ពលរដ្ឋ​ជាង​២០០​គ្រួសារ​នៅ​ខេត្តសៀមរាប រុះរើ​តង់​ពី​ដី​ជម្លោះ​ទាំង​យប់​ក្រោយ​អាជ្ញាធរ​គំរាម​ប្រើ​កម្លាំង​បង្ក្រាប

អ្នក​ភូមិដែលមានជម្លោះដីធ្លីបាននាំគ្នាបោះតង់លើដីរៀងៗខ្លួនដើម្បី​ស្នាក់​នៅ ក្រោយការចរចារកដំណោះស្រាយគ្មានលទ្ធផល ដោយនៅម៉ោងប្រហែល១០យប់ អាជ្ញាធរពាក់ព័ន្ធបានចុះមកដេញពលរដ្ឋ​ចេញ និងគំរាមប្រើកម្លាំងបង្ក្រាប បើពលរដ្ឋមិនព្រមចាកចេញ ថ្ងៃទី១៤ ខែវិច្ឆិកា ឆ្នាំ២០២២។ (ផ្ដល់ឱ្យ)

ប្រជាពលរដ្ឋចំនួន​២១០​​គ្រួសារ ​រស់​​​នៅ​ភូមិ​ស្នា​​សង្គ្រាម ឃុំ​​បល្ល័ង្ក ស្រុក​ប្រាសាទ​បាគង ខេត្តសៀមរាប ដែលកំពុងមានជម្លោះដីធ្លីជាមួយអាជ្ញាធរជាតិអប្សរា បានរុះរើតង់ពីដីជម្លោះទាំងយប់ ក្រោយអាជ្ញាធរគំរាមប្រើកម្លាំងបង្ក្រាប។

កាលពីថ្ងៃទី១៤ ខែវិច្ឆិកា ឆ្នាំ២០២២ ម្សិលមិញ អ្នកភូមិ២១០គ្រួសារ នៅស្រុកប្រាសាទបាគង ឃុំបល្ល័ង្ក ដែល​មាន​ដី​អាស្រ័យផល១៦០​ហិកតា​​​​​ នៅ​​ភូមិ​ធម្មជាតិ​រុនតា​ឯក ឃុំ​រុន​តាឯក ស្រុក​បន្ទាយ​ស្រី បាននាំគ្នាទៅបោះតង់ស្នាក់នៅលើដីជម្លោះ ក្រោយគ្មាន​ដំណោះ​ស្រាយ​ពី​អាជ្ញាធរពាក់ព័ន្ធ។

លោក សំ មុំ ជាពលរដ្ឋរស់នៅភូមិស្នាសង្គ្រាម ប្រាប់វីអូឌីនៅថ្ងៃអង្គារនេះថា កាលពីឆ្នាំ២០០៥ អាជ្ញាធរជាតិអប្សរា បានហ៊ុមព័ទ្ធយកដីស្រែរបស់ពួកគាត់អស់​១៦០ហិកតា តាំង​​ពី​ឆ្នាំ​២០០៥ ដោយ​សន្យាផ្តល់​សំណង​ជូន​ពួក​គាត់​ពី ​៥០០​ដុល្លារ ទៅ៧០០​ដុល្លារ​ ក្នុង​១ហិកតា ប៉ុន្តែរហូតមកដល់ឆ្នាំ២០២២ ស្ថាប័នមួយនេះពុំបានផ្តល់សំណងជូនពលរដ្ឋឡើយ។

ពលរដ្ឋរូបនេះបន្តថា កាលពីម្សិលមិញ អាជ្ញាធរស្រុក ខេត្ត និងអាជ្ញាធរជាតិអប្សរា បានជួបជាមួយអ្នកភូមិជាថ្មីទៀត ដើម្បីស្វែង​រកដំណោះស្រាយបញ្ហាដីធ្លីនេះ ប៉ុន្តែពុំមានលទ្ធផលល្អណាមួយឡើយ។ លោកថា ក្រោយគ្មានដំណោះស្រាយនេះ អ្នក​ភូមិបាននាំគ្នាបោះតង់លើដីរៀងៗខ្លួន ដើម្បី​ស្នាក់​នៅ ប៉ុន្តែម៉ោងប្រហែល១០យប់ អាជ្ញាធរពាក់ព័ន្ធបានចុះមកដេញពលរដ្ឋ​ចេញ និងគំរាមប្រើកម្លាំងបង្ក្រាប បើពលរដ្ឋមិនព្រមចាកចេញ។

