សមត្ថកិច្ចខេត្តក្រចេះ កំពុងតាមស្វែងរកចាប់ខ្លួនអ្នកទោសចំនួន៣នាក់ដែលបានគាស់ចម្រឹងដែកបន្ទប់ធ្វើចត្តាឡីស័កក្នុងពន្ធនាគារ រួចរត់គេចខ្លួនបាត់ កាលពីម៉ោង១២យប់ ថ្ងៃទី១៥ ខែវិច្ឆិកា ម្សិលមិញ។
ស្នងការរងទទួលបន្ទុកផ្នែកព្រហ្មទណ្ឌ នៃស្នងការដ្ឋាននគរបាលខេត្តក្រចេះ លោក គុណ សុភ័ណ្ឌ បានប្រាប់វីអូឌីនៅថ្ងៃពុធនេះថា បុរសជាអ្នកទោសចំនួន៣នាក់ដែលទើបបញ្ជូនទៅឃុំខ្លួននៅពន្ធនាគារនោះ រួមមានឈ្មោះ ជឿន ស, ញ៉ិល តុលា និង ពេជ្យ ប្រឹមប្រិយ៍ ជាជនល្មើសក្នុងករណីលួច។ លោកបន្តថា ពួកគេបានគាស់ចម្រឹងដែកបង្អួចបន្ទប់ធ្វើចត្តាឡីស័ក ដើម្បីរត់គេចខ្លួន ប៉ុន្តែសមត្ថកិច្ចកំពុងស្វែងរកចាប់ខ្លួនពួកគេមកវិញ។
លោកថា៖ «អានេះយើងបានព័ត៌មានពីពន្ធនាគារ ឮថា៣នាក់ តាមពិតមួយបន្ទប់ហ្នឹងបន្ទប់ចត្តាឡីស័ក ធម្មតាអ្នកចូលទៅភ្លាម គេអត់ទាន់យកទៅក្នុងទេ គេមិនទាន់ដាក់ចូលទៅជាមួយទណ្ឌិតណាទេ គេដាក់ចត្តាឡីស័ក។ តាមព័ត៌មាន [ពួកគេទាំង៣នាក់]គាស់ចម្រឹងដែក ហើយលូនចេញ ដល់លូនចេញហើយយកភួយចងតគ្នា ហើយបោះឡើងជញ្ជាំងគុក»។
បើតាមស្នងការរងរូបនេះ នេះជាករណីទី១ហើយដែលមានអ្នកទោសលួចរត់គេចចេញពីពន្ធនាគារខេត្តក្រចេះនេះ។
គួរបញ្ជាក់ថា កន្លងមក ក៏ធ្លាប់មានករណីអ្នកទោសជាច្រើននាក់បានរត់គេចខ្លួនពីពន្ធនាគារខេត្តមួយចំនួន ដូចជា ខេត្តកំពង់ស្ពឺ កំពត កណ្តាល និងស្ទឹងត្រែង ជាដើម ប៉ុន្តែករណីទាំងនោះភាគច្រើនត្រូវបានសមត្ថកិច្ចតាមចាប់បានមកវិញ៕
