ប្រជាពលរដ្ឋមួយចំនួន ដែលរងផលប៉ះពាល់ពីគម្រោងអភិវឌ្ឍន៍ព្រលានយន្តហោះអន្តរជាតិភ្នំពេញថ្មី ស្ថិតក្នុងស្រុកកណ្ដាលស្ទឹង ខេត្តកណ្ដាល នៅតែរក្សាជំហរមិនទទួលយកសំណងត្រឹម ៨ដុល្លារក្នុងមួយម៉ែត្រការ៉េ តាមការកំណត់របស់ដ្ឋាភិបាល ខណៈពលរដ្ឋខ្លះបានទទួលសំណងនេះទាំងបង្ខំចិត្ត ក្រោយអស់ជំនឿលើការដោះស្រាយរបស់អាជ្ញាធរ។
បើតាមញត្តិរបស់ប្រជាពលរដ្ឋកាលពីឆ្នាំ២០២១ បានឱ្យដឹងថា គម្រោងអភិវឌ្ឍន៍ព្រលានយន្តហោះអន្តរជាតិភ្នំពេញថ្មី បានធ្វើឱ្យប៉ះពាល់ដីធ្លីទំហំជាង ១លានម៉ែត្រការ៉េ របស់ប្រជាពលរដ្ឋ ៣៣០គ្រួសារ ស្ថិតក្នុងឃុំចំនួន៤ រួមមាន ឃុំបឹងខ្យាង ឃុំអំពៅព្រៃ ឃុំព្រែកស្លែង ក្នុងស្រុកកណ្តាលស្ទឹង ខេត្តកណ្តាល និងឃុំពត់សរ ស្រុកបាទីខេត្តតាកែវ ដោយផលប៉ះពាល់នេះ រដ្ឋាភិបាលបានផ្តល់សំណងជាគោលការណ៍ ៨ដុល្លារប៉ុណ្ណោះក្នុង១ម៉ែត្រការ៉េ។
ពលរដ្ឋនៅឃុំបឹងខ្យាង អ្នកស្រី ឃឹម ម៉ាលី ប្រាប់វីអូឌីនៅថ្ងៃចន្ទនេះថា គ្រួសារអ្នកស្រីបានប៉ះពាល់ដីស្រែទំហំ៣៧អា និងដីលំនៅឋានទំហំ២០ម៉ែត្រគុណ៤០ម៉ែត្រ ដែលជាដីមានបណ្ណកម្មសិទ្ធិត្រឹមត្រូវ។ អ្នកស្រីថា ការដែលរដ្ឋាភិបាលផ្តល់សំណងត្រឹម ៨ដុល្លារក្នុង១ម៉ែត្រការ៉េនោះ គឺអ្នកស្រីមិនអាចទទួលយកបានឡើយ ដោយថា សំណងនេះតិចតួចពេកមិនយកទៅទិញដីក្បែរតំបន់ពួកគាត់រស់នៅបាន។
ពលរដ្ឋរូបនេះបន្តថា អ្នកស្រីទាមទារការដោះស្រាយសំណងសមរម្យ ដែលអាចយកទៅទិញដីក្បែរៗនោះវិញបាន ខណៈបច្ចុប្បន្នដីនៅក្បែរព្រលាននោះ មានតម្លៃចន្លោះពី ៥០ដុល្លារទៅជាង១០០ដុល្លារក្នុង១ម៉ែត្រការ៉េ។
អ្នកស្រីបន្ថែមថា៖ «ខ្ញុំយកម៉េចកើតតម្លៃហ្នឹង[៨ដុល្លារក្នុង១ម៉ែត្រការ៉េ] ទៅរកដីកន្លែងផ្សេងណាបាន វាថោកពេក ហើយដែលគេយក គេអ្នកមាន ដល់យើងអ្នកក្រយើងយកម៉េចកើត»។
