំពោះមុខច្បាប់កម្ពុជា និងច្បាប់នានាដែលពាក់ព័ន្ធ។

អត្ថបទទាក់ទង

សូមផ្ដល់មតិយោបល់លើអត្ថបទនេះ