យុវជនខ្មែរថាវរៈ​ធ្វើ​យុទ្ធនាការ​បង្អត់​អាហារ​ទាមទារ​ឱ្យ​តុលាការ​ដោះលែង​កញ្ញា សេង ធារី

ក្រុមយុវជនខ្មែរថាវរៈ ធ្វើយុទ្ធនាការ​​បង្អត់អាហារ​ក្នុងរយៈពេលមួយសប្ដាហ៍ (ចាប់ពីថ្ងៃទី៧ ដល់ថ្ងៃទី១៤ ខែវិច្ឆិកា) ដើម្បីទាមទារឱ្យ​តុលាការ​ដោះលែង​​មេធាវីអន្តរជាតិ​សញ្ជាតិខ្មែរ-​អាមេរិកាំង កញ្ញា សេង ​ធារី​ ឱ្យមានសេរីភាព​ឡើងវិញ​។ (ហ្វេសប៊ុក៖ Khmer Thavrak – ខ្មែរថាវរៈ)​​​

ក្រុមយុវជនខ្មែរថាវរៈ ធ្វើយុទ្ធនាការ​​បង្អត់អាហារ​ក្នុងរយៈពេលមួយសប្ដាហ៍ ដើម្បីទាមទារឱ្យ​តុលាការ​ដោះលែង​​មេធាវីអន្តរជាតិ​សញ្ជាតិខ្មែរ-​អាមេរិកាំង គឺកញ្ញា សេង ​ធារី​ ឱ្យមានសេរីភាព​ក្រោយជាប់ពន្ធនា​គារ​រយៈពេល​១៥២ថ្ងៃ​ ដោយគិតត្រឹម​ថ្ងៃ​ពុធនេះ​។​​​

​​​ទំព័រហ្វេសប៊ុក​របស់ខ្មែរថាវរៈ បានបង្ហោះនៅថ្ងៃទី២ ខែវិច្ឆិកា អមដោយរូបភាពយុវជនចំនួន៦នាក់នាំគ្នាលើក​រូបភាពកញ្ញា សេង ធារី និងយកស្កុតបិទមាត់របស់ពួកគេ បញ្ជាក់ពី​យុទ្ធនាការពហិការបង្អត់អាហារ។ ប្រភពដដែលបន្តថា ពួកគេទាំង៦នាក់ចាប់ផ្ដើមយុទ្ធនាការបង្អត់អាហារជាមួយកញ្ញា សេង ធារី រយៈពេលមួយសប្តារហ៍ ចាប់ពីថ្ងៃទី៧ ដល់ថ្ងៃទី១៤ ខែវិច្ឆិកា ​ដើម្បីស្នើទៅតុលាការដោះលែងមេធាវីអន្តរជាតិរូបនេះ។

សមាជិក​ខ្មែរថាវរៈ​មួយរូប គឺកញ្ញា ឈឿន​ ដា​រ៉ាវី​ បានបង្ហោះ​សារនិងរូបភាព ដោយសរសេរថា ​​ការតស៊ូមតិ​របស់ពួកគេ​នេះ ​ដោយបារម្ភ​ពីសុខភាពនិងសុវត្ថិភាពរបស់កញ្ញា​ សេង ធា​រី ដែលកំពុងជាប់ពន្ធនាគា​ក្នុងខេត្តព្រះវិហារ​ ជាប់ព្រំប្រទល់​ប្រទេសថៃ​​។​

ទំព័រហ្វេសប៊ុកកញ្ញា ដារ៉ាវី ថា​៖ «យើងខ្ញុំទាំងអស់គ្នា នឹងចាប់ផ្ដើមយុទ្ធនាការបង្អត់អាហារជាមួយបងស្រី សេង ធារី រយៈពេលមួយសប្តារហ៍ ចាប់ពីថ្ងៃទី៧-១៤ វិច្ឆិកា ខាងមុខ ដើម្បីស្នើទៅតុលាការដោះលែងរូបគាត់។ ពួកយើងទាំងអស់គ្នាមានការបារម្ភពីសុខភាពនិងសុវត្ថិភាពរបស់បងស្រី សេង ធារី ក្រោយពីជាប់ពន្ធនាគារយៈពេល១៥២ថ្ងៃមកនេះ»។

