ចំនួនអ្នកស្លាប់ដោយសារការបាក់ស្ពាននៅរដ្ឋហ្គូចារ៉ាត់ (Gujarat) ក្នុងប្រទេសឥណ្ឌា បានកើនឡើងដល់ ១៣៤នាក់។ នេះបើតាមមន្ត្រីរដ្ឋាភិបាលក្នុងតំបន់បានប្រាប់ ទីភ្នាក់ងារសារព័ត៌មាន Reuters នៅថ្ងៃចន្ទនេះ។
ស្ពានថ្មើរជើងឆ្លងកាត់ទន្លេម៉ាឈូ (Machhu) ក្នុងទីក្រុងម៉ប៊ី (Morbi) មានមនុស្សជាច្រើន ទៅលេងក្នុងពិធីបុណ្យ Diwali និងបុណ្យ Chhath Puja នៅពេលដែលវាបាក់កាលពីថ្ងៃអាទិត្យ ដែលធ្វើឱ្យមនុស្សជាច្រើនអ្នកធ្លាក់ចូលទៅក្នុងទន្លេ។
មន្ត្រីជាន់ខ្ពស់ឥណ្ឌា លោក NK Muchhar បាននិយាយថា៖ «ចំនួនអ្នកស្លាប់នៅក្នុងឧបទ្ទវហេតុបាក់ស្ពាន បានកើនឡើងដល់ ១៣៤នាក់។ ប្រតិបត្តិការស្វែងរក និងជួយសង្គ្រោះកំពុងបន្ត»។
លោកបន្ថែមថា ចំនួនអ្នកស្លាប់អាចកើនឡើងបន្ថែមទៀត ខណៈកងកម្លាំងប្រដាប់អាវុធ រួមជាមួយនឹងក្រុមការងារគ្រប់គ្រងគ្រោះមហន្តរាយ និងសង្គ្រោះបន្ទាន់ជាតិមកពីស្រុកនៅក្បែរនោះ ត្រូវបានដាក់ពង្រាយ ដើម្បីរុករកអ្នកបាត់ខ្លួន និងជួយក្នុងប្រតិបត្តិការជួយសង្គ្រោះ។
អាជ្ញាធរ បាននិយាយថា មនុស្សជាង ៤០០នាក់ បាននៅលើស្ពាននេះនៅពេលដែលវាបាក់។ ស្ពាននេះបានទាក់ទាញភ្ញៀវទេសចរជាច្រើនឱ្យមកលេងក្នុងពិធីបុណ្យ Diwali និងពិធីបុណ្យ Chhath Puja។
ក្រុមការងារមួយត្រូវបានចាត់តាំងឱ្យធ្វើការស៊ើបអង្កេតលើគ្រោះមហន្តរាយនេះ។
គួរបញ្ជាក់ថា ស្ពានដែលបានបាក់នេះមានប្រវែង ២៣០ម៉ែត្រ ត្រូវបានសាងសង់ក្នុងសម័យអាណានិគមអង់គ្លេស ក្នុងសតវត្សរ៍ទី១៩។ ស្ពាននេះត្រូវបានបិទដើម្បីជួសជុលរយៈពេល៦ខែ និងត្រូវបានបើកដំណើរការឡើងវិញកាលពីប៉ុន្មានថ្ងៃមុននេះ៕