ពលរដ្ឋនៅឃុំបឹងខ្យាងម្នាក់ទៀត លោក ទួន វណ្ណៈ បានឱ្យដឹងថា គ្រួសារលោកបានប៉ះពាល់ដីលំនៅឋាន និងដីស្រែទាំងស្រុងសរុបចំនួន ១ហិកតា ៩៨អា។ លោកថា រហូតមកពេលនេះ លោកមិនទាន់យកសំណងត្រឹម ៨ដុល្លារក្នុងមួយម៉ែត្រការ៉េនោះនៅឡើយទេ។
ពលរដ្ឋរូបនេះ បន្តថា លោកមានការឈឺចាប់ចំពោះការរំលោភបំពានដីធ្លីនេះ ហើយមានការព្រួយបារម្ភ និងពិបាកចិត្ត ដោយសារការដោះស្រាយមិនបានសមរម្យសម្រាប់ពួកគាត់ ខណៈគ្រួសារលោកកំពុងជួបផលលំបាកក្នុងជីវភាពគ្រួសារ ដោយសារគ្មានដីធ្លីសម្រាប់បង្កបង្កើនផល និងជំពាក់បំណុលធនាគារជាដើម។
លោក ទួន វណ្ណៈ បន្ថែមថា ពលរដ្ឋមួយចំនួន បានទទួលយកសំណងទាំងបង្ខំចិត្ត ដោយសារអស់ជំនឿលើការដោះស្រាយរបស់អាជ្ញាធរ និងមិនសង្ឃឹមទទួលបានយុត្តិធម៌ពីការដោះស្រាយបញ្ហវិវាទដីធ្លីនេះ។
លោកបន្ថែមថា៖ «ប្រជាពលរដ្ឋដែលរងផលប៉ះពាល់ទាំង៤ឃុំនេះ បារម្ភ វាហួសពីបារម្ភហើយ ដោយសារទី១ មិនដឹងទៅរកលំនៅនៅណា ទី២អត់មានលុយកាក់ទៅធ្វើផ្ទះ ឬទៅទិញដីធ្វើលំនៅឋានថ្មី អីចឹងហើយ ខ្ញុំសូមទទូចដល់រដ្ឋាភិបាលឱ្យពន្លឿនការដោះស្រាយឱ្យបានឆាប់ កុំឱ្យប្រជាពលរដ្ឋរងគ្រោះដោយសារការបិទការទិញលក់ បិទមិនឱ្យធ្វើស្រែ និងរងគ្រោះមួយទៀតខ្វះលុយកាក់ឱ្យកូនរៀនសូត្រ»។
អភិបាលស្រុកកណ្ដាលស្ទឹង លោក អ៊ូច សាវឿន មិនអាចបញ្ជាក់ជាក់លាក់បានទេថា នៅសល់ពលរដ្ឋប៉ុន្មានគ្រួសារទៀតដែលមិនទាន់ទទួលយកសំណងត្រឹម៨ដុល្លារក្នុងមួយម៉ែត្រការ៉េនោះទេ ប៉ុន្តែលោកថា បច្ចុប្បន្ននៅសល់ពលរដ្ឋតិចតួចប៉ុណ្ណោះដែលមិនទាន់ទទួលយកសំណងនេះ។ ចំពោះសំណងវិញ លោកថា គ្មានប្រែប្រួលណាមួយឡើយ គឺនៅ៨ដុល្លារក្នុងមួយម៉ែត្រការ៉េដដែល។
លោកបន្ថែមថា៖ «អូរអត់មានការប្រែប្រួលទេ គឺនៅ៨ដុល្លារដដែល ដែលសំណងនេះ កំណត់ជាគោលការណ៍ដោយរដ្ឋាភិបាល មិនមែនយើងអាជ្ញាធរជាអ្នកកំណត់ទេ»។
