កូដករណាហ្គាវើលដ៍ម្នាក់ទៀតបានចូលទៅបំភ្លឺតាមការកោះហៅជាលើកទី២របស់សាលាដំបូងរាជធានីភ្នំពេញ នៅរសៀលថ្ងៃទី១៦ ខែវិច្ឆិកានេះ ពាក់ព័ន្ធនឹងបទចោទប្រកាន់ចំនួន៣ ដែលក្រុមហ៊ុនល្បែងមួយនេះបានប្ដឹងរូបគាត់។
តាមរយៈដីកាកោះហៅលើកទី២ របស់ព្រះរាជអាជ្ញារងនៃអយ្យការអមសាលាដំបូងរាជធានីភ្នំពេញ លោក ឆាយ ហុង ចុះថ្ងៃទី១៦ ខែវិច្ឆិកានេះ បានឱ្យដឹងថា កូដករណាហ្គាវើលដ៍ អ្នកស្រី សាំង សុផល ត្រូវបានកោះហៅឱ្យចូលខ្លួនលើកទី២ ទៅកាន់អយ្យការអមសាលាដំបូងរាជធានីភ្នំពេញ នៅម៉ោង៣កន្លះរសៀលថ្ងៃពុធនេះ អំពីបទចោទចំនួន៣ រួមមាន រំលោភលើលំនៅឋាន, ធ្វើឱ្យខូចខាតដោយចេតនាស្ថានទម្ងន់ទោស និងចាប់ឃុំឃាំងនិងបង្ខាំងដោយខុសច្បាប់ ដែលក្រុមហ៊ុនបានប្តឹងអ្នកស្រី។
គិតត្រឹមរសៀលថ្ងៃពុធនេះ កូដករណាហ្គាវើលដ៍ចំនួន៤នាក់ហើយ ក្នុងចំណោម៩នាក់ ដែលរងការប្តឹងពីសំណាក់ក្រុមហ៊ុន បានចូលទៅបំភ្លឺរួចរាល់នៅតុលាការ ក្នុងនោះរួមមាន អ្នកស្រី សាំង សុផល កញ្ញា ជួប សោភ័ណ្ឌ កញ្ញា សុខ ថាវុធ និងអ្នកស្រី នេត ចរិយា។
វិវាទការងារក្រុមហ៊ុនណាហ្គាវើលដ៍បានកើតឡើងជាង១ឆ្នាំមកហើយ ក្រោយពេលក្រុមហ៊ុនល្បែងស៊ីសងនិងកាស៊ីណូមួយនេះបានបញ្ឈប់បុគ្គលិកចំនួន ១ ៣២៩នាក់ ក្នុងចំណោមបុគ្គលិកសរុបជាង៨ ០០០នាក់ពីការងារ ក្រោមហេតុផលថា «ជួបវិបត្តិហិរញ្ញវត្ថុដោយសារតែបញ្ហាជំងឺកូវីដ-១៩»។
យ៉ាងណា បុគ្គលិកដែលចេញធ្វើកូដកម្មរយៈពេលជិត១១ខែមកនេះ អះអាងថា ការបញ្ឈប់នោះគឺដោយសារថៅកែមានចេតនារំលាយសហជីពការពារសិទ្ធិកម្មករឱ្យអស់ពីក្រុមហ៊ុនមួយនេះ៕