កូដករណាហ្គាវើលដ៍ នៅថ្ងៃសុក្រនេះ បានអំពាវនាវដល់ថ្នាក់ដឹកនាំនៃបណ្ដាប្រទេសជាសមាជិកអាស៊ាន ជួយជំរុញទៅរដ្ឋាភិបាលកម្ពុជាឱ្យដោះស្រាយវិវាទការងារនៅក្រុមហ៊ុនល្បែងមួយនេះ និងគោរពសិទ្ធិបញ្ចេញមតិ សិទ្ធិមនុស្ស ព្រមទាំងបញ្ឈប់ការប្រើប្រាស់អំពើហិង្សា។
ការអំពាវនាវនេះបានធ្វើឡើងស្របពេលដែលកម្ពុជាកំពុងធ្វើជាម្ចាស់ផ្ទះក្នុងការរៀបចំកិច្ចប្រជុំកំពូលអាស៊ាន និងកិច្ចប្រជុំពាក់ព័ន្ធ នៅរាជធានីភ្នំពេញ។ ការធ្វើកូដកម្មដោយអហិង្សា នៅថ្ងៃនេះ កូដករណាហ្គាវើលដ៍ភាគច្រើនបានស្លៀកសម្លៀកបំពាក់ប្រពៃណីខ្មែរ ជាហូលផាមួង និងមានការកាន់បដាក្នុងខ្លឹមសារទាមទារឱ្យមានដំណោះស្រាយវិវាទការងារ និងគោរពសិទ្ធិការងារ ជាដើម។
កូដករណាហ្គាវើលដ៍មួយរូប អ្នកនាង សុខ រតនា មានប្រសាសន៍ថា ការដែលពួកគាត់បន្តធ្វើកូដកម្មនេះ ដោយសារតែក្រសួងស្ថាប័នពាក់ព័ន្ធ និងក្រុមហ៊ុនណាហ្គាវើលដ៍ ក្នុងរយៈពេលជាង១ឆ្នាំមកនេះ នៅមិនទាន់មានដំណោះស្រាយវិវាទការងារសម្រាប់ពួកគាត់នៅឡើយ។ អ្នកនាងបន្តថា ក្នុងឱកាសដែលកម្ពុជាកំពុងរៀបចំកិច្ចប្រជុំកំពូលអាស៊ាននេះ ពួកគាត់អំពាវនាវដល់ថ្នាក់ដឹកនាំនៃបណ្តាប្រទេសសមាជិកអាស៊ាន ជួយជំរុញទៅរដ្ឋាភិបាលកម្ពុជាដោះស្រាយវិវាទការងារនេះឱ្យបានឆាប់ និងគោរពសិទ្ធិនានាដែលមានចែងក្នុងច្បាប់ជាតិ និងអន្តរជាតិ។
អ្នកនាង សុខ រតនា ថ្លែងថា៖ «ខ្ញុំចង់ឱ្យកិច្ចប្រជុំអាស៊ាន គឺឱ្យគាត់ជួយដោះស្រាយវិវាទការងារនៅក្រុមហ៊ុនណាហ្គាវើលដ៍នេះផង ព្រោះយើងអត់មានអីសង្ឃឹមទៀតទេ ព្រោះក្រសួងពាក់ព័ន្ធ មើលទៅគាត់អត់មានរវល់ពីរឿងយើងទៀតទេ គឺគាត់បណ្តោយយើង គាត់អត់ដោះស្រាយ»។
អ្នកនាងអំពាវនាវបន្ថែមថា៖ «ខ្ញុំគ្រាន់តែចង់ឱ្យគាត់ [មេដឹកនាំសមាជិកអាស៊ាន] ជំរុញប្រទេសកម្ពុជាយើងឱ្យគោរពច្បាប់ គោរពសិទ្ធិក្នុងការបញ្ចេញមតិ ក៏ដូចជាសិទ្ធិមនុស្ស ព្រោះយើងរាល់ថ្ងៃនេះមានការរឹតត្បិតខ្លាំងមែនទែន សូម្បីយើងចេញធ្វើកូដកម្មស្របច្បាប់ មានការប្រើប្រាស់អំពើហិង្សាពីខាងអាជ្ញាធរផ្សេងៗ អ៊ីចឹងយើងអត់ចង់មានទិដ្ឋភាពហ្នឹងកើតឡើងទៀតទេ យើងចង់ឱ្យមានស្មើភាពគ្នា ព្រោះយើងជាមនុស្ស យើងមានសិទ្ធិក្នុងការបញ្ចេញមតិនានា»។
កូដករណាហ្គាវើលដ៍ម្នាក់ទៀត អ្នកនាង ម៉ម សុវឌ្ឍិន បានលើកឡើងថា ក្រុមហ៊ុនណាហ្គាវើលដ៍ បានបញ្ឈប់ថ្នាក់ដឹកនាំសហជីពប្រចាំក្រុមហ៊ុន និងបុគ្គលិកដោយអយុត្តិធម៌ ហើយការដោះស្រាយនោះទៀតសោតក៏នៅពុំទាន់មានតម្លាភាពនិងយុត្តិធម៌សម្រាប់ពួកគាត់នៅឡើយ។