លោកបន្ថែមថា៖ «យប់មិញនេះ អ្នកភូមិយើងបាននាំគ្នាដេកនៅលើដីយើង នៅភូមិអភិវឌ្ឍន៍រុនតាឯកហ្នឹងឯង ហើយមានកម្លាំងប្រជាការពារភូមិ កម្លាំងសមត្ថកិច្ច គាត់មកពីភូមិ គាត់មកសម្របសម្រួលអត់ឱ្យប្រជាពលរដ្ឋដេកនៅនោះទេ។ គាត់​ថា បើ​ប្រជាពលរដ្ឋអត់ព្រមចេញ​ពី​ក្នុង​នោះទេ គាត់​នឹង​ប្រើក​ម្លាំង​សមត្ថកិច្ច​ឱ្យរុះរើខ្ទមប្រជាពលរដ្ឋដែលបោះតង់ដេក​នៅ​ទីនោះ។ ពួកខ្ញុំក៏ទទួលសំណើរបស់គាត់ ប៉ុន្តែពួកខ្ញុំស្នើឱ្យគាត់ដោះស្រាយបញ្ហាដីធ្លីនេះជូនពួកខ្ញុំឱ្យបានឆាប់»

ពលរដ្ឋរស់នៅភូមិស្នាសង្គ្រាម លោក រ៉ាន រ៉ា អះអាងថា គ្រួសារលោក និង​អ្នកភូមិផ្សេងទៀត បានអាស្រ័យផលដោយធ្វើស្រែ​លើ​ដីមាន​ជម្លោះ​នោះ បន្តពីដូនតា ដោយពុំមានអាជ្ញាធរណាចេញបណ្ណកម្មសិទ្ធិជូនឡើយ ហើយត្រូវបានអាជ្ញាធរជាតិអប្សរាហ៊ុមព័ទ្ធយកអស់តាំងពីឆ្នាំ២០០៥ ដើម្បីបែងចែកឱ្យពលរដ្ឋរស់នៅក្នុងតំបន់អង្គរដោយខុសច្បាប់។

ពលរដ្ឋរូបនេះបន្តថា ជារឿងអយុត្តិធម៌មួយ ដែលអាជ្ញាធរជាតិអប្សរាយកដីធ្លីរបស់ពួកគាត់ទៅ​បែងចែកទៅពលរដ្ឋផ្សេង ខណៈពួកគាត់កំពុងខ្វះខាតដីធ្លីសម្រាប់បង្ក​បង្កើនផល។ លោកថា អ្នកភូមិមានដីចន្លោះពី២ទៅ៥ហិកតាប៉ុណ្ណោះសម្រាប់​​​ធ្វើស្រែចិញ្ចឹមជីវិត។

លោក រ៉ាន រ៉ា ឱ្យដឹងថា អ្នកភូមិបានតវ៉ានិងដាក់ញត្តិ​ជា​បន្ត​បន្ទាប់ តាំងពីក្រោយអាជ្ញាធរជាតិអប្សរាហ៊ុមព័ទ្ធយកដី ប៉ុន្តែការដោះស្រាយរបស់​អាជ្ញាធរតែងតែទាមទារឯកសារ និងបណ្ណកម្មសិទ្ធិ ខណៈអាជ្ញាធរខ្លួនឯង​មិន​ដែល​បា​នចុះធ្វើឯក​សារ​ទាំង​នោះ​ជូនពលរដ្ឋឡើយ។

