កូដករណាហ្គា២នាក់ចូលបំភ្លឺនៅសាលាដំបូងរាជធានីភ្នំពេញ ក្រោមបណ្ដឹងរបស់ក្រុមហ៊ុន

កូដករ​ណាហ្គាវើលដ៍ប្រមាណ៣០នាក់បាន​នាំគ្នាទៅ​ប្រមូលផ្តុំនៅមុខ​សាលា​ដំបូងរាជធានីភ្នំពេញ ដោយ​ពួកគេ​​បាន​​កាន់​បដា​ដែលមានខ្លឹមសារ​​ថា «ខ្ញុំមកធ្វើជាសាក្សី» ក្នុងគោល​បំណង​លើក​ទឹក​ចិត្ត និងគាំទ្រដល់​សមា​ជិក​របស់​ខ្លួនដែល​ចូលទៅ​បំភ្លឺនៅសាលាដំបូងរាជធានីភ្នំពេញ ក្រោមបណ្ដឹងរបស់ក្រុមហ៊ុនណាហ្គាវើលដ៍ ថ្ងៃទី១៤ ខែវិច្ឆិកា ឆ្នាំ២០២២។ (ត្រាន់ តិចសេង)

កូដករណាហ្គាវើលដ៍ ២នាក់ បានចូលបំភ្លឺរួចរាល់នៅសាលាដំបូងរាជធានីភ្នំពេញ នៅថ្ងៃចន្ទនេះ ប៉ុន្តែ​នីតិវិធីរបស់តុលាការ​​បន្ត​យ៉ាង​ណាទៀត​​នោះ​ ទាំង​មេធាវីការពារក្ដី និងកូដករ នៅមិនទាន់​ដឹង​នៅឡើយទេ ដោយ​ត្រូវរង់ចាំកូដករ​​ផ្សេង​ទៀតចូលឆ្លើយបំភ្លឺជាបន្តបន្ទាប់នាពេលខាងមុខទៀតសិន។

នៅថ្ងៃនេះ កូដករ​ណាហ្គាវើលដ៍​២នាក់​ រួ​​​​ម​មា​ន កញ្ញា សុខ ថាវុធ និងអ្នកស្រី នេត ចរិយា ក្នុង​នោះ មាន​​កូដករ​ម្នាក់​ចូល​បំភ្លឺ​នៅម៉ោង៩កន្លះព្រឹកនេះ និងម្នាក់ទៀតនៅ​ម៉ោង២កន្លះ​រសៀល​ ក្រោម​បណ្តឹង​របស់​​​​ក្រុមហ៊ុន ពី​បទ «រំលោភលើលំនៅឋាន, ធ្វើឱ្យខូចខាតដោយចេតនាមានស្ថានទម្ងន់ទោស និងចាប់ឃុំឃាំងនិងបង្ខាំងដោយខុសច្បាប់»

ក្រោយ​​ពីបានចូលទៅ​បំភ្លឺ​​រួចមក​​​ កញ្ញា សុខ​ ថាវុធ បានថ្លែងប្រាប់អ្នកសារព័ត៌មានវីអូឌី​ថា កញ្ញា​​ហាក់​​មិន​យល់​​ចំពោះ​​​​ពាក្យ​បណ្ដឹង​របស់​ក្រុមហ៊ុន​​ណាហ្គាវើលដ៍​ ដែលចោទប្រកាន់​លើ​កញ្ញា​ និង​​កូដករដទៃ​ទៀត ​ពាក់ព័ន្ធនឹង​​បទ «រំលោភលើ​លំនៅឋាន» ​ដោយសារ​​​ក្រុម​ហ៊ុន​បន​ល្បែង​​មួយ​​នេះ​​មិនមែនជា​លំនៅឋាននោះទេ​។​

កញ្ញាបន្ថែមថា ​សម្រាប់​​ការចោទពីបទ «ធ្វើ​​ឱ្យ​​ខូចខាតដោយចេតនាមាន​ស្ថានទម្ងន់ទោស» និង «ចាប់​ឃុំឃាំង​និងបង្ខាំងដោយខុសច្បាប់» ​នោះ ​គឺ​ជាការ​ចោទដោយមិនសមហេតុផល​នោះដែរ​ ព្រោះ​ថា ​​​​កូដករ​មិនដែល​ធ្វើឱ្យ​ខូចខាត​ទ្រព្យ​សម្បត្តិ​ណាមួយឡើយ​។

