អង្គការណាតូ (NATO) និងមេដឹកនាំពិភពលោក នឹងជួបប្រជុំគ្នានៅថ្ងៃពុធនេះ បន្ទាប់ពីគ្រាប់រ៉ុក្កែតផលិតនៅរុស្ស៊ីបានធ្លាក់ទៅលើប្រទេសប៉ូឡូញដែលជាសមាជិករបស់អង្គការ NATO និងបានសម្លាប់មនុស្ស២នាក់ ដោយបារម្ភថា ជម្លោះរវាងរុស្ស៊ី និងអ៊ុយក្រែន អាចផ្ទុះឡើងលើព្រំដែនរបស់ខ្លួន[ប៉ូឡូញ]។ នេះបើយោងតាមការចេញផ្សាយរបស់ទីភ្នាក់ងារសារព័ត៌មាន Reuters នៅថ្ងៃទី១៦ ខែវិច្ឆិកា ឆ្នាំ២០២២នេះ។
តែយ៉ាងណា រុស្ស៊ីបានបដិសេធទទួលខុសត្រូវចំពោះករណីនេះ។
ក្រសួងការបរទេសប៉ូឡូញ បាននិយាយថា គ្រាប់រ៉ុក្កែតបានធ្លាក់នៅថ្ងៃអង្គារម្សិលមិញ វេលាម៉ោង៣និង៤០នាទីរសៀល លើភូមិសេវ៉ូដូវ (Przewodow) ដែលជាភូមិមួយនៅភាគខាងកើតប្រទេសប៉ូឡូញ ប្រហែល៦គីឡូម៉ែត្រពីព្រំដែនប្រទេសអ៊ុយក្រែន។
ប្រជាពលរដ្ឋម្នាក់ដែលសុំមិនបញ្ចេញឈ្មោះ បាននិយាយថា ជនរងគ្រោះទាំងពីរនាក់ជាបុរសនៅជិតកន្លែងថ្លឹងគ្រាប់ធញ្ញជាតិ។
សហរដ្ឋអាមេរិក និងសម្ពន្ធមិត្តលោកខាងលិច បាននិយាយថា ខ្លួនកំពុងស៊ើបអង្កេតករណីនេះ ប៉ុន្តែមិនបានបញ្ជាក់ពីរបាយការណ៍ដែលថាគ្រាប់រ៉ុក្កែតដែលផលិតដោយរុស្ស៊ីបានធ្លាក់លើភូមិសេវ៉ូដូវ (Przewodow) ឡើយ។
សមាជិកអង្គការ NATO ប្តេជ្ញាការពារសមូហភាពតាមមាត្រា៥របស់ខ្លួន ដូច្នេះការវាយប្រហាររបស់រុស្ស៊ីលើប៉ូឡូញ អាចធ្វើឱ្យជម្លោះរវាងរុស្ស៊ី និងអ៊ុយក្រែន កាន់តែរីកធំឡើង។
អ្នកការទូតអឺរ៉ុប២នាក់បាននិយាយថា ប្រទេសប៉ូឡូញបានស្នើសុំឱ្យមានកិច្ចប្រជុំអង្គការ NATO តាមមាត្រា៤ នៃសន្ធិសញ្ញាសម្រាប់ការពិគ្រោះយោបល់ក្នុងចំណោមសម្ពន្ធមិត្ត។ នាយករដ្ឋមន្ត្រីប៉ូឡូញ លោក ម៉ាតេអ៊ូស ម៉ូរ៉ាវីតស្គី (Mateusz Morawiecki) បាននិយាយថា ប្រទេសប៉ូឡូញ ក៏បានត្រៀមបង្កើតអង្គភាពយោធាមួយចំនួនផងដែរ។
នៅឯកិច្ចប្រជុំមេដឹកនាំក្រុមប្រទេស G20 ក្នុងប្រទេសឥណ្ឌូនេស៊ី មន្ត្រីសេតវិមាន បាននិយាយថា ប្រធានាធិបតីអាមេរិកលោក ចូ បៃដិន (Joe Biden) បានកោះប្រជុំមេដឹកនាំ G20 ស្តីពីករណីនេះ។
មន្ត្រីប៉ូឡូញបានព្យាយាមសម្រាលស្ថានការណ៍។ លោក Morawiecki បានអំពាវនាវឱ្យគ្រប់ភាគីទាំងអស់រក្សាភាពស្ងប់ស្ងាត់ ហើយប្រធានាធិបតីប៉ូឡូញ លោក អនដ្រេ ឌូដា (Andrzej Duda) បាននិយាយថា មិនមានភស្តុតាងជាក់ស្តែងណាមួយដែលបង្ហាញថានរណាជាអ្នកបាញ់មីស៊ីលនោះទេ។ លោកថា រដ្ឋាភិបាលកំពុងធ្វើការយ៉ាងស្ងប់ស្ងាត់ ហើយថាវាជាឧបទ្ទវហេតុមួយ។
មន្ត្រីអង្គការ NATO ម្នាក់ បាននិយាយថា បណ្តាប្រទេសសម្ពន្ធមិត្តកំពុងសម្របសម្រួលយ៉ាងជិតស្និទ្ធជាមួយប្រទេសប៉ូឡូញ។
សេតវិមានបាននិយាយថា លោក Biden បានប្រាប់លោក Duda តាមទូរសព្ទថា ទីក្រុងវ៉ាស៊ីនតោនមាន «ការប្តេជ្ញាចិត្តដ៏មុតមាំចំពោះអង្គការ NATO» ហើយនឹងគាំទ្រដល់ការស៊ើបអង្កេតរបស់ប្រទេសប៉ូឡូញ។
សារព័ត៌មាន Associated Press បានស្រង់សម្តីមន្ត្រីស៊ើបការណ៍សម្ងាត់អាមេរិកជាន់ខ្ពស់មួយរូប ដែលនិយាយថា គ្រាប់រ៉ុក្កែតដែលផ្ទុះនេះគឺផលិតនៅរុស្ស៊ី។
ទោះយ៉ាងណា នៅទីក្រុងវ៉ាស៊ីនតោន មន្ទីរបញ្ចកោណ សេតវិមាន និងក្រសួងការបរទេសសហរដ្ឋអាមេរិក បាននិយាយថា ខ្លួនមិនអាចបញ្ជាក់របាយការណ៍នេះបានទេ ហើយថាខ្លួនកំពុងធ្វើការជាមួយរដ្ឋាភិបាលប៉ូឡូញ ដើម្បីប្រមូលព័ត៌មានបន្ថែម។
ប្រទេសអាល្លឺម៉ង់ និងកាណាដា បាននិយាយថា ខ្លួនកំពុងតាមដានស្ថានការណ៍នេះ ហើយសហភាពអឺរ៉ុប ប្រទេសហូឡង់ និងន័រវែស បាននិយាយថា ខ្លួនកំពុងស្វែងរកព័ត៌មានលម្អិតបន្ថែម។ ប្រធានាធិបតីបារាំង លោក អេម៉ានុយអែល ម៉ាក្រុង (Emmanuel Macron) បានបញ្ជាឱ្យមានកិច្ចខិតខំប្រឹងប្រែងដើម្បីផ្ទៀងផ្ទាត់របាយការណ៍នេះ ខណៈចក្រភពអង់គ្លេសកំពុងពិនិត្យមើលរបាយការណ៍នេះជាបន្ទាន់៕