លោកបន្ថែមថា៖ «ខ្ញុំសំណូមពរដល់សម្តេចនាយករដ្ឋមន្ត្រី ហ៊ុន សែន ជួយ​ដោះ​ស្រាយ​បញ្ហា​ដីធ្លី​ជូន​ពលរដ្ឋ​នៅ​ភូមិ​ស្នា​សង្គ្រាម​​ផង​ ដែលមានដីស្រែចម្ការ​តិចតួច ពេលដែលគេយកអស់ទៅ គ្មានដីសម្រាប់​បង្ក​បង្កើនផលទៀតទេ។ ពេល​ដែល​សម្តេច​មក​ខេត្ត​សៀមរាបម្តងៗ បងប្អូនប្រជាពលរដ្ឋយើង​ចង់ទៅជួបសម្តេច និង​ដាក់ញត្តិណាស់ ប៉ុន្តែអាជ្ញាធររារាំង ​មិន​ឱ្យ​ពួក​យើង​បានជួបទេ»

មេភូមិស្នាសង្គ្រាម​​ លោក ពេញ ព្រន អះ​អាង​ថា ពលរដ្ឋ​ពិត​ជា​បាន​អាស្រ័យ​លើ​ដី​ជម្លោះនោះ​បន្ត​ពីដូនតា ហើយត្រូវបានអាជ្ញាធរជាតិអប្សរាហ៊ុមព័ទ្ធយកនៅឆ្នាំ២០០៥មែន ដោយអាជ្ញាធរសន្យាផ្តល់សំណងចន្លោះពី​ ៥០០ដុល្លារ ទៅ ៧០០ដុល្លារ ​​ក្នុង​១ហិកតា។ លោក​ថា គ្រួសារលោកក៏បានប៉ះពាល់ដីស្រែ១ហិកតាកន្លះផងដែរ។

យ៉ាងណា លោក​ថា ដើម​ឡើយ​មាន​ពលរដ្ឋ​៤៤គ្រួសារ​ប៉ុណ្ណោះដែលមានបញ្ហាដីធ្លី ប៉ុន្តែនៅឆ្នាំ២០២២នេះ អ្នកភូមិបានបំបែកគ្រួសារឡើងដល់២១០គ្រួសារ។

លោកបន្ថែមថា៖ «អត់មាន​យុត្តិធម៌​ទេ គឺ​អយុត្តិធម៌ទាំងអស់ ព្រោះខ្ញុំ​បាទ​ជា​ម្ចាស់​ដី​ពិត​ប្រាកដ ដល់​គេ​យក​ដី​ខ្ញុំ​ទៅ​ឱ្យ​អ្នករស់​នៅខុស​ច្បាប់​នៅ​តំបន់​អង្គរ​ ខ្ញុំ​បាទអត់​សប្បាយ​ទេ។ សូមបញ្ជាក់ប្រាប់ប្រមុខរដ្ឋាភិបាលថា ប្រជាពលរដ្ឋខ្ញុំ ២១០​គ្រួសារ បាន​រង​គ្រោះដី​ធ្លី។ ពួកគាត់កាន់កាប់នោះ មិនមែនត្រឹមឆ្នាំ១៩៩៣ ឬ១៩៩៤នោះទេ គឺពួកយើងបានកាន់កាប់តាំងពីយូរមកហើយ»

អភិបាលរង​ស្រុក​ប្រាសាទ​បាគង​ លោក និម សុវ៉ាន ច្រានចោទ​ចំពោះការចោទប្រកាន់ ឬការលើកឡើង ដែល​ថាអាជ្ញាធរ​ទៅ​គំរាម​​កំហែង​​ពលរដ្ឋ។ លោកថា អាជ្ញាធរគ្រាន់តែសម្របសម្រួលឱ្យពលរដ្ឋរុះរើតង់ និងមិនឱ្យពលរដ្ឋដេកនៅតំបន់មានជម្លោះប៉ុណ្ណោះ ដោយរង់ចាំការជួយរកដំណោះស្រាយពីអាជ្ញាធរពាក់ព័ន្ធជាថ្មីទៀត។

