កម្មករ-កម្មការិនីជិត១ ០០០នាក់ បម្រើការងារនៅរោងចក្រកាត់ដេរសម្លៀកបំពាក់ «ញូមីងដា (ខេបូឌា) ខូអិលធីឌី (New MINGDA CAMBODIA Co., Ltd)» ស្ថិតនៅតាមបណ្ដោយផ្លូវវេងស្រេង ក្នុងភូមិទួលពង្រ សង្កាត់ចោមចៅ ខណ្ឌពោធិ៍សែនជ័យ រាជធានីភ្នំពេញ បានផ្ទុះការតវ៉ានៅថ្ងៃពុធនេះ ក្រោយថៅកែបញ្ឈប់តំណាងសហជីពម្នាក់ពីការងារ។
លោក ប៊ុន សុភី ដែលអះអាងថាជាប្រធានសហជីពមួយ ដែលលោកសុំមិនប្រាប់ឈ្មោះ និងជាកម្មករបម្រើការងារនៅរោងចក្រ ញូមីងដា បានប្រាប់ វីអូឌី នៅកន្លែងតវ៉ាមុខរោងចក្រថា ការតវ៉ារបស់ក្រុមកម្មករនេះធ្វើឡើងក្នុងគោលបំណងទាមទារទៅថៅកែឱ្យទទួលយកថ្នាក់ដឹកនាំសហជីពរបស់លោកម្នាក់ចូលធ្វើការងារវិញ និងមួយទៀត សុំកុំឱ្យក្រុមហ៊ុនកាត់បំណាច់ឆ្នាំរបស់កម្មករ នៅពេលដែលពួកគេព្យួរការងារដោយសារគ្មានការងារធ្វើ ខណៈពួកគេទទួលបានប្រាក់ឈ្នួល៥០ភាគរយ។
លោកបន្តថា កម្មករជាង១០នាក់បាននាំគ្នាចងក្រងបង្កើតសហជីពក្នុងរោងចក្រ ញូមីងដា រយៈពេលជាង២ខែហើយ ដើម្បីការពារសិទ្ធិ និងផលប្រយោជន៍របស់កម្មករ។ លោកថា ក្រោយការបង្កើតសហជីពនេះ ថៅកែបានបញ្ចប់កិច្ចសន្យាការងារថ្នាក់ដឹកនាំសហជីពរបស់លោកម្នាក់។
មួយទៀតនោះ លោកថា ខាងរោងចក្របានព្យួរការងារកម្មករមួយចំនួន ដោយផ្តល់ប្រាក់ឈ្នួលត្រឹម៥០ភាគរយ ប៉ុន្តែត្រូវកាត់កងជាមួយបំណាច់ឆ្នាំ ដែលធ្វើឱ្យកម្មករមិនសប្បាយចិត្ត ហើយផ្ទុះការតវ៉ា។
លោកបន្ថែមថា៖ «ខាងក្រុមហ៊ុនមានការរើសអើងសហជីព ហើយបានបញ្ឈប់ថ្នាក់ដឹកនាំសហជីពយើង ហើយក៏មានការតវ៉ាពីបងប្អូនកម្មករ។ តវ៉ាមួយទៀតនោះ ដោយសារខាងក្រុមហ៊ុនឱ្យកម្មករឈប់ ហើយកាត់បំណាច់ឆ្នាំ ប៉ុន្តែក្រោយមានការតវ៉ាពីកម្មករ ខាងក្រុមហ៊ុនក៏បានយល់ព្រមឱ្យឈប់សម្រាកដោយទទួលបានប្រាក់ឈ្នួល៥០ភាគរយ ដោយមិនមានការកាត់បំណាច់ឆ្នាំទេ»។
កម្មការិនីផ្នែកដេរម្នាក់ កញ្ញា ហ៊ន់ សុខខា និយាយថា កម្មករដែលត្រូវបញ្ឈប់ពីការងារនោះ គឺពុំធ្លាប់មានកំហុសអ្វីនោះទេ។ កញ្ញាចាត់ទុកករណីថៅកែបញ្ឈប់កម្មកររូបនោះ ថាជាការរើសអើងសហជីព។
កញ្ញាបន្ថែមថា៖ «យើងតវ៉ានេះ ដោយសារតែខាងរោងចក្របញ្ឈប់តំណាងសហជីពខ្ញុំ គាត់រើសអើងសហជីព។ អ៊ីចឹងហើយពួកខ្ញុំមិនសុខចិត្ត បាននាំគ្នាតវ៉ា! តវ៉ាឱ្យខាងរោងចក្រទទួលយកគាត់ចូលធ្វើការងារវិញ ដោយគ្មានការរើសអើង គ្មានការគុំកួនលើកម្មករ»។