អ្នកនាងថា៖ «ឆ្លៀតពេលអាស៊ានមកហ្នឹង យើងក៏ចង់បង្ហាញថា យើងជាពលរដ្ឋខ្មែរមិនទាន់បានយុត្តិធម៌នៅឡើយទេ […] ការហៅទៅដោះស្រាយរបស់ក្រសួងពាក់ព័ន្ធ ជាមួយនឹងថៅកែណាហ្គាវើលដ៍ គឺជាការហៅយកលុយបញ្ចប់រឿង មិនមែនជាការដោះស្រាយដែលរកយុត្តិធម៌ដែលពួកខ្ញុំចង់បាន។ ពួកខ្ញុំចង់បាន គឺជាការទទួលយកអ្នកតវ៉ាដែលជាសមាជិកសហជីព ដែលជាប្រធានសហជីព ដោយប្រធានហ្នឹងគឺបងស្រី ឈឹម ស៊ីថរ ហ្នឹងឱ្យចូលត្រលប់ទៅធ្វើការវិញ ដោយមិនមានការរើសអើង»។
បើតាមអ្នកនាង ម៉ម សុវឌ្ឍិន អំឡុងពេលដែលកូដករតវ៉ានេះ ក៏មានការឃ្លាំមើលពីសំណាក់អាជ្ញាធរ ហើយអាជ្ញាធរស្លៀកពាក់ស៊ីវិលទាំងនោះក៏បានតាមឃ្លាំមើលពួកគាត់ដល់ផ្ទះ ដែលធ្វើឱ្យពួកគាត់មានក្តីបារម្ភពីសុវត្ថិភាពផ្ទាល់ខ្លួនផងដែរ។
វីអូឌី នៅមិនទាន់សុំការអត្ថាធិប្បាយជុំវិញករណីនេះពីអ្នកនាំពាក្យក្រសួងការងារ និងបណ្តុះបណ្តាលវិជ្ជាជីវៈ លោក ហេង សួរ បានទេ នៅថ្ងៃនេះ។
កាលពីថ្ងៃទី៥ ខែវិច្ឆិកា ចុងសប្តាហ៍មុននេះ រដ្ឋបាលរាជធានីភ្នំពេញ បានស្នើឱ្យក្រុមកូដករក្រុមហ៊ុនណាហ្គាវើលដ៍ ផ្អាកធ្វើកូដកម្ម ខណៈកម្ពុជាជាម្ចាស់ផ្ទះរៀបចំកិច្ចប្រជុំកំពូលអាស៊ាន ពីថ្ងៃទី១០ ដល់ថ្ងៃទី១៣ ខែវិច្ឆិកានេះ។ អាជ្ញាធរក៏បានព្រមានចាត់វិធានការច្បាប់ផងដែរ បើកូដករនៅបន្តការតវ៉ា ដែលធ្វើឱ្យប៉ះពាល់ដល់សន្តិសុខនិងសណ្ដាប់ធ្នាប់សង្គម អំឡុងពេលកិច្ចប្រជុំកំពូលអាស៊ាននេះ។
អភិបាលរងរាជធានីភ្នំពេញ លោក កើត ឆែ មានប្រសាសន៍ថា ប្រសិនបើកូដករណាហ្គានៅបន្តធ្វើកូដកម្មអំឡុងពេលកម្ពុជារៀបចំកិច្ចប្រជុំកំពូលអាស៊ាន នោះពួកគេនឹងប្រឈមផ្លូវច្បាប់។
លោកថា៖ «គាត់ធ្វើទៅ ប៉ុន្តែគាត់នឹងទទួលខុសត្រូវផ្លូវច្បាប់បន្តទៀតទៅ មានអី! ព្រោះយើងបានជម្រាបគាត់អស់ហើយ»។
ក្រោយពីការធ្វើកូដកម្មជាង១០ខែមកនេះ កូដករណាហ្គាវើលដ៍ជិត១០រូបហើយ ត្រូវបានសាលាដំបូងរាជធានីភ្នំពេញ កោះហៅឱ្យចូលបំភ្លឺ ក្រោមបណ្តឹងរបស់ក្រុមហ៊ុន។
ប្រធានសម្ព័ន្ធសហជីពកម្ពុជា អ្នកស្រី យ៉ាង សុភ័ណ្ឌ មានប្រសាសន៍ថា រដ្ឋាភិបាល និងអាជ្ញាធរ ត្រូវដោះស្រាយវិវាទការងារមួយនេះ ជាជាងចេញលិខិតកោះហៅ និងឱ្យកូដករផ្អាកធ្វើកូដកម្ម ទាំងដំណោះស្រាយមិនទាន់មានតម្លាភាពសម្រាប់ពួកគាត់នោះ។ មួយវិញទៀត អ្នកស្រីថា ការព្រមានចាត់វិធានការច្បាប់ទៅលើកូដករដែលតវ៉ាក្នុងអំឡុងពេលប្រជុំអាស៊ាននេះ ក៏មិនមែនជាដំណោះស្រាយដែរ ប៉ុន្តែវានឹងធ្វើឱ្យប៉ះពាល់ដល់មុខមាត់រដ្ឋាភិបាលទៅវិញទេ។
វិវាទការងារក្រុមហ៊ុនណាហ្គាវើលដ៍បានកើតឡើងជាង១ឆ្នាំមកហើយ ក្រោយពេលក្រុមហ៊ុននេះបានបញ្ឈប់បុគ្គលិកចំនួន១ ៣២៩នាក់ ក្នុងចំណោមបុគ្គលិកសរុបជាង៨ ០០០នាក់ពីការងារ ក្រោមហេតុផលថា «ជួបវិបត្តិហិរញ្ញវត្ថុដោយសារតែបញ្ហាជំងឺកូវីដ-១៩»។ យ៉ាងណា បុគ្គលិកដែលចេញធ្វើកូដកម្មរយៈពេល១០ខែមកនេះ អះអាងថា ការបញ្ឈប់នោះដោយសារថៅកែមានចេតនារំលាយសហជីពការពារសិទ្ធិកម្មករឱ្យអស់ពីក្រុមហ៊ុនមួយនេះ៕