ប្រធានាធិបតីរុស្ស៊ី លោក វ្លាឌីមៀរ ពូទីន (Vladimir Putin) នឹងមិនទៅចូលរួមក្នុងកិច្ចប្រជុំនៃក្រុមប្រទេសមានសេដ្ឋកិច្ចជឿនលឿនទាំង២០ (G20) ដែលនឹងធ្វើឡើងនៅកោះបាលី ប្រទេសឥណ្ឌូនេស៊ី នាសប្ដាហ៍ក្រោយឡើយ។
នេះបើតាមការឱ្យដឹងពីមន្ត្រីរដ្ឋាភិបាលឥណ្ឌូនេស៊ីមួយរូប ដែលបានប្រាប់ទីភ្នាក់ងារសារព័ត៌មាន Reuters នៅថ្ងៃព្រហស្បតិ៍នេះ។ ប្រភពដដែលបន្តថា វត្តមានរបស់ប្រធានាធិបតីរុស្ស៊ីនេះ នឹងត្រូវជំនួសដោយរដ្ឋមន្ត្រីការបរទេស លោក Sergei Lavrov វិញ។
កិច្ចប្រជុំកំពូលដែលនឹងធ្វើឡើងនៅកោះបាលីនេះ គ្រោងនឹងមានការចូលរួមពីសំណាក់មេដឹកនាំពិភពលោកមួយចំនួន ដែលរួមមានប្រធានាធិបតីចិន លោក ស៊ី ជីនពីង និងប្រធានាធិបតីអាមេរិក លោក ចូ បៃឌិន ខណៈឥណ្ឌូនេស៊ីក៏បានអញ្ជើញប្រធានាធិបតីអ៊ុយក្រែន លោក វ៉ូឡូឌីមៀ ហ្សេលេនស្គី (Volodymyr Zelenskiy) ផងដែរ។
ទោះជាយ៉ាងណា លោក វ៉ូឡូឌីមៀ ហ្សេលេនស្គី កាលពីសប្តាហ៍មុន ធ្លាប់បានលើកឡើងថា លោកនឹងមិនចូលរួមក្នុងកិច្ចប្រជុំកំពូលក្រុមប្រទេសសេដ្ឋកិច្ចនាំមុខ G20 នៅឥណ្ឌូនេស៊ីនេះឡើយ ប្រសិនបើមានវត្តមានរបស់លោក វ្លាឌីមៀរ ពូទីន៕
