មេភូមិស្នាសង្គ្រាម ឃុំបល្ល័ង្ក ស្រុកប្រាសាទបាគង ខេត្តសៀមរាប ត្រូវបានថ្នាក់លើដកចេញពីតំណែង ក្រោយចេញមុខតវ៉ាទាមទារសិទ្ធិកាន់កាប់ដីធ្លីជាមួយប្រជាពលរដ្ឋជាង២១០គ្រួសារទៀត នៅតំបន់អភិវឌ្ឍន៍រុនតាឯក។
អ្នកភូមិ២១០គ្រួសារ នៅស្រុកប្រាសាទបាគង ឃុំបល្ល័ង្ក ដែលមានដីអាស្រ័យផល ១៦០ហិកតា នៅភូមិធម្មជាតិរុនតាឯក ឃុំរុនតាឯក ស្រុកបន្ទាយស្រី មានជម្លោះដីធ្លីជាមួយអាជ្ញាធរជាតិអប្សរាតាំងពីឆ្នាំ២០០៥ និងបានផ្ទុះការតវ៉ាទ្រង់ទ្រាយធំជាបន្តបន្ទាប់ទៀតនៅឆ្នាំ២០២២នេះ ដើម្បីទាមទាររកដំណោះស្រាយ ក្នុងនោះក៏មានមេភូមិស្នាសង្គ្រាម លោក ពេញ ព្រនផងដែរ។
ប្រធានភូមិស្នាសង្គ្រាម លោក ពេញ ព្រន ប្រាប់វីអូឌីថា រូបលោកត្រូវបានថ្នាក់លើដកចេញពីតំណែងហើយ នៅថ្ងៃទី១៦ ខែវិច្ឆិកានេះ ក្រោយរូបលោកចូលរួមតវ៉ាទាមទារសិទ្ធិដីធ្លីជាមួយប្រជាពលរដ្ឋ។
អតីតមេភូមិរូបនេះអះអាងថា កាលពីឆ្នាំ២០០៥ អាជ្ញាធរជាតិអប្សរា បានហ៊ុមព័ទ្ធយកដីស្រែរបស់ពួកគាត់អស់ ១៦០ហិកតា ដោយសន្យាផ្តល់សំណងជូនពួកគាត់ពី ៥០០ដុល្លារ ទៅ ៧០០ដុល្លារ ក្នុង១ហិកតា ប៉ុន្តែរហូតមកដល់ឆ្នាំ២០២២ ស្ថាប័នមួយនេះពុំបានផ្តល់សំណងជូនពលរដ្ឋឡើយ ក្នុងនោះគ្រួសាររបស់លោកក៏បានបាត់បង់ដីស្រែ១ហិកតាកន្លះផងដែរ។
លោកបន្ថែមថា៖ «ខ្ញុំសូមជម្រាបតាមត្រង់ បើប្រជាពលរដ្ឋគេសោកស្ដាយចំពោះការដកខ្ញុំចេញ គេស្ដាយខ្ញុំ។ បើចំពោះខ្ញុំជាមួយបុគ្គលដែលទម្លាក់ខ្ញុំ អត់សោកស្តាយទេ។ ដើម្បីបម្រើប្រជាពលរដ្ឋ គឺខ្ញុំអត់ខ្លាចទេ ព្រោះប្រជាពលរដ្ឋរបស់ខ្ញុំ អត់មានធ្វើអីខុសទេ អ្នកខុសគឺរំលោភយកដីធ្លីពលរដ្ឋ និងសន្យាខ្យល់ អត់ដោះស្រាយជូនប្រជាពលរដ្ឋ បានជាប្រជាពលរដ្ឋដាក់បណ្តឹងតវ៉ារហូតតាំងពីឆ្នាំ២០០៥ ដល់ឆ្នាំ២០២២»។
លោក សំ មុំ ជាពលរដ្ឋរស់នៅភូមិស្នាសង្គ្រាម អះអាងថា មេភូមិស្នាសង្គ្រោម លោក ពេញ ព្រន តែងតែចេញមុខការពារផលប្រយោជន៍ជូនប្រជាពលរដ្ឋ ជាពិសេសរឿងដីធ្លី។ លោកថា ការដកតំណែងលោក ពេញ ព្រន ចេញពីមេភូមិ ជាការគំរាមកំហែងដល់រូបគាត់ និងពលរដ្ឋផ្សេងទៀត កុំឱ្យហ៊ានតវ៉ាទាមទារសិទ្ធិដីធ្លី ខណៈពួកគាត់កំពុងមានជម្លោះដីធ្លីជាមួយអាជ្ញាធរជាតិអប្សរា។
លោកបន្ថែមថា៖ «ព្រោះគាត់ [លោក ពេញ ព្រន] ក៏មានដីនៅក្នុងតំបន់នោះដែរ។ គាត់បានខ្នះខ្នែងជួយដល់ប្រជាពលរដ្ឋ ព្រោះប្រជាពលរដ្ឋបានបាត់បង់ដីធ្លីតំបន់អភិវឌ្ឍន៍រុនតាឯកហ្នឹង ប្រជាពលរដ្ឋបានបាត់បង់យូរមកហើយ បានជាគាត់ចេះតែជួយចង់ឱ្យប្រជាពលរដ្ឋ[ទទួលបាន]ដីធ្លីមកបង្កបង្កើនផលវិញហ្នឹង»។
