យុវជននៅតែបន្តព្រួយបារម្ភចំពោះស្ថាប័នព័ត៌មាននៅកម្ពុជាមួយចំនួនមិនបានប្រកាន់នូវគោលការណ៍វិជ្ជាជីវៈ ដែលធ្វើឱ្យប៉ះពាល់ដល់សង្គមតាមរយៈការផ្សាយព័ត៌មានមិនពិត ខណៈដែលស្ថាប័នព័ត៌មានអនឡាញមួយចំនួនទៀតបន្តផ្សាយព័ត៌មានដែលគ្មានក្រមសីលធម៌ត្រឹមត្រូវ។
និសិ្សតឆ្នាំទី៣ នៅដេប៉ាតឺម៉ង់ប្រព័ន្ធផ្សព្វផ្សាយ និងសារគមនាគមន៍ កញ្ញា ចាន់ រតនាវត្តី យល់ឃើញថា វិស័យព័ត៌មានបច្ចុប្បន្ន គឺស្ថិតនៅស្ថានភាពមួយមិនសូវល្អ ដោយកញ្ញាឃើញនូវចំណុចខ្វះខាតមួយចំនួនសម្រាប់អ្នកសារព័ត៌មានខ្លះ ដោយសារពួកគាត់រាយការណ៍ព័ត៌មានប្រាសចាកនឹងក្រមសីលធម៌ ហើយមិនបានឆ្លងកាត់ការបណ្ដុះបណ្ដាលត្រឹមត្រូវ។
កញ្ញាឱ្យដឹងថា៖ «ខ្ញុំឃើញថា អ្នកសារព័ត៌មានដែលមិនគោរពក្រមសីលធម៌នៅតាមបណ្តាញសង្គម រឹតតែបន្តកើនឡើង ជាហេតុធ្វើឱ្យខ្ញុំនៅតែមានក្តីបារម្ភចំពោះអ្នកទទួលបានព័ត៌មាន ដោយភាគច្រើនពួកគាត់ផ្អែកទៅលើបណ្តាញសង្គម។ ដូច្នេះ វានៅតែជាបញ្ហា។»
និស្សិតរូបនេះបន្តថា សេរីភាពអ្នកសារព័ត៌មាននៅតែមានបញ្ហាប្រឈមមួយចំនួនផងដែរ ជាពិសេសអ្នកដែលហ៊ានរាយការណ៍រឿងរសើប ដូចករណីរឿងនយោបាយ អំពុករលួយ និងបញ្ហាដីធ្លី ជាដើម។ កញ្ញាចាត់ទុកថា កត្តានេះជាហេតុធ្វើឱ្យអ្នកសារព័ត៌មានពិបាកក្នុងការបំពេញតួនាទីរបស់ខ្លួន។
សេចក្ដីថ្លែងការណ៍របស់មជ្ឈមណ្ឌលសិទ្ធិមនុស្សកម្ពុជា ដែលធ្វើឡើងក្នុងឱកាសទិវាសេរីភាពសារព័ត៌មានពិភពលោក ថ្ងៃទី៣ ខែឧសភា ឆ្នាំ២០២២ បានអះអាងថា នៅកម្ពុជា ប្រព័ន្ធផ្សព្វផ្សាយឯករាជ្យត្រូវបានរងនូវការដៅជាមុខសញ្ញា។ អ្នកសារព័ត៌មានដែលធ្វើការនៅកម្ពុជាតែងតែរងការបំភិតបំភ័យ ឃ្លាំមើល គំរាម និងយាយីតាមប្រព័ន្ធតុលាការ ចំពោះការបំពេញការងារស្របច្បាប់របស់ខ្លួន។
ប្រភពដដែលបន្តថា ចាប់ពីថ្ងៃទី១ ខែកញ្ញា ឆ្នាំ២០២០ ដល់ថ្ងៃទី៣១ ខែសីហា ឆ្នាំ២០២១ មជ្ឈមណ្ឌលសិទ្ធិមនុស្សកម្ពុជា បានកត់ត្រាទុកថា មានអ្នកសារព័ត៌មានយ៉ាងហោចណាស់ចំនួន ៩នាក់ បានប្រឈមនឹងការយាយីតាមប្រព័ន្ធតុលាការ រួមមាន ការគំរាមកំហែង និងការកោះហៅពីតុលាការ រហូតដល់ការចាប់ខ្លួនតាមអំពើចិត្ត និងការផ្ដន្ទាទោសដោយហេតុផលនយោបាយ។
ចំណែកលោក ចាន់ថងន៍ បូរ៉ាមី ស្ថាបត្យករដំណោះស្រាយបច្ចេកវិទ្យា និងជាអ្នកជំនាញផ្នែកព័ត៌មានភូមិសាស្ត្រ បានលើកឡើងថា ការផ្សាយព័ត៌មាននៅតាមបណ្ដាញសង្គមភាគច្រើន គឺធ្វើឡើងដោយមិនស្របតាមវិជ្ជាជីវៈ និងក្រមសីលធម៌ ពោលគឺអ្នកចុះយកពត៌មានមិនបានសិក្សាអង្គហេតុឱ្យបានគ្រប់ជ្រុងជ្រោយ និងមិនសូវគោរពសិទ្ធិបុគ្គលឡើយ។
លោកឱ្យដឹងថា៖ «ខ្ញុំយល់ថា វិស័យព័ត៌មាននៅកម្ពុជានៅមានកម្រិត ជាពិសេសលើវិជ្ជាជីវៈ ក្រមសីលធម៌ និងតម្លាភាព។ ដោយឡែក យើងក៏ឃើញនៅមានភាពអសកម្មជាច្រើនក្នុងវិស័យព័ត៌មាន។ និយាយជារួម វិស័យព័ត៌មានស្ថិតក្នុងស្ថានភាពប្រឈមនឹងបញ្ហាជាច្រើន ដែលទាមទារឱ្យមានការយកចិត្តទុកដាក់ពីក្រសួងនិងអាជ្ញាធរដែលពាក់ព័ន្ធ»។
