តុលាការកំពូល គ្រោងបើកសវនាការលើបណ្ដឹងសាទុក្ខរបស់មន្ត្រីជាន់ខ្ពស់ និងអតីតមន្ត្រីសមាគមការពារសិទ្ធិមនុស្សអាដហុក ចំនួន៥រូប នៅថ្ងៃទី៤ ខែវិច្ឆិកា ឆ្នាំ២០២២។
កាលពីខែកញ្ញា ឆ្នាំ២០១៨ បុគ្គលិកនិងអតីតបុគ្គលិកសមាគមការពារសិទ្ធិមនុស្សអាដហុក ៥រូប ត្រូវបានសាលាដំបូងរាជធានីភំ្នពេញកាត់ទោសឱ្យជាប់ពន្ធនាគារម្នាក់ៗចំនួន៥ឆ្នាំ ក្រោមបទចោទប្រកាន់ «សូកប៉ាន់សាក្សី និងសមគំនិតសូកប៉ាន់សាក្សី»។ ប៉ុន្តែទោស៥ឆ្នាំនេះ តុលាការសម្រេចឱ្យអនុវត្តទោសក្នុងពន្ធនាគាររយៈពេល១៤ខែ ហើយទោសដែលនៅសល់ត្រូវព្យួរ។
ក្រោយតុលាការផ្តន្ទាទោស មន្ត្រីនិងអតីតមន្ត្រីសមាគមអាដហុកបានដាក់បណ្តឹងជាបន្តបន្ទាប់ទៅតុលាការជាន់ខ្ពស់ ដើម្បីប្រឆាំងនឹងការសម្រេចរបស់តុលាការជាន់ទាប ដោយពួកគាត់ថា ការសម្រេចរបស់តុលាការសាលាដំបូងរាជធានីភ្នំពេញ ជារឿងអយុត្តិធម៌សម្រាប់ពួកគាត់ដែលជាអ្នកធ្វើការផ្នែកសិទ្ធិមនុស្ស។
សេចក្តីប្រកាសព័ត៌មានរបស់សមាគមអាដហុក នៅថ្ងៃពុធនេះ បានឱ្យដឹងថា នៅវេលាម៉ោង៨:០០ព្រឹកថ្ងៃសុក្រសប្តាហ៍នេះ តុលាការកំពូលនឹងបើកសវនាការលើសំណុំរឿងបណ្តឹងសាទុក្ខរបស់មន្ត្រីជាន់ខ្ពស់សមាគមអាដហុកចំនួន៣រូប រួមមាន លោក នី សុខា លោក យី សុខសាន្ត និងលោកស្រី លឹម មុន្នី និងអតីតមន្ត្រីអាដហុកចំនួន២រូបទៀត គឺលោក ណៃ វ៉ង់ដា និងលោក នី ចរិយា។
កាលពីខែមេសា ឆ្នាំ២០១៦ មន្ត្រីនិងអតីតមន្រ្តីសមាគមការពារសិទ្ធិមនុស្សអាដហុកទាំង៥រូប ត្រូវបានចាប់ខ្លួនដោយចោទប្រកាន់ពីបទ «សូកប៉ាន់សាក្សី និងសមគំនិតសូកប៉ាន់សាក្សី» ក្នុងសំណុំរឿងផ្ដល់ប្រាក់ជាង២០០ដុល្លារ ទៅឱ្យនាង ស្រីមុំ ក្នុងនាមជនរងគ្រោះ ដែលរត់មករកអាដហុកឱ្យជួយពេលនោះ។
ស្ត្រីឈ្មោះ ខុម ចាន់តារាទី នៅពេលនោះ ត្រូវបានគេចោទថាជាស្រីកំណាន់របស់លោក កឹម សុខា ដែលមានតួនាទីជាអនុប្រធានគណបក្សសង្គ្រោះជាតិពេលនោះ។ ពួកគេទាំង៥នាក់ត្រូវបានបញ្ជូនទៅឃុំខ្លួននៅពន្ធនាគារព្រៃស កាលពីថ្ងៃទី១ ខែឧសភា ឆ្នាំ២០១៦ រហូតដល់មានការដោះលែងពួកគេឱ្យនៅក្រៅឃុំបណ្ដោះអាសន្នវិញ កាលពីថ្ងៃទី២៩ ខែមិថុនា ឆ្នាំ២០១៧។
ពាក់ព័ន្ធនឹងករណីនេះ ប្រធានសមាគមការពារសិទ្ធិមនុស្សអាដហុក លោក នី សុខា ធ្លាប់បានបង្ហាញការសោកស្ដាយ និងចាត់ទុកការសម្រេចរបស់តុលាការជាន់ទាប ថាជារឿងអយុត្តិធម៌សម្រាប់ពួកគាត់ដែលជាអ្នកធ្វើការលើកកម្ពស់ផ្នែកសិទ្ធិមនុស្ស ហើយបែរជាត្រូវតុលាការចោទប្រកាន់ និងកាត់ទោសឱ្យជាប់ពន្ធនាគាររហូត៥ឆ្នាំទៅវិញ។
លោកបញ្ជាក់ថា តុលាការមិនដែលកោះហៅសាក្សីមកឆ្លើយតទល់ជាមួយពួកគាត់ក្នុងសវនាការឡើយ ទោះបីជាមានការស្នើសុំយ៉ាងទទូចក៏ដោយ ក៏តុលាការនៅតែយកលិខិតស្នាមរបស់អ្នកនាង ខុម ចាន់តារាទី ឆ្លើយ មកដាក់បន្ទុកលើពួកគាត់ដដែល។
លោកថា៖ «ចំពោះពួកយើងទាំង៥នាក់ដែលយើងបានចូលទៅឆ្លើយបំភ្លឺគ្រប់ដំណាក់កាល ចូលទៅសវនាការដេញដោលចំពោះមុខតុលាការ បែរជាតុលាការមិនមានការជឿជាក់ ឬតុលាការមិនមែនយកពាក្យសម្ដីរបស់យើងទៅធ្វើការពិចារណាទេ។ តុលាការជឿទៅលើពាក្យសម្ដីរបស់សាក្សីដាក់បន្ទុក ហើយដែលពាក្យសម្ដីទាំងអស់ហ្នឹងមិនបានចូលមកដេញដោល បែរជាជឿលើលិខិត ជឿលើក្រដាសប៉ុន្មានសន្លឹកហ្នឹងយកមកដាក់ទោសទណ្ឌពួកយើង។ នេះជារឿងមួយដែលអយុត្តិធម៌បំផុតសម្រាប់ពួកយើង ដែលជាការសម្រេចមួយដែលអយុត្តិធម៌បំផុត អត់មានឈរលើភស្តុតាងទេ ឈរលើសាក្សីដាក់បន្ទុកទៅវិញ»៕
