ពលរដ្ឋរស់នៅតំបន់បឹងទំនប់កប់ស្រូវ រាជធានីភ្នំពេញ អំពាវនាវទៅអាជ្ញាធរគ្រប់លំដាប់ថ្នាក់ ចាត់វិធានការលើក្រុមឈ្មួញដែលដាក់គ្រាប់បំផ្ទុះយកអាចម៍ដីលក់ នាំឱ្យរញ្ជួយដី ហើយអាចប៉ះពាល់លំនៅឋានពលរដ្ឋនៅក្បែរតំបន់នោះ។
បើតាមគណនីហ្វេសប៊ុក ឈ្មោះ «Pov Khy» ដែលបានបង្ហោះនូវវីដេអូឃ្លីបកាលពីថ្ងៃសៅរិ៍ម្សិលមិញ ដែលមានរយៈពេលជាង៣នាទី ដោយភ្ជាប់ចំណងជើងថា «រំជួយដីនៅបឹងកប់ស្រូវ» ។ ក្នុងហ្វេសប៊ុកនោះ បានលើកឡើងថា មួយរយៈនេះ មានក្រុមឈ្មួញរកស៊ីមួយចំនួន បានយកគ្រាប់បំផ្ទុះជាញឹកញាប់នៅចំកណ្ដាលបឹងកប់ស្រូវ ដែលជាកន្លែងរណ្ដៅដី ដើម្បីយកអាចម៍ដីទៅលក់ ។
ករណីនេះ លោកអំពាវនាវទៅអាជ្ញាធរគ្រប់លំដាប់ថ្នាក់ ជាពិសេសអាជ្ញាធរសង្កាត់គោករកា និងអាជ្ញាធរខណ្ឌព្រែកព្នៅ ចុះស្រាវជ្រាវនិងចាត់វិធានការលើឈ្មួញដែលដាក់គ្រាប់បំផ្ទុះយកអាចម៍ដីលក់ នាំឱ្យរញ្ជួយដី ហើយអាចប៉ះពាល់លំនៅឋានពលរដ្ឋនៅក្បែរនោះជាដើម។
លោកអំពាវនាវថា៖ «ទាន់សភាពការមិនទាន់អី សូមអាជ្ញាធរគ្រប់លំដាប់ថ្នាក់ ជួយចាត់វិធានការលើឈ្មួញនៅទំបន់កប់ស្រូវហ្នឹងផង ហើយជាពិសេសទំនប់កប់ស្រូវក៏ប្រេះដែរ បើគ្រាប់បំផ្ទុះដំបូងគេដាក់ល្មមៗទេ ឥឡូវគេដាក់ធំទៅៗ ផ្ទះថ្មយោគដូចរញ្ជួយផែនដីអញ្ចឹង»។
លោកថ្លែងបន្តថា៖ «សូមប្តឹងដល់អាជ្ញាធរមូលដ្ឋានសង្កាត់ ខណ្ឌ និងក្រុង បើឃើញវីដេអូនេះ ជួយពិនិត្យបឹងកប់ស្រូវនេះផង គាត់កាយដីដល់ក្បាលប្រែតទៅវាអស់ដីកាយ អញ្ចឹងវាដាក់គ្រាប់រំសេវបំផ្ទុះម្តងៗ មួយថ្ងៃ៣,៤,៥គ្រាប់ រង្គើផ្ទះនៅអត់បាន ហើយរង្គើកញ្ចក់ចង់ធ្លាក់ចេញពីបង្អួចទៅទៀត» ។
វីអូឌីមិនអាចសុំការបំភ្លឺពី លោក ធឹម សំអាន អភិបាលខណ្ឌព្រែកព្នៅ និងអ្នកនាំពាក្យអ្នកនាំពាក្យស្នងការដ្ឋាននគរបាលរាជធានីភ្នំពេញ លោក សាន សុខសីហា បានទេ ខណៈអភិបាលរងរាជធានីភ្នំពេញ លោក កើត ឆែ សុំមិនធ្វើការបកស្រាយជុំវិញបញ្ហានេះ ដោយលោកអះអាងថា មិនទាន់ទទួលបានព័ត៌មាននេះនៅឡើយ ។
នាយកគ្រប់គ្រងកិច្ចការទូទៅនៃអង្គការឃ្លាំមើលសិទ្ធិមនុស្សលីកាដូ លោក អំ សំអាត មានប្រសាសន៍ថា បើសិនជាមានករណីបំផ្ទុះគ្រាប់យកអាចម៍ដីលក់មែន អាជ្ញាធរត្រូវស្រាវជ្រាវឱ្យមានតម្លាភាព និងចាត់វិធានការឱ្យបានតឹងរឹងលើអ្នកដែលប្រព្រឹត្តអំពើខុសច្បាប់ នាំឱ្យប៉ះពាល់ដល់ពលរដ្ឋដែលរស់នៅតំបន់នោះផងដែរ។
លោកមានប្រសាសន៍ថា៖ «បើមានករណីដូចពលរដ្ឋលើកឡើងមែន ខ្ញុំគិតថា អាជ្ញាធរគួរតែចុះស្រាវជ្រាវនិងចាត់វិធានទៅអ្នកប្រព្រឹត្តទាំងនោះ ពីព្រោះការយកគ្រប់បំផ្ទុះយកអាចម៍ដីជាទង្វើខុសច្បាប់មួយហើយ និងមួយទៀតអាចប៉ះពាល់ដល់ពលរដ្ឋនៅតំបន់នោះ និងធ្វើឱ្យពួកគាត់មានការភ័យខ្លាច»។
បឹងតាមោក ឬបឹងកប់ស្រូវ មានផ្ទៃដីសរុប៣ ២៣៩ហិកតា ជាអាងស្ដុកទឹកកខ្វក់ និងរំដោះទឹកចេញពីរាជធានីភ្នំពេញ ហើយបឹងមួយនេះ ត្រូវបានរដ្ឋាភិបាលចេញអនុក្រឹត្យកាលពីដើមខែកុម្ភៈ ឆ្នាំ២០១៦ ដោយកំណត់យកបឹងធម្មជាតិមួយនេះជាសម្បតិ្តសាធារណៈរបស់រដ្ឋ។
បើយោងតាមអនុក្រឹត្យរបស់រដ្ឋាភិបាល ដែលបានចេញជាបន្តបន្ទាប់ចាប់តាំងពីឆ្នាំ២០១៨ ដល់ចុងខែធ្នូ ឆ្នាំ២០២១ ផ្ទៃបឹងតាមោក សរុបជាង២ ០០០ហិកតាហើយ ត្រូវបានរដ្ឋាភិបាលកាត់ឬដោះដូរទៅឱ្យស្ថាប័នរដ្ឋ ក្រុមហ៊ុនឯកជន និងបុគ្គលឯកជនមួយចំនួនដែលគេដឹងថាជាអ្នកមានលុយមានអំណាច សម្រាប់សាងសង់អគារ និងហេដ្ឋារចនាសម្ព័ន្ធផ្សេងៗ ព្រមទាំងធ្វើជាកម្មសិទ្ធិផ្ទាល់ខ្លួន ជាដើម៕