ចំណែកសមាជិក​ខ្មែរថាវរៈម្នាក់ទៀត កញ្ញា ឆែម ស្រីគា បានឱ្យដឹងថា ​​ពួកគេនឹង​បង្អត់អាហារ​ ដោយ​ទទួលទានតែ​ទឹកនិងភេសជ្ជៈប៉ុណ្ណោះ​។ កញ្ញាបន្តថា​ ការបង្អត់អាហាររបស់ពួកគាត់នេះ ដើម្បីជំរុញឱ្យរដ្ឋាភិបាលផ្តល់សេរីភាពឡើងវិញដល់​កញ្ញា​ សេង ធារី​ ដែលកំពុងបាត់បង់​​ និង​បង្ហាញ​ថា​ក្រុម​ខ្មែរថាវរៈ​ក៏កំពុងតស៊ូមតិ​នៅខាងក្រៅ​ជាមួយ​កញ្ញា​ សេង ធារី ដែរ​។

កញ្ញាថា​៖​ «រឿងហ្នឹងច្បាស់ជាទ្រាំទ្រអត់បានហើយ ព្រោះយើងត្រូវការអាហារមួយថ្ងៃ៣ពេល ​នៅពេលដែលអត់ញ៉ាំបាយ អត់ញ៉ាំអាហារអ៊ីចឹង​វានឹងប៉ះពាល់ដល់សុខភាព តែយើងចង់បង្ហាញ​ឱ្យបងស្រី សេង ធារី ឃើញថា ​ក្រៅពីគាត់ ក៏យើង​ចាំលើកទឹកចិត្តគាត់​ និងបង្ហាញក្ដីស្រឡាញ់ទៅកាន់គាត់​»។​

លោក ជូង ជូងី មេធាវីការពារក្តីឱ្យកញ្ញា សេង ធារី បានលើកឡើងថា កូនក្តីរបស់លោកពិតជា​បង្អត់អាហារ ដើម្បីទាមទារយុត្តិធម៌សម្រាប់ខ្លួនគាត់ពិតមែន។ លោកបន្តថា ដើមចមដែលនាំឱ្យកូនក្តីរបស់លោកបង្អត់អាហារ ដោយសារតែគាត់មានអារម្មណ៍ប៉ះពាល់ផ្លូវចិត្ត ដោយសារតែការចោទប្រកាន់និងការឃុំខ្លួនគាត់ដោយពុំមានកំហុស។

លោកមានប្រសាសន៍ថា៖ «ចំពោះបញ្ហាសុខភាពផ្លូវកាយ គាត់អត់មានបញ្ហាអ្វីទេ ប៉ុន្តែអ្វីដែលខ្ញុំកត់សម្គាល់ គាត់មានបញ្ហាសុខភាពផ្លូវចិត្ត ដូចថាគាត់ប៉ះពាល់ផ្លូវចិត្តគាត់ខ្លាំង ដោយសារតែគាត់យល់ថាគាត់អត់បានប្រព្រឹត្តខុសច្បាប់ផង បែរជាតុលាការផ្តន្ទាទោសគាត់ពីបទរួមគំនិតក្បត់ ខណៈដែលកន្លងមក គាត់អត់ដែលមានទំនាក់ទំនងជាមួយអតីតថ្នាក់ដឹកនាំគណបក្សសង្គ្រោះជាតិ»។

យ៉ាងណា លោក ជូង ជូងី ស្នើទៅតុលាការទម្លាក់ការចោទប្រកាន់ និងដោះលែងកូនក្តីរបស់គាត់ឱ្យមានសេរីភាពវិញ ដោយថា កូនក្តីមិនបានធ្វើខុសដូចការចោទប្រកាន់នោះទេ ។

លោកអំពាវនាវ​ថា«បណ្តឹងតវ៉ារបស់យើងដាក់ទៅសាលាឧទ្ធរណ៍ ទាមទារឱ្យមានការទម្លាក់ចោលការចោទប្រកាន់គាត់ ហើយយើងបានដាក់បណ្តឹងតវ៉ាទៅតុលាការកំពូលផង ដើម្បីទាមទារឱ្យដោះលែងគាត់មានសេរីភាព ប៉ុន្តែខ្ញុំមានការសោកស្តាយ ដែលសាលាឧទ្ធរណ៍ និងតុលាការកំពូល អត់មានការដោះលែង ហើយអត់មាននាំគាត់ចូលរួមសវនាការ។ ជាគោល យើងទាមទារឱ្យតុលាការទ​ម្លាក់ការចោទប្រកាន់ និងដោះលែងគាត់ឱ្យមានសេរីភាពវិញ»។

អ្នកនាំពាក្យអគ្គនាយកដ្ឋានពន្ធនាគារ លោក នុត សវនា​ បានឱ្យដឹងថា ​ការបង្អត់អាហាររបស់​កញ្ញា សេង ធារី​ នេះ ​គឺជាសិទ្ធិរបស់គាត់ ប៉ុន្តែ​មន្រ្តីពន្ធនាគារនៅតែណែនាំគាត់ឱ្យថែទាំសុខភាព​​ជាប្រចាំ។​

លោកថា​៖​ «​​អាហ្នឹងគឺជាសិទ្ធិរបស់គាត់​ យើងអត់អាច​បង្ខំគាត់ឬគំរាមគាត់​ឱ្យគាត់ហូបអាហារ ឬធ្វើអីខុសពីចិត្តដែលគាត់ចង់នោះទេ​ ប៉ុន្តែមានតែការលើកទឹកចិត្តនិងណែនាំគាត់​ថែរក្សាសុខភាពខ្លួនគាត់​ ហើយយើងយកចិត្តទុកដាក់ត្រៀមគ្រូពេទ្យ​ដើម្បី​តាមដានសុខភាពគាត់»។​

កញ្ញា សេង ធារី ដែលមានសញ្ជាតិអាមេរិកាំង និងជាមេធាវីអន្តរជាតិមួយរូបផងនោះ ត្រូវបានលោក រស់ ពិសិដ្ឋ ចៅក្រមជំនុំជម្រះ​នៃសាលាដំបូងរាជធានីភ្នំពេញ កាលពីថ្ងៃទី១៤ ខែមិថុនា ឆ្នាំ២០២២ ​ផ្ដន្ទា​​ទោស​​ដាក់​​​​ពន្ធនាគាររយៈពេល៦ឆ្នាំ ពីបទ «ញុះ​ញង់ និង​រួម​​គំ​​និត​​​ក្បត់»។ ក្រៅពីកញ្ញា សេង ធារី ចៅក្រមជំនុំជម្រះ ក៏បានផ្ដន្ទាទោសថ្នាក់ដឹកនាំ និងអ្នកគាំទ្រគណបក្ស​​សង្រ្គោះ​​ជាតិ​ដែលត្រូវ​​បាន​​តុ​​លាការរំលាយ ចំនួន៥០នាក់ផ្សេងទៀត ដាក់ពន្ធនាគារ​ចន្លោះ​ពី៥ទៅ​៨ឆ្នាំ ក្រោមបទចោទដូចគ្នានេះ ជុំវិញការប្រកាសជំហរគាំទ្រការធ្វើមាតុភូមិនិវត្តន៍​ថ្ងៃ៩ វិច្ឆិកា របស់​​​​លោ​​ក ​សម រង្ស៊ី។

ក្រោយ​ការ​ប្រកាសសាលក្រមមួយថ្ងៃ ពោលគឺនៅ​ថ្ងៃទី១៥ ខែមិថុនា ឆ្នាំ២០២២ សមត្ថកិច្ចរាជធានីភ្នំពេញ បាន​បញ្ជូនកញ្ញា សេង ធារី ចេញពីពន្ធនាគារព្រៃស រាជធានីភ្នំពេញ ទៅឃុំខ្លួននៅ​ពន្ធនា​គារ​​ខេត្តព្រះវិហារ ​និងមិនព្រមបញ្ជូនមកឃុំនៅពន្ធនាគារព្រៃសវិញឡើយ ក្រោមហេតុផលថា ដោយ​សារ​បារម្ភ​ពី​ការ​ប៉ះពាល់​ដល់​សន្តិសុខ​ក្នុង​ពន្ធនាគារ​ ប៉ុន្តែមេធាវីការពារក្តីកញ្ញា ថាជារឿងមិនសមហេតុផល៕

រក្សាសិទ្វិគ្រប់យ៉ាងដោយ ស៊ីស៊ីអាយអឹម

សូមបញ្ជាក់ថា គ្មានផ្នែកណាមួយនៃអត្ថបទ រូបភាព សំឡេង និងវីដេអូទាំងនេះ អាចត្រូវបានផលិតឡើងវិញក្នុងការបោះពុម្ពផ្សាយ ផ្សព្វផ្សាយ ការសរសេរឡើងវិញ ឬ ការចែកចាយឡើងវិញ ដោយគ្មានការអនុញ្ញាតជាលាយលក្ខណ៍អក្សរឡើយ។
ស៊ីស៊ីអាយអឹម មិនទទួលខុសត្រូវចំពោះការលួចចម្លងនិងចុះផ្សាយបន្តណាមួយ ដែលខុស នាំឲ្យយល់ខុស បន្លំ ក្លែងបន្លំ តាមគ្រប់ទម្រង់និងគ្រប់មធ្យោបាយ។ ជនប្រព្រឹត្តិ និងអ្នកផ្សំគំនិត ត្រូវទទួលខុសត្រូវចំពោះមុខច្បាប់កម្ពុជា និងច្បាប់នានាដែលពាក់ព័ន្ធ។

អត្ថបទទាក់ទង

សូមផ្ដល់មតិយោបល់លើអត្ថបទនេះ