អភិបាលរងស្រុករូបនេះអះអាង​ថា នៅថ្ងៃសុក្រចុងសប្ដាហ៍នេះ អាជ្ញាធរ​ស្រុក ខេត្ត និងអាជ្ញាធរជាតិអប្សរា នឹង​មក​សម្របសម្រួល​ជាមួយ​ពលរដ្ឋ​ម្តង​ទៀត ដើម្បីស្វែងរក​ដំណោះស្រាយដីធ្លីនេះ ប៉ុន្តែ​ដំណោះស្រាយបែបណានោះ លោកមិនអាច​ឆ្លើយ​​បញ្ជាក់បានទេ ដោយថា រឿងនេះ​បានកើតឡើងជាច្រើនឆ្នាំមក​ហើយ។

លោកបន្ថែមថា៖ «ឯកឧត្តមអភិបាលរងខេត្ត គាត់ចុះទៅសម្របសម្រួល ដោយឱ្យពួកគាត់រុះរើតង់​ចេញ​ពីកន្លែងនោះ ត្រលប់ទៅផ្ទះវិញ ​ដោយរង់ចាំថ្ងៃសុក្រពេលព្រឹក ថ្នាក់ដឹក​នាំ​ខេត្ត និង​ក្រុមការងារ នឹងចុះសម្របសម្រួលដោះស្រាយរឿងនេះម្តង​ទៀត​នៅ​ភូមិ​ឋាន។​ សមត្ថកិច្ចយើងចុះទៅសម្របសម្រួលនេះ​ អត់មានការគំរាមកំហែង អត់មានការប្រើហិង្សា អត់មានការ​សម្លុត​ពួក​គាត់​ទេ យើង​ជជែកពិភាក្សាជាមួយគាត់សើចលេងជាមួយគ្នាធម្មតាទេ»

មន្ត្រីសម្របសម្រួល​គម្រោងធុរកិច្ច​ និងសិទ្ធិមនុស្ស នៅមជ្ឈមណ្ឌលសិទ្ធិមនុស្ស​កម្ពុជា​ លោក វណ្ណ សុផាត យល់ថា ករណីពលរដ្ឋនាំគ្នាទៅបោះតង់ស្នាក់​នៅ​លើ​ដីទំនាស់​នោះ ដោយសារពួកគេអស់ជំនឿលើយន្តការដោះស្រាយដីធ្លីរបស់អាជ្ញាធរ។

មន្ត្រីសិទ្ធិមនុស្សរូបនេះបន្តថា យន្តការដោះស្រាយដីធ្លីរបស់រដ្ឋាភិបាលមានភាពអសកម្ម ខណៈគោលការណ៍​និង​យន្ត​ការដោះ​ស្រាយ​ដីធ្លី​មាន​ច្រើន ដូចជា គណៈកម្មការ​ដោះស្រាយ​ដីធ្លី​ស្រុក-ខេត្ត គណៈកម្មការដោះស្រាយដីធ្លីថ្នាក់ជាតិ និងអាជ្ញាធរជាតិដោះស្រាយទំនាស់ដីធ្លី ជាដើម។

លោក វណ្ណ សុផាត បានទទូច​ដល់​អាជ្ញាធរ​ពាក់​ព័ន្ធ​ ត្រូវដោះស្រាយដីធ្លីជូនពលរដ្ឋនៅភូមិ​ស្នាសង្គ្រាមនេះឱ្យបានសមរម្យ ដោយ​ឈរលើគោលការណ៍​យុត្តិធម៌ តម្លាភាព កុំមានការប្រើហិង្សាណាមួយ និងកុំមានការចោទប្រកាន់ និងចាប់ខ្លួនពលរដ្ឋ។

