ប្រជាសហគមន៍ប្រមាណ៣០០នាក់ មកពីខេត្តចំនួន៣ បានប្រមូលផ្ដុំគ្នាដាក់ញត្តិនៅខុទ្ទកាល័យនាយករដ្ឋមន្ត្រី និងក្រសួងពាក់ព័ន្ធមួយចំនួនទៀត នៅរាជធានីភ្នំពេញ នាថ្ងៃព្រហស្បតិ៍នេះ ដើម្បីទាមទារឱ្យក្រសួងស្ថាប័នទាំងនោះពន្លឿនការដោះស្រាយបញ្ហាដីធ្លីជូនពួកគាត់។
សេចក្ដីប្រកាសព័ត៌មានរបស់ប្រជាសហគមន៍រងគ្រោះដោយការរំលោភដីធ្លី បានឱ្យដឹងថា ប្រជាពលរដ្ឋទាំងនោះមកពីសហគមន៍ស្រែប្រាំង បុស្សស្នោ និងសហគមន៍កំប្រើស ស្ថិតក្នុងស្រុកតំបែរ ស្រុកមេមត់ ខេត្តត្បូងឃ្មុំ និងសហគមន៍សាមគ្គីរមាសហែក ស្រុករមាសហែក ខេត្តស្វាយរៀង រួមនឹងសហគមន៍ដែលរងផលប៉ះពាល់ដី្លធ្លីនៅខេត្តកណ្ដាលផងដែរ។
សេចក្ដីប្រកាសព័ត៌មានបន្តថា ពលរដ្ឋទាំងនោះជួបជុំគ្នាដាក់ញត្តិនៅខុទ្ទកាល័យនាយករដ្ឋមន្ត្រី ក្រសួងរៀបចំដែនដី ក្រសួងមហាផ្ទៃ និងក្រសួងកសិកម្ម ដើម្បីទាមទារឱ្យមានកិច្ចអន្តរាគមន៍ដោះស្រាយបញ្ហាដីធ្លីដែលរងការរំលោភបំពាន និងការក្លែងបន្លំលើឯកសារនានា ជាដើម។
តំណាងពលរដ្ឋមកពីខេត្តត្បូងឃ្មុំ លោក ផន សុផល មានប្រសាសន៍នៅក្រោយការដាក់ញត្តិនៅក្រសួងមហាផ្ទៃថា ការដែលពួកគាត់ឡើងមកដាក់ញត្តិនៅក្រសួងស្ថាប័នទាំងនេះ ដោយសារតែបញ្ហាដីធ្លីរបស់ពួកគាត់បានអូសបន្លាយជិត១០ឆ្នាំមកហើយ នៅតែពុំទាន់មានដំណោះស្រាយ បើទោះជាវិវាទខ្លះ ក្រុមហ៊ុនឯកