អតីតប្រធានាធិបតីអាមេរិក លោក ដូណាល់ ត្រាំ (Donald Trump) បានប្រកាសថា លោកនឹងឈរឈ្មោះសម្រាប់ការបោះឆ្នោតជ្រើសរើសប្រធានាធិបតីជាថ្មីម្ដងទៀតនៅឆ្នាំ២០២៤ បន្ទាប់ពីបានចាញ់ដៃគូប្រកួតប្រជែងរបស់លោក គឺលោក ចូ បៃដិន (Joe Biden) នៅឆ្នាំ២០២០។ នេះបើយោងតាមការចេញផ្សាយរបស់ទីភ្នាក់ងារសារព័ត៌មាន Foxnews នៅថ្ងៃទី១៥ ខែវិច្ឆិកា ឆ្នាំ២០២២ ម្សិលមិញនេះ។
លោក Trump ដែលមកពីគណបក្សសាធារណរដ្ឋ និងជាមេដឹកនាំចលនា «ធ្វើឱ្យអាមេរិកអស្ចារ្យឡើងវិញ (Make America Great Again)» បានប្រកាសកាលពីថ្ងៃអង្គារថា លោកនឹងឈរឈ្មោះជាបេក្ខភាពប្រធានាធិបតីនៅឆ្នាំ២០២៤ ក្នុងអំឡុងពេលសុន្ទរកថានៅលំនៅឋានម៉ាអាឡាហ្គោ (Mar-a-Lago) របស់លោក នៅរដ្ឋ Florida។
លោក Trump បាននិយាយទៅកាន់ក្រុមអ្នកគាំទ្រថា៖ «ដើម្បីធ្វើឱ្យអាមេរិកអស្ចារ្យ និងរុងរឿងឡើងវិញ យប់នេះ ខ្ញុំសូមប្រកាសថា ខ្ញុំនឹងឈរឈ្មោះជាបេក្ខភាពប្រធានាធិបតីម្តងទៀត»។
លោកបន្ថែមថា៖ «ប៉ុន្តែដូចដែលខ្ញុំបានសន្យាកាលពីឆ្នាំ២០១៦ ថាខ្ញុំជាសំឡេងរបស់អ្នក។ រដ្ឋាភិបាលក្រុងវ៉ាស៊ីនតោន ចង់បំបិទមាត់យើង ប៉ុន្តែយើងនឹងមិនអនុញ្ញាតឱ្យពួកគេធ្វើដូច្នេះទេ។ អ្វីដែលយើងបានកសាងរួមគ្នាក្នុងរយៈពេល៦ឆ្នាំកន្លងមកនេះ គឺជាចលនាដ៏អស្ចារ្យបំផុតនៅក្នុងប្រវត្តិសាស្ត្រ ព្រោះវាមិនមែនជារឿងនយោបាយទេ។ វាជាសេចក្តីស្រឡាញ់របស់យើងចំពោះប្រទេសដ៏អស្ចារ្យនេះ ហើយយើងនឹងមិនបណ្ដោយឱ្យកិច្ចការនេះបរាជ័យឡើយ»។
លោកបន្ថែមទៀតថា៖ «ខ្ញុំកំពុងប្រកួតប្រជែងបេក្ខភាពប្រធានាធិបតី ព្រោះខ្ញុំជឿថា ពិភពលោកមិនទាន់បានឃើញភាពរុងរឿងពិតប្រាកដរបស់ប្រទេសនេះ [អាមេរិក] នៅឡើយទេ។ យើងមិនទាន់បានសម្រេចកិច្ចការដ៏ធំបំផុតនៅឡើយទេ។ ជឿឬអត់?»
លោកបន្តដោយបន្ទោសប្រធានាធិបតីអាមេរិក លោក ចូ បៃដិន (Joe Biden) ចំពោះស្ថានភាពបច្ចុប្បន្នរបស់អាមេរិក។
លោកថា៖ «យើងអាចសម្រេចកិច្ចការដ៏ធំជាងនេះ យើងត្រូវរំដោះខ្លួនចេញពីបញ្ហា។ ហើយពេលយើងអាចរំដោះខ្លួនចេញពីបញ្ហា អ្នកនឹងឃើញអ្វីកើតឡើងសម្រាប់សហរដ្ឋអាមេរិក ដែលគ្មានអ្នកណាម្នាក់នឹកស្មានដល់ឡើយ»។
គួរបញ្ជាក់ថា លោក Donald Trump បានឈ្នះតំណែងប្រធានាធិបតីជាលើកដំបូងក្នុងឆ្នាំ២០១៦ ពីដៃគូប្រកួតប្រជែងរបស់លោក គឺអតីតរដ្ឋមន្ត្រីការបរទេសអាមេរិក លោកស្រី ហ៊ីលឡារី គ្លីនតុន (Hillary Clinton)៕