ឆ្លើយតបរឿងនេះ លោក ក្វាន់ ឆា អ្នកសារព័ត៌មានអនឡាញ ទទួលស្គាល់នូវពាក្យដែលមហាជនរិះគន់ថា អ្នកសារព័ត៌មានអនឡាញមិនបានគោរពទៅតាមវិជ្ជាជីវៈត្រឹមត្រូវ។ ប៉ុន្តែលោកថា ការដែលមិនប្រកបតាមវិជ្ជាជីវៈនេះ វាមិនមែនទាំងអស់នោះទេ។ លើសពីនេះទៀត ក្នុងនាមលោកជាអ្នកសារព័ត៌មានអនឡាញមួយរូប លោកមិនបានប្រព្រឹត្តប្រាសចាកក្រមសីលធម៌នោះឡើយ ហើយក៏មិនចង់ឱ្យអ្នកអាននិងអ្នកស្តាប់ទទួលបាននូវអ្វីដែលមិនពិតនោះដែរ។
លោកបន្តថា៖ «ខ្ញុំគិតថា អ្នកដែលទទួលបាននូវរាល់ព័ត៌មានទាំងអស់ គួរតែពិចារណា និងផ្តល់ជាសំណូមពរ ដើម្បីបញ្ជ្រាបទៅកាន់ក្រសួងពាក់ព័ន្ធ ជាជាងរិះគន់តែមិនមានដំណោះស្រាយ»។
ឆ្លើយតបទៅនឹងបញ្ហានេះ កាលពីថ្ងៃទី២៧ ខែតុលា ឆ្នាំ២០២២ ក្នុងសន្និសីទថ្នាក់ជាតិស្តីពី «ការអភិវឌ្ឍប្រព័ន្ធផ្សព្វផ្សាយ» លោកស្រី ផៃ ចន្ទរិទ្ធីសូលីដា រដ្ខលេខាធិការក្រសួងព័ត៌មាន បានលើកឡើងថា ក្រសួងព័ត៌មានមិនបានទទួលខុសត្រូវនូវរាល់ស្ថាប័នសារព័ត៌មានទាំងអស់នោះទេ។ ក្នុងនោះ លោកស្រីថា ស្ថាប័នដែលក្រសួងព័ត៌មានគ្រប់គ្រង រួមមាន ការផ្សព្វផ្សាយតាមរយៈបណ្តាញទូរទស្សន៍ និងភ្នាក់ងារសារព័ត៌មាន AKP ពោលគឺស្ថាប័នរដ្ឋ។ ដូច្នេះ បុគ្គលដែលតាំងខ្លួនជាអ្នកសារព័ត៌មានតាមបណ្តាញសង្គម ត្រូវមានការទទួលខុសត្រូវដោយខ្លួនឯង។
ដោយឡែក លោក ណុប វី នាយកប្រតិបត្តិសម្ព័ន្ធអ្នកសារព័ត៌មានកម្ពុជា (CamboJa) យល់ឃើញថា សារព័ត៌មានអនឡាញបច្ចុប្បន្ន គឺមានភាពរីកចម្រើន ដោយមានការចាប់អារម្មណ៍ទៅលើវិស័យបច្ចេកវិទ្យាប្រព័ន្ធឌីជីថល។ ប្រភពបន្តថា បើពិនិត្យទៅលើគុណភាពនៃការផលិតព័ត៌មានរបស់អ្នកកាសែតអនឡាញ គឺមិនទាន់មានភាពល្អប្រសើរគ្រប់ជ្រុងជ្រោយនៅឡើយទេ ដោយការយល់ដឹងមិនទាន់ទូលំទូលាយ។
លោកបន្តថា៖ «លោកចង់ចូលរួមបណ្តុះបណ្តាលអ្នកសារព័ត៌មានអនឡាញ ដើម្បីឱ្យពួកគេមានសមត្ថភាព និងចំណេះដឹងខ្ពង់ខ្ពស់ ធានានូវផលិតភាពការងារប្រកបទៅតាមវិជ្ជាជីវៈត្រឹមត្រូវ ដើម្បីឱ្យប្រជាពលរដ្ឋទទួលបាននូវដំណឹងពិត»។
កាលពីថ្ងៃទី១៦ ខែវិច្ឆិកា ឆ្នាំ២០២១ ក្នុងពិធីបើកសិក្ខាសាលាស្ដីពី «ការអនុវត្តវិជ្ជាជីវៈ និងសេរីភាពសារព័ត៌មានក្នុងក្របខណ្ឌច្បាប់កម្ពុជា» លោក ខៀវ កាញារីទ្ធ រដ្ឋមន្ត្រីក្រសួងព័ត៌មាន បានលើកឡើងថា អ្នកសារព័ត៌មាននៅកម្ពុជាចំនួន ៨០% មិនបានរៀនវិជ្ជាជីវៈអ្នកសារព័ត៌មាន និងមិនបានឈ្វេងយល់ទៅលើច្បាប់ស្ដីពីរបបសារព័ត៌មាន និងច្បាប់ព្រហ្មទណ្ឌនោះទេ ដោយភាគច្រើនពួកគេចាប់ផ្ដើមប្រកបអាជីពអ្នកសារព័ត៌មានតែម្តង៕
រាយការណ៍ដោយ៖ កញ្ញា គុជ ស៊ីកុល