លោកបន្ថែមថា៖ «អាជ្ញាធរគួរតែមានដំណោះស្រាយសមរម្យ​ជូន​ពលរដ្ឋ ដើម្បី​ចៀស​វាង​ការ​ប៉ះ​ទង្គិចគ្នាណាមួ​យរវាងពលរដ្ឋនិងអាជ្ញាធរ ជាពិសេសអាជ្ញាធរស្រុកខេត្តត្រូវចរចារកដំណោះស្រាយដោយសន្តិវិធី​ជាមួយ​ប្រជា​ពលរដ្ឋ។ ហើយ​បើសិន​នៅ​អត់​មាន​ឆ្លើយ អាង​តែ​ប្រើក​ម្លាំងដើម្បីបង្ក្រាបពលរដ្ឋអ៊ីចឹង អាហ្នឹង​វា​ជាបញ្ហាមួយកាន់តែធ្ងន់ធ្ងរទៀត ពីបញ្ហា​រំលោភសិទ្ធិ​នៅស្រុក​យើង ជាពិសេសការរំលោភលើសិទ្ធិដីធ្លី និងលំនៅឋានរបស់ប្រជាពលរដ្ឋ»

ចាប់​តាំង​ពី​ពាក់​កណ្ដាល​​ឆ្នាំ​២០២២​មក អ្នកភូមិស្នាសង្គ្រាមរាប់សិបនាក់ ​រស់​​នៅ​ភូមិ​ស្នា​​​សង្គ្រាម ឃុំ​​បល្ល័ង្ក ស្រុក​ប្រាសាទ​បាគង ខេត្តសៀមរាប បាននាំគ្នា​ដាក់​ញត្តិ និង​តវ៉ា​ជា​បន្តប​ន្ទាប់​នៅតាម​ស្ថាប័នរដ្ឋមួយចំនួនក្នុងខេត្តនេះ ដើម្បីទាមទាររក​ដំណោះ​ស្រាយដីធ្លី ប៉ុន្តែអាជ្ញាធរពាក់ព័ន្ធទាំងនោះរុញដាក់គ្នា និងពន្យារពេលដោះស្រាយជាបន្តបន្ទាប់រហូតមកបច្ចុប្បន្ននេះ។

អ្នកការពារសិទ្ធិមនុស្សចាត់ទុកករណី​អាជ្ញាធរ​មិនទទួលសំណើរបស់ប្រជាពលរដ្ឋ និង​រុញដាក់​គ្នានេះថា ជា​ការ​​មិន​​ទទួលខុស​ត្រូវចំពោះប្រជាពលរដ្ឋដែលជាម្ចាស់ឆ្នោត ហើយថា ទង្វើនេះគឺផ្ទុយពីរដ្ឋធម្មនុញ្ញ​របស់​កម្ពុជា ដែលចែងថា អាជ្ញាធររដ្ឋ​​ត្រូវ​ទទួល​​យក​សំណើរបស់​​ប្រជាពលរដ្ឋទៅពិនិត្យ និងដោះស្រាយយ៉ាង​ហ្មត់​ចត់​ផង​នោះ៕

រក្សាសិទ្វិគ្រប់យ៉ាងដោយ ស៊ីស៊ីអាយអឹម

សូមបញ្ជាក់ថា គ្មានផ្នែកណាមួយនៃអត្ថបទ រូបភាព សំឡេង និងវីដេអូទាំងនេះ អាចត្រូវបានផលិតឡើងវិញក្នុងការបោះពុម្ពផ្សាយ ផ្សព្វផ្សាយ ការសរសេរឡើងវិញ ឬ ការចែកចាយឡើងវិញ ដោយគ្មានការអនុញ្ញាតជាលាយលក្ខណ៍អក្សរឡើយ។
ស៊ីស៊ីអាយអឹម មិនទទួលខុសត្រូវចំពោះការលួចចម្លងនិងចុះផ្សាយបន្តណាមួយ ដែលខុស នាំឲ្យយល់ខុស បន្លំ ក្លែងបន្លំ តាមគ្រប់ទម្រង់និងគ្រប់មធ្យោបាយ។ ជនប្រព្រឹត្តិ និងអ្នកផ្សំគំនិត ត្រូវទទួលខុសត្រូវចំពោះមុខច្បាប់កម្ពុជា និងច្បាប់នានាដែលពាក់ព័ន្ធ។

អត្ថបទទាក់ទង

សូមផ្ដល់មតិយោបល់លើអត្ថបទនេះ