កញ្ញា​ថា៖ «ក្រុមកូដករហ្នឹង​ថា​​បាន​ឃាំង​បុគ្គលិក ​ហើយនឹងភ្ញៀវ មិនបានចេញចូល!​ តែខ្ញុំសូមបញ្ជាក់ថា​ ពួកខ្ញុំគ្មានសិទ្ធិទៅ​បង្ខាំង​បុគ្គលិកនិងភ្ញៀវទេ គឺថៅកែ​ដែល​ប្រាប់ទៅសន្តិសុខក្រុមហ៊ុនណាហ្គាវើលដ៍​បិទច្រកមិនឱ្យ​បុគ្គលិក​ហើយនឹងភ្ញៀវ​ចេញ​ចូល។​ ខាងកូដករ មិនមែនទេ គឺ​​ខ្ញុំកាន់បដា​នៅមុខក្រុមហ៊ុនណាហ្គាវើលដ៍តែប៉ុណ្ណោះ​»។

កញ្ញា សុខ​ ថាវុធ​ បន្ថែមថា ​ការដាក់ពាក្យ​បណ្ដឹង​របស់​ម្ចាស់​ក្រុមហ៊ុនបនល្បែង​នេះ ​ក្នុងគោលបំណ​​ង​​ឱ្យ​កូដករ​ឈប់តវ៉ា​ តែ​យ៉ាងណា ​កញ្ញាថា​​ ការចោទ​បែបនេះមិន​អាច​បញ្ឈប់​សកម្មភាព​តវ៉ា​​ដោយ​​អហិង្សា​របស់​ក្រុម​កូដករ​​​បាន​នោះ​ទេ​។

កញ្ញាថា​៖​ «ធ្វើអ៊ីចឹង​ដើម្បីឱ្យប្រព័ន្ធតុលាការ​ ដើម្បីឱ្យពួកខ្ញុំ​ភ័យ​ខ្លាច​ កូដករដទៃ​ទៀត​ឃើញ​​ខ្ញុំមកសាលាដំបូង​រាជធានីភ្នំពេញ​ទៀត​ ​គេខ្លាច ​គេមិនហ៊ាន​ឱ្យខ្ញុំធ្វើ​កូដកម្ម​អ៊ីចឹង​ តែសម្រាប់ខ្ញុំ គឺអត់ខ្លាចទេ​ ខ្ញុំនឹងបន្តធ្វើកូដកម្មដូចធម្មតា​»។

ចំណែក​មេធាវី​ការពារក្តី​ឱ្យ​​កូដករណាហ្គាវើលដ៍​ អ្នកស្រី​ ស៊ឹម​ សោភា​ នៅ​មិនទាន់​អាច​ឆ្លើយតប​​​បាន​នៅឡើយទេជុំវិញករណីនេះ​ ដោយអ្នកស្រីថា សំណុំរឿងនេះកំពុង​​ស្ថិត​​ក្នុង​ដំណាក់​​កាល​នៃ​​ការ​​ឆ្លើយបំភ្លឺ​ទៅ​កាន់​​តុលាការនៅឡើយ​​ ខណៈនៅមាន​​កូដករចំនួន​៦នាក់​ទៀត​ដែល​នឹង​ត្រូ​វ​ចូល​ទៅ​​​​​ឆ្លើយបំភ្លឺ​នៅតុលាការ​បន្ថែមទៀត​​​​។

អ្នកស្រីថា​៖ «ខ្ញុំគ្រាន់តែចង់ជម្រាបថា ​គាត់ឆ្លើយបំភ្លឺ​ពាក់​ព័ន្ធនឹង​បណ្ដឹងក្រុមហ៊ុន​ដែលប្ដឹងគាត់​ ហើយនីតិវិធី​ផ្សេងទៀត​​ហ្នឹង​​ តំណាងអយ្យការ​នឹង​ហៅសួរបន្តៗ​រហូតដល់​អ្នកទទួលដីកា​កោះជាផ្លូវការហ្នឹង​»។

វី​អូឌី ​មិនអាច​សុំការ​ឆ្លើយ​តប​​ពី​អ្នកនាំពាក្យ​អយ្យការ​អមសាលា​ដំបូងរាជធានីភ្នំពេញ​ លោក ប្លង់​ សុផល​ ​​បាន​ទេ​ នៅថ្ងៃ​ចន្ទនេះ​។

នៅអំឡុងពេលកូដករ២នាក់ចូលទៅបំភ្លឺនោះដែរ ​កូដករ​ណាហ្គាវើលដ៍ប្រមាណ៣០នាក់បាន​នាំគ្នាទៅ​ប្រមូលផ្តុំនៅមុខ​សាលា​ដំបូងរាជធានីភ្នំពេញផងដែរ ដោយ​ពួកគេ​​បាន​​កាន់​បដា​ដែលមានខ្លឹមសារ​​ថា «ខ្ញុំមកធ្វើជាសាក្សី» ក្នុងគោល​បំណង​លើក​ទឹក​ចិត្ត និងគាំទ្រដល់​សមា​ជិក​របស់​ខ្លួនដែល​ចូលទៅ​បំភ្លឺនោះ។