យ៉ាងណា មេឃុំបល្ល័ង្ក អ្នកស្រី ឡែម ណាត បានបញ្ជាក់ថា ការបញ្ឈប់លោក ពេញ ព្រន ពីតំណែង ដោយសារប្រធានភូមិស្នាសង្គ្រាមរូបនេះមានកំហុសច្រើន ខណៈលោកបានកាន់តំណែងតាំងពីឆ្នាំ២០១៩មក។
អ្នកស្រីថា កំហុសទាំងនោះមានពាក់ព័ន្ធការបម្រើសេវាសាធារណៈ ដូចជា យកលុយពីប្រជាពលរដ្ឋពេលធ្វើឯកសារដីធ្លី និងការប្រមាថព្រះសង្ឃ និងថ្នាក់ដឹកនាំ ជាដើម ខណៈថ្នាក់ដឹកនាំឃុំបានណែនាំជាច្រើនដងហើយ ប៉ុន្តែមន្ត្រីរូបនោះមិនស្តាប់។
អ្នកស្រី ឡែម ណាត ថ្លែងថា៖ «គាត់ពាក់ព័ន្ធនឹងការប្រព្រឹត្តកំហុសឆ្គងលើការបម្រើសេវាសាធារណៈច្រើន ដូចខ្ញុំទទួលបានពាក្យបណ្តឹងរបស់ពលរដ្ឋនៅភូមិស្នាសង្គ្រាមហ្នឹងឯង ទាក់ទងនឹងការរត់ឯកសារច្បាប់ដី គាត់យកលុយគេមកចាយអស់អ៊ីចឹងទៅ គាត់អត់រត់ឯកសារឱ្យគេច្រើនខែហើយបង ហើយគាត់ចាយលុយគេអស់ទៅ។ មិនមែនតែមួយករណីទេ មានច្រើនករណីបង។ មួយទៀត គាត់ប្រមាថព្រះសង្ឃ ប្រមាថថ្នាក់ដឹកនាំ»។
មន្ត្រីសម្របសម្រួលគម្រោងធុរកិច្ច និងសិទ្ធិមនុស្ស នៃមជ្ឈមណ្ឌលសិទ្ធិមនុស្សកម្ពុជា លោក វណ្ណ សុផាត កត់សម្គាល់ថា អាជ្ញាធរភូមិឃុំ ដែលចូលតវ៉ាសិទ្ធិដីធ្លី និងការពារផលប្រយោជន៍ពលរដ្ឋ គឺពួកគេតែងតែរងការចោទប្រកាន់ពីថ្នាក់លើថា រឹងទទឹង មិនអនុវត្តតាមបញ្ជាថ្នាក់លើ និងលាបពណ៌ថាលម្អៀងទៅខាងបក្សនយោបាយ ជាដើម។ លោកថា នៅកម្ពុជា ករណីស្រដៀងគ្នានេះបានកើតឡើងជាច្រើនករណីមកហើយនៅតាមមូលដ្ឋាន។
មន្ត្រីសិទ្ធិមនុស្សរូបនេះចាត់ទុកករណីដកតំណែងមេភូមិស្នាសង្គ្រោមនេះថា ជាការគំរាមកំហែងបំបាក់ស្មារតី មិនឱ្យហ៊ានចេញតវ៉ា និងគំរាមដល់មន្ត្រីផ្សេងទៀតផងដែរ។
លោកថា៖ «ការដែលបាត់បង់ដីធ្លី ផ្ទះសម្បែងរបស់គាត់ ហើយនៅពេលដែលគាត់សុំដំណោះស្រាយ បែរជាចោទប្រកាន់គាត់ ដាក់បន្ទុកគាត់ ហើយដកគាត់ចេញពីតួនាទីមេភូមិ នេះគេហៅថាបំបាក់ស្មារតីគាត់។ អ៊ីចឹងមន្ត្រីណាក៏ដោយ ឱ្យតែជាប់ពាក់ព័ន្ធជាមន្ត្រីរាជការ ថ្នាក់ភូមិឃុំអី បើសិនមានបញ្ហា ទាល់តែគាត់មិនមាត់ ទើបបានសុខ។ ប៉ុន្តែធម្មតាទេ ពលរដ្ឋដែលរស់នៅអាស្រ័យដីស្រែចម្ការដែលជាចំណូលចាំបាច់សម្រាប់គ្រួសារ គាត់មិនអាចទ្រាំបានទេ ព្រោះគាត់អត់ប្រាក់ខែអ៊ីចឹង»។
កាលពីថ្ងៃទី១៤ ខែវិច្ឆិកា ឆ្នាំ២០២២ អ្នកភូមិ២១០គ្រួសារ នៅស្រុកប្រាសាទបាគង ឃុំបល្ល័ង្ក ដែលមានដីអាស្រ័យផល១៦០ហិកតា នៅភូមិធម្មជាតិរុនតាឯក ឃុំរុនតាឯក ស្រុកបន្ទាយស្រី បាននាំគ្នាទៅបោះតង់ស្នាក់នៅលើដីជម្លោះ ក្រោយគ្មានដំណោះស្រាយពីអាជ្ញាធរពាក់ព័ន្ធ ប៉ុន្តែបានរុះរើចេញទាំងយប់វិញ ក្រោយអាជ្ញាធរគំរាមប្រើកម្លាំងបង្ក្រាប ប្រសិនបើមិនព្រមរើចេញ៕