កាលពីថ្ងៃទី៣ ខែមិថុនា ឆ្នាំ២០២០ រដ្ឋាភិបាលបានចេញអនុក្រឹត្យមួយដោយផ្ដល់ដីរដ្ឋទំហំប្រមាណ២ ៦០០ហិកតា ដែលលាតសន្ធឹងលើស្រុកកណ្ដាលស្ទឹង ខេត្តកណ្ដាល និងស្រុកបាទី ខេត្តតាកែវ ទៅឱ្យក្រុមហ៊ុនវិនិយោគអាកាសយានដ្ឋានកម្ពុជា (CAIC) វិនិយោគរួមគ្នាជាមួយសាជីវកម្មក្រៅប្រទេស និងលេខាធិការដ្ឋានអាកាសចរណ៍ស៊ីវិល ដើម្បីអភិវឌ្ឍព្រលានយន្តហោះអន្តរជាតិភ្នំពេញថ្មីមួយនេះ។
មន្ត្រីសម្របសម្រួលគម្រោងធុរកិច្ច និងសិទ្ធិមនុស្ស នៃមជ្ឈមណ្ឌលសិទ្ធិមនុស្សកម្ពុជា លោក វណ្ណ សុផាត មានប្រសាសន៍ថា តាមច្បាប់រដ្ឋធម្មនុញ្ញ ច្បាប់ភូមិបាល និងច្បាប់អស្សាមិករណ៍ គឺរដ្ឋអាចដកហូតដីពលរដ្ឋមានបណ្ណកម្មសិទ្ធិស្របច្បាប់ទៅអភិវឌ្ឍន៍បាន លុះត្រាតែមានការផ្តល់សំណងសមរម្យ និងមានការយល់ស្របពីម្ចាស់ដីផងដែរ។
លោកបន្ថែមថា៖ «ទាំងរដ្ឋធម្មនុញ្ញ ច្បាប់ភូមិបាល ច្បាប់អស្សាមិករណ៍ គឺបានចែងយ៉ាងច្បាស់ណាស់ថា ការដែលដកហូតអចលនទ្រព្យរបស់នីតិបុគ្គល ឬរូបវន្តបុគ្គលណាមួយ គឺត្រូវតែមានសំណងសមរម្យ និងមានការយល់ព្រមពីម្ចាស់អចលនទ្រព្យហ្នឹងផងដែរ ហើយប្រសិនបើយកដោយពុំមានការយល់ព្រម គ្មានផ្ដល់សំណងសមរម្យអាចទទួលយកបានទេ អាហ្នឹងគឺជាការដកហូតដោយខុសច្បាប់ ហើយជាការរំលោភសិទ្ធិមនុស្សធ្ងន់ធ្ងររបស់ប្រជាពលរដ្ឋ ជាពិសេសមានដីធ្លី និងលំនៅឋានសមរម្យ»។
កាលពីថ្ងៃទី៩ ខែឧសភា ឆ្នាំ២០២២ រដ្ឋមន្ត្រីក្រសួងទំនាក់ទំនងជាមួយរដ្ឋសភា-ព្រឹទ្ធសភា និងអធិការកិច្ច លោកស្រី ម៉ែន សំអន បានបញ្ជាទៅអភិបាលខេត្តកណ្ដាល លោក គង់ សុភ័ណ្ឌ ឱ្យពិនិត្យនិងដោះស្រាយសំណងជូនពលរដ្ឋជាង១០០គ្រួសារ រស់នៅឃុំបឹងខ្យាង ឃុំព្រែកស្លែង ស្រុកកណ្ដាលស្ទឹង ខេត្តកណ្ដាល ដែលកំពុងមានជម្លោះជាមួយក្រុមហ៊ុន OCIC និងក្រុមហ៊ុន CAIC ដែលជាក្រុមហ៊ុនម៉ៅការសាងសង់ព្រលានយន្តហោះអន្តរជាតិភ្នំពេញថ្មី ប៉ុន្តែពលរដ្ឋអះអាងថា រហូតមកពេលនេះ មិនទាន់មានដំណោះស្រាយណាមួយជូនពលរដ្ឋនោះទេ ក្រៅពីបង្ខំឱ្យពួកគាត់ដោះដូរ និងទទួលយកសំណងត្រឹម៨ដុល្លារក្នុង១ម៉ត្រការ៉េ៕