​​អ្នក​នាំ​ពាក្យ​សមាគម​​ការពារ​សិទ្ធិ​មនុស្ស​អាដហុក លោក ស៊ឹង សែន​ករុណា មានប្រសាសន៍ថា តាមនីតិវិធី នៅពេលដែលមានបណ្តឹងពីភាគីវិវាទ​ណាមួយនោះ គឺតុលាការ​ត្រូវ​​កោះហៅ​ភាគី​ម្ខាងទៀតទៅឆ្លើយ​​បំភ្លឺ។​ តែយ៉ាងណា ​លោកស្នើដល់​តុលាការ​ធ្វើការ​ស៊ើ​ប​អង្កេត​​ឱ្យ​បានគ្រប់​​ជ្រុង​ជ្រោយ​ និងដើមចម​ដែលនាំឱ្យ​​​ក្រុមកូដករ​​ផ្ទុះការ​​​តវ៉ា​រហូតដល់​​ត្រូវ​​រង​​បណ្ដឹង​​នៅពេល​​​នេះ​។

លោកថា៖ «ពេលវេលា​ជាយូរមក​ហើយ​ ទើបមានបណ្ដឹងនេះ​​កើតមាន​​ឡើង ហើយ​​​សុំ​​​ឱ្យមានការ​ពិនិត្យ​ [ថា]តើ​ក្រុមហ៊ុន​ណាហ្គា​ជា​លំនៅឋាន ​ឬជា​ក្រុមហ៊ុន​ដែល​រកនូវចំណូល។​ ហើយបើយើងពិនិត្យ​មើលសកម្មភាព​ ​កូដករ​​​គឺ​គាត់​បាន​ធ្វើ​កូដ​កម្ម​ដោយ​សន្តិវិធី​ ហើយបានធ្វើ​សមស្រប​តាម​ច្បាប់​ស្ដីពីកូដកម្ម»។

ក្រោយ​ពីការ​​ធ្វើ​កូដ​កម្ម​ជាង​១០ខែ​មក​នេះ កូដករណាហ្គាវើលដ៍​​ជិត១០រូប​ហើយ ត្រូវ​​បានសាលា​​​​​ដំបូង​រាជ​ធានី​ភ្នំពេញ កោះហៅឱ្យចូលបំភ្លឺ ក្រោម​បណ្តឹង​របស់ក្រុមហ៊ុន​។

វិវាទ​​​ការ​ងារ​​ក្រុម​ហ៊ុន​ណាហ្គា​វើលដ៍បាន​កើត​ឡើង​​ជា​ង​១ឆ្នាំមក​ហើយ ក្រោយ​ពេល​​ក្រុ​ម​ហ៊ុន កាស៊ីណូមួយ​នេះបាន​បញ្ឈប់​​​បុគ្គលិក​ចំនួន១ ៣២៩នាក់ ក្នុង​ចំណោម​​បុគ្គលិក​សរុ​ប​ជាង៨ ០០០នាក់ពី​ការ​ងារ ក្រោមហេតុផល​​ថា «ជួប​វិបត្តិ​ហិរញ្ញ​វត្ថុ​ដោយ​សារ​តែបញ្ហា​ជំងឺ​កូវីដ-១៩»

យ៉ាងណា បុគ្គលិកដែល​ចេញធ្វើ​កូដកម្មរយៈពេល១០ខែ​មក​នេះ អះអាងថា ការបញ្ឈប់នោះដោយ​សារ​ថៅកែមា​ន​ចេតនា​រំលាយ​សហជីព​ការ​ពារ​សិទ្ធិកម្មករ​​ឱ្យអស់ពីក្រុមហ៊ុនមួយនេះ៕

រក្សាសិទ្វិគ្រប់យ៉ាងដោយ ស៊ីស៊ីអាយអឹម

សូមបញ្ជាក់ថា គ្មានផ្នែកណាមួយនៃអត្ថបទ រូបភាព សំឡេង និងវីដេអូទាំងនេះ អាចត្រូវបានផលិតឡើងវិញក្នុងការបោះពុម្ពផ្សាយ ផ្សព្វផ្សាយ ការសរសេរឡើងវិញ ឬ ការចែកចាយឡើងវិញ ដោយគ្មានការអនុញ្ញាតជាលាយលក្ខណ៍អក្សរឡើយ។
ស៊ីស៊ីអាយអឹម មិនទទួលខុសត្រូវចំពោះការលួចចម្លងនិងចុះផ្សាយបន្តណាមួយ ដែលខុស នាំឲ្យយល់ខុស បន្លំ ក្លែងបន្លំ តាមគ្រប់ទម្រង់និងគ្រប់មធ្យោបាយ។ ជនប្រព្រឹត្តិ និងអ្នកផ្សំគំនិត ត្រូវទទួលខុសត្រូវចំពោះមុខច្បាប់កម្ពុជា និងច្បាប់នានាដែលពាក់ព័ន្ធ។

អត្ថបទទាក់ទង

សូមផ្ដល់មតិយោបល់លើអត្ថបទនេះ

VODEnglish.news

VODEnglish.news

Everybody Well-Informed, Everybody Empowered