វីអូឌី មិនអាចសុំការឆ្លើយតបពីតំណាងរោងចក្រ ញូមីងដា បានទេ នៅថ្ងៃពុធនេះ។
អនុប្រធានផ្នែកអន្តរាគមន៍ និងដោះស្រាយបាតុកម្មកូដកម្មគ្រប់មុខសញ្ញា នៃក្រសួងការងារ និងបណ្តុះបណ្តាលវិជ្ជាជីវៈ លោក អ៊ូ រតនា មានប្រសាសន៍ថា ករណីថៅកែបញ្ឈប់កម្មករនោះជារឿងវិវាទបុគ្គល ដែលករណីនេះ ក្រសួងនឹងបន្តដោះស្រាយតាមនីតិវិធី។
លោកបន្ថែមថា៖ «យើងដោះស្រាយបានសះជាហើយតើ! កម្មករបានឯកភាពចូលធ្វើការងារវិញ។ ការបញ្ឈប់សហជីពនោះ គឺយើងធ្វើការដោះស្រាយបន្តនៅក្រសួងការងារ ព្រោះអាហ្នឹងជារឿងវិវាទបុគ្គល មិនមែនជាវិវាទរួមនោះទេ»។
ប្រធានសមាគមអភិវឌ្ឍន៍ជីវភាពពលរដ្ឋកម្ពុជា លោក ព្រុំ ប៊ុនថន ដែលឃ្លាំមើលរឿងនេះ មានប្រសាសន៍ថា នេះមិនមែនជាករណីលើកទី១នោះទេ ដែលថៅកែបានបញ្ឈប់កម្មករ ដោយសារតែពួកគាត់នាំគ្នាបង្កើតសហជីពនៅក្នុងរោងចក្រ គឺមានរោងចក្រជាច្រើនផ្សេងទៀតដែលបានធ្វើបែបនេះ។ លោកថា ទង្វើនេះជាទង្វើខុសច្បាប់ និងរំលោភបំពានសិទ្ធិរបស់កម្មករធ្ងន់ធ្ងរ។
មន្ត្រីសង្គមស៊ីវិលផ្នែកសិទ្ធិមនុស្ស និងសិទ្ធិការងាររូបនេះ បន្តថា ជុំវិញវិវាទការងារនេះ រដ្ឋាភិបាល ជាពិសេសក្រសួងការងារ ហាក់ពុំបានជំរុញឱ្យថៅកែគោរពច្បាប់ និងចាត់វិធានការតឹងរ៉ឹងចំពោះម្ចាស់រោងចក្រ ឬថៅកែដែលរំលោភច្បាប់ និងសិទ្ធិកម្មករនេះទេ។
លោកបន្ថែមថា៖ «អ៊ីចឹងខ្ញុំគិតថា ខាងក្រសួងការងារ គួរតែអនុវត្តវិធានការច្បាប់ឱ្យបានតឹងរ៉ឹង និងមានប្រសិទ្ធភាព ចំពោះករណីនិយោជកដែលបានបញ្ឈប់តំណាងសហជីពនេះ ព្រោះនេះជាការរើសអើង និងរំលោភច្បាប់ហើយ យើងអត់ចង់ឱ្យទិដ្ឋភាពនេះកើតឡើងទេ។ កាលណាកើតឡើង វាបាត់ផលប្រយោជន៍ទាំងសងខាង ទាំងកម្មករ និងនិយោជក។ អ៊ីចឹងក្នុងរឿងនេះ ខ្ញុំថាមានតែក្រសួងការងារហ្នឹងឯង ដែលដើរតួសំខាន់ក្នុងការជំរុញឱ្យភាគីនិយោជកគោរពលក្ខខណ្ឌច្បាប់ដែលតម្រូវមកនោះ»។
កាលពីខែសីហា ឆ្នាំ២០២២ កម្មករជិត១ ០០០នាក់របស់រោងចក្រ ញូមីងដា បានផ្ទុះការតវ៉ាម្តងហើយ ក្រោយពីថៅកែគ្រោងបញ្ឈប់តំណាងកម្មករចំនួន៥នាក់ពីការងារ ប៉ុន្តែកម្មករបានចូលធ្វើការងារវិញ បន្ទាប់ពីថៅកែលុបគម្រោងបញ្ឈប់កម្មករទាំងនោះ។
បើតាមកម្មករ រោងចក្រ ញូមីងដា ជារោងចក្រផលិតសម្លៀកបំពាក់ មានកម្មករប្រមាណ៨០០នាក់កំពុងបម្រើការងារ និងថៅកែជាជនជាតិចិន៕
