មន្ត្រីជាន់ខ្ពស់ក្រសួងការងារបានឱ្យដឹងថា យ៉ាងហោចណាស់មានជនបរទេសប្រមាណ ២០នាក់ បានបាត់បង់ជីវិត និងមួយចំនួនទៀតរងរបួស ដោយសារឧបទ្ទវហេតុរត់ជាន់គ្នា នៅសង្កាត់អ៊ីថេវ៉ុន (Itaewon) ប្រទេសកូរ៉េខាងត្បូង កាលពីយប់ថ្ងៃទី២៩ ខែតុលា ប៉ុន្តែមិនមានជនជាតិខ្មែរណាម្នាក់រងគ្រោះក្នុងហេតុការណ៍នោះឡើយ។
ទីភ្នាក់ងារសារព័ត៌មានរ៉យទ័រ(Rueter) បានចុះផ្សាយនៅថ្ងៃអាទិត្យថា ព្រឹត្តិការណ៍រត់ជាន់គ្នានៅកណ្តាលទីក្រុងសេអ៊ូល ប្រទេសកូរ៉េខាងត្បូង នាឱកាសបុណ្យ Halloween កាលពីថ្ងៃទី២៩ ខែតុលា ឆ្នាំ២០២២ បណ្តាលឱ្យមនុស្សប្រមាណ១៥១ នាក់ស្លាប់ ក្នុងនោះមានជនបរទេសចំនួន ១៩នាក់។ ដោយឡែក អ្នករងរបួសវិញ មានចំនួនជិត ១០០នាក់(៨២នាក់) ក្នុងនោះរងរបួសធ្ងន់មានចំនួន១៩នាក់ផងដែរ។
ប្រភពដដែល ក៏បានដកស្រង់ការលើកឡើងនូវសេចក្តីថ្លែងការណ៍មួយរបស់ប្រធានាធិបតីកូរ៉េខាងត្បូង លោក Yoon Suk-yeol ដែលបានប្រកាសរយៈពេលនៃការកាន់ទុក្ខជាតិចំពោះសោកនាដកម្មនេះ។
លោក Yoon បានសម្តែងការរំលែកទុក្ខដល់ជនរងគ្រោះ ដែលភាគច្រើនជាក្មេងជំទង់ និងមនុស្សដែលមានអាយុរង្វង់ ២០ឆ្នាំ ហើយលោកក៏សូមជូនពរឱ្យអ្នករបួសជាច្រើននាក់ឆាប់ជាសះស្បើយឡើងវិញ។
អ្នកនាំពាក្យក្រសួងការងារ និងបណ្តុះបណ្តាលវិជ្ជាជីវៈ លោក ហេង សួរ បានសរសេរសារលើទំព័រហ្វេសប៊ុកផ្លូវការនៅថ្ងៃអាទិត្យ ទី៣០ ខែតុលា ថា កាលពីយប់ថ្ងៃទី២៩ ខែតុលា ឆ្នាំ២០២២ មានឧបទ្ទវហេតុរត់ជាន់គ្នា នៅសង្កាត់អ៊ីថេវ៉ុន (Itaewon) ទីក្រុងសេអ៊ូល ប្រទេសកូរ៉េខាងត្បូង បណ្តាលឱ្យជនបរទេសប្រហែល ២០នាក់ បានបាត់បង់ជីវិត និងមួយចំនួនទៀតរងរបួស ប៉ុន្តែក្នុងសោកនាដកម្មនោះមិនមានជនជាតិខ្មែរឡើយ។ នេះបើគិតត្រឹមម៉ោង១២ ថ្ងៃត្រង់ ម៉ោងនៅប្រទេសកូរ៉េ ដែលត្រូវនឹងម៉ោង ១០ និង៤០នាទីព្រឹក ថ្ងៃអាទិត្យ ម៉ោងនៅកម្ពុជា។
លោកសរសេរថា៖ «យើងក៏ពុំទទួលបានព័ត៌មានណាមួយពាក់ព័ន្ធនឹងបងប្អូនខ្មែរយើង ក្នុងចំណោមអ្នករងរបួសដែរ»។
លោក ហេង សួរ អះអាងប្រាប់វីអូឌីបន្ថែមថា ស្ថានឯកអគ្គរាជទូតកម្ពុជា រួមទាំងអនុព័ន្ធការងារអមស្ថានឯកអគ្គរាជទូតប្រចាំប្រទេសកូរ៉េ កំពុងបន្តទំនាក់ទំនងជាមួយអាជ្ញាធរមានសមត្ថកិច្ចកូរ៉េ និងសហគមន៍ខ្មែរនៅជុំវិញទីក្រុងសេអ៊ូលជាប្រចាំ ដើម្បីតាមដានព័ត៌មានពាក់ព័ន្ធនឹងជនជាតិខ្មែរផងដែរ។
លោកមានប្រសាសន៍ថា៖ «ក្រុមការងារយើងកំពុងធ្វើការងារជាមួយសមត្ថកិច្ចកូរ៉េ ក៏ដូចជាសហគមន៍ខ្មែរយើងនៅប្រទេសកូរ៉េ ដើម្បីពិនិត្យរកព័ត៌មាន ក្រែងមានករណីចៃដន្យណាមួយពាក់ព័ន្ធជាមួយបងប្អូនខ្មែរយើង។ ប៉ុន្តែតាំងពីព្រឹករហូតមកដល់ពេលនេះ យើងមិនទាន់ទទួលបានព័ត៌មានណាមួយដែលពាក់ព័ន្ធជាមួយជនខ្មែរយើងនៅក្នុងឧបទ្ទវហេតុនេះទេ»។
លោកបន្ថែមថា៖ «យើងដឹងថា មានជនជាតិខ្មែរយើងពីរនាក់ គាត់បានទៅកាន់កន្លែងកើតហេតុនេះ មុនពេលដែលឧបទ្ទវហេតុនេះកើតឡើង។ អ៊ីចឹងពួកគាត់សុវត្ថិភាពទេ ហើយដូចខ្ញុំបញ្ជាក់អ៊ីចឹងរហូតមកដល់ម៉ោងនេះ យើងមិនទាន់ទទួលបានព័ត៌មានណាមួយពីសមត្ថកិច្ចកូរ៉េ ឬពីសហគមន៍យើងថា មានជនជាតិខ្មែរយើងស្លាប់ឬរងរបួសក្នុងព្រឹត្តិការណ៍នេះទេ»។
លោក ហេង សួរ បានអំពាវនាវទៅប្រជាពលរដ្ឋខ្មែរដែលនៅក្នុងហេតុការណ៍នោះ ឬពលរដ្ឋដែលដឹងថាមានសាច់ញាតិ និងមិត្តភក្តិនៅក្នុងហេតុការណ៍នោះ ត្រូវទំនាក់ទំនងទៅស្ថានឯកអគ្គរាជទូតកម្ពុជាប្រចាំសាធារណរដ្ឋកូរ៉េ តាមរយៈលេខទូរសព្ទ 010 7510 4324 ឬ 010 8898 8644 ។
នាយកទទួលបន្ទុកកិច្ចការទូទៅនៃអង្គការសិទ្ធិមនុស្សលីកាដូ លោក អំ សំអាត មានប្រសាសន៍ថា ស្ថានឯកអគ្គរាជទូតកម្ពុជា រួមទាំងអនុព័ន្ធការងារអមស្ថានឯកអគ្គរាជទូតប្រចាំប្រទេសកូរ៉េ ត្រូវសហការជាមួយអាជ្ញាធរកូរ៉េ ដើម្បីតាមដានព័ត៌មានពាក់ព័ន្ធនឹងជនជាតិខ្មែរ ដែលរស់នៅ ឬធ្វើដំណើរទៅកាន់តំបន់នោះ បើមានឧបទ្ទវហេតុណាមួយកើតឡើង ត្រូវជួយសង្គ្រោះគាត់ឱ្យបានទាន់ពេលជាដើម។
លោកមានប្រសាសន៍បន្តថា ក្រសួងការងារ និងស្ថានឯកអគ្គរាជទូតកម្ពុជាប្រចាំនៅប្រទេសកូរ៉េ ត្រូវណែនាំ ឬផ្សព្វផ្សាយព័ត៌មានប្រាប់ទៅប្រជាពលរដ្ឋខ្មែរដែលរស់នៅប្រទេសកូរ៉េ កុំធ្វើដំណើរទៅកាន់ តំបន់រត់ជាន់គ្នា នៅសង្កាត់អ៊ីថេវ៉ុន (Itaewon) និងមានការប្រុងប្រយ័ត្នបន្ថែមទៀត ទើបទប់ស្កាត់ ឬបង្ការកុំឱ្យមានហានិភ័យបែបនេះកើតមានឡើងប៉ះពាល់ដល់ជីវិតរបស់ពួកគេ ។
លោកមានប្រសាសន៍ថា៖ «យើងត្រូវណែនាំអំពីសុវត្ថិភាព ទាក់ទងនិងកន្លែងដែលប្រឈមមុខរងគ្រោះផ្សេងៗ ហើយស្ថានទូកម្ពុជានៅប្រទេសកូរ៉េ ត្រូវធ្វើការជាមួយសមត្ថកិច្ចពាក់ព័ន្ធនៃប្រទេសកូរ៉េ ដើម្បីបញ្ជៀសនូវគ្រោះថ្នាក់ដែលកើតឡើងដោយយថាហេតុណាមួយលើពលករខ្មែរនៅទីនោះ»។
ចំណែកនៅកម្ពុជាវិញ លោក អំ សំអាត ផ្តល់ជាអនុសាសន៍ថា នាដូវបុណ្យទានធំៗ ជាពិសេសការប្រារព្ធពិធីបុណ្យអុំទូកនៅតាមបណ្តាខេត្ត និងជាយរាជធានីភ្នំពេញជាដើម អាជ្ញាធរត្រូវណែនាំដល់ប្រជាពលរដ្ឋកុំឱ្យទៅកន្លែងប្រជុំជនដែលមានមនុស្សកុះករច្រើន និងដាក់កម្លាំងសមត្ថកិច្ចពង្រាយ ការពារសន្តិសុខសុវត្ថិភាពជូនប្រជាពលរដ្ឋដែលទៅកំសាន្តនៅទីនោះផងដែរ ដើម្បីកុំឱ្យមានគ្រោះថ្នាក់ផ្សេងៗដែលកើតឡើងដោយយថាហេតុណាមួយ។
លោកមានប្រសាសន៍ថា៖ «នៅកន្លែងមួយៗ សមត្ថកិច្ចមិនត្រូវឱ្យមានមនុស្សទៅកុះករ ប្រជ្រៀតគ្នាច្រើនពេកទេ គួរតែរៀបចំសន្តិសុខឱ្យបានច្បាស់លាស់ ដើម្បីធានាកុំឱ្យមានឧបទ្ទវហេតុរត់ជាន់គ្នាបណ្តាលឱ្យមនុស្សស្លាប់និងរងរបួសកើតឡើងដូចនៅកោះពេជ្រ និងនៅប្រទេសកូរ៉េ»។
ទាក់ទិននឹងឧបទ្ទវហេតុរត់ជាន់គ្នានេះដែរ ករណីបែបនេះក៏បានកើតឡើងនៅប្រទេសកម្ពុជា នារាត្រីចុងក្រោយ នៃព្រះរាជពិធីបុណ្យអុំទូក បណ្តែតប្រទីប អកអំបុក និងសំពះព្រះខែ កាលពីថ្ងៃទី២២ ខែវិច្ឆិកា ឆ្នាំ២០១០។ ឧបទ្ទវហេតុរត់ជាន់គ្នា នៅលើស្ពានកោះពេជ្រ ក្នុងប្រទេសកម្ពុជាពេលនោះ បណ្តាលឱ្យមនុស្សចំនួន ៣៥៣នាក់ស្លាប់ និងជាង៤០០នាក់ទៀតរងរបួស។
យ៉ាងណា ហេតុការណ៍អាក្រក់នាពេលនោះ មិនមាននរណាម្នាក់ចេញមុខទទួលខុសត្រូវឡើយ ក្រៅពីការផ្តល់ថវិកាមួយចំនួនដល់ជនរងគ្រោះដែលស្លាប់ និងរបួសពេលនោះពីសំណាក់រាជរដ្ឋាភិបាលតែប៉ុណ្ណោះ។ ទីតាំងស្ពានពេជ្រដែលមនុស្សម្នារត់ជាន់គ្នាពេលនោះ ក៏ត្រូវបានវាយកម្ទេចចោល ក្រោយមកក៏បានសាងសង់ស្ពានថ្មថ្មីធំជាងមុនជំនួសវិញ ខណៈស្តូបសម្រាប់គោរពវិញ្ញាណក្ខន្ធជនរងគ្រោះក៏ត្រូវបានសាងសង់ឡើងនៅខាងលិចក្បែរក្បាលស្ពានថ្មថ្មីនោះដែរ៕