ចៅសង្កាត់រងទី២ នៅសង្កាត់អូរចារ ខេត្តបាត់ដំបង មកពីគណបក្សភ្លើងទៀន អ្នកស្រី ស៊ិន ចាន់ពៅរ៉ូហ្សិត បានឱ្យដឹងថា ខ្លួនបានដាក់ពាក្យបណ្ដឹងទៅកាន់នគរបាលយុត្តិធម៌ ប្រឆាំងនឹងសមាជិកក្រុមប្រឹក្សាសង្កាត់ជាប់ឆ្នោតមកពីគណបក្សប្រជាជនមួយរូបដែលបានប្រើហិង្សាលើអ្នកស្រី បន្ទាប់ពីទាស់ពាក្យសម្ដីគ្នារឿងការងារ។
យោងតាមវីដេអូផ្សាយផ្ទាល់មួយនៅលើបណ្ដាញសង្គមហ្វេសបុក (Facebook) របស់ចៅសង្កាត់រងទី២ខាងលើ ដែលថតចេញពីសាលាសង្កាត់អូរចារ កាលពីថ្ងៃទី២៦ ខែតុលា សប្ដាហ៍មុន ក្នុងនោះ គេសង្កេតឃើញថា ជម្លោះមួយនេះបានកើតឡើង ខណៈសមាជិកក្រុមប្រឹក្សាសង្កាត់ជាប់ឆ្នោតមកពីគណបក្សប្រជាជន អ្នកស្រី យាន រ៉ាស៊ី បានធ្វើសកម្មភាពឆក់យកទូរសព្ទពីដៃ និងខ្ទប់មុខអ្នកស្រី រ៉ូហ្សិត ក្នុងចេតនារារាំងអ្នកស្រីកុំឱ្យថតផ្សាយវីដេអូ។
ទាក់ទិននឹងករណីនេះ ចៅសង្កាត់អូរចារ លោក ឯម សុផល បានលើកឡើងថា ការទាស់ពាក្យសម្ដីគ្នានេះកើតឡើងបន្ទាប់ពីអ្នកស្រី យាន រ៉ាស៊ី បានស្នើឱ្យភ្នាក់ងារសង្កេតការណ៍បោះឆ្នោតមកពីគណបក្សភ្លើងទៀន ធ្វើជាសាក្សីសម្រាប់ប្រជាពលរដ្ឋមួយរូបដែលសុំធ្វើសំបុត្រកំណើត។
លោកបន្តថា អ្នកស្រី ស៊ិន ចាន់ពៅរ៉ូហ្សិត នៅថ្ងៃបន្ទាប់ ក៏ស្រាប់តែមកកាន់សាលាសង្កាត់ ដើម្បីជំទាស់នឹងសំណើនេះ ដែលនាំឱ្យមានជាការប៉ះទង្គិចគ្នាតែម្ដង។
ដោយបដិសេធថាករណីនេះមិនបានបង្កជាអំពើហិង្សាអ្វីធ្ងន់ធ្ងរ លោក ឯម សុផល បន្ថែមថា៖ «ដូចយើងដឹងស្រាប់ហើយអំពីអាកប្បកិរិយារបស់គាត់ [អ្នកស្រី ស៊ិន ចាន់ពៅរ៉ូហ្សិត] បើថាមិនបានបញ្ចេញកំហឹង គឺគាត់និយាយមិនចេញនោះទេ។ គាត់មិនគួរស្រែកខ្លាំងៗ ហើយវាយតុបែបនេះឡើយ។ វាជារឿងដ៏គួរឱ្យអាម៉ាស់»។
ទោះជាយ៉ាងណា អ្នកស្រី ស៊ិន ចាន់ពៅរ៉ូហ្សិត បានឱ្យដឹងនៅក្នុងវីដេអូមួយផ្សេងទៀតថា ប្រជាពលរដ្ឋដែលស្នើសុំធ្វើសំបុត្រកំណើតនោះ គឺជាស្ត្រីចំណាស់មួយរូបដែលត្រូវបានស្គាល់ថាជាអ្នកដែលមានសតិមិនប្រក្រតី ខណៈមន្ត្រីសង្កាត់មិនគួរយកករណីបែបនេះមកលេងសើចលើស្ត្រីរូបនោះ និងភ្នាក់ងារសង្កេតការណ៍បោះឆ្នោតមកពីបក្សភ្លើងទៀននោះទេ។
អ្នកស្រីថា៖ «ខ្ញុំបានប្រាប់គាត់ថា នេះមិនមែនជារឿងលេងសើចនោះទេ។ អ្នកអាចលេងសើចបែបនេះជាមួយសមាជិករបស់អ្នកបាន ប៉ុន្តែមិនមែនជាមួយសមាជិកគណបក្សភ្លើងទៀន ជាពិសេសជាមួយមនុស្សដែលមានសតិមិនប្រក្រតីបែបនេះ»។
ជាមួយគ្នានេះ អ្នកស្រី ស៊ិន ចាន់ពៅរ៉ូហ្សិត បន្ថែមថា គាត់ក៏បានដាក់ពាក្យបណ្តឹងទៅកាន់នគរបាលយុត្តិធម៌ ទាក់ទងនឹងការប្រើប្រាស់អំពើហិង្សាលើរូបអ្នកស្រីផងដែរ។
នាយនគរបាលប៉ុស្តិ៍រដ្ឋបាលសង្កាត់អូរចារ លោក ប្រាក់ គី បានឱ្យដឹងកាលពីថ្ងៃចន្ទកន្លងទៅថា លោកនៅមិនទាន់ទទួលបានពាក្យបណ្ដឹងរបស់អ្នកស្រី រ៉ូហ្សិត នេះនៅឡើយទេ ខណៈលោកក៏មិនដឹងថាតើអ្នកស្រីដាក់ពាក្យបណ្ដឹងនេះទៅកាន់អាជ្ញាធរខាងណាមួយនោះដែរ៕
បកប្រែនិងសម្រួលចេញពីអត្ថបទដើមភាសាអង់គ្លេស៖ Sin Rozeth Clashes with Ruling Party at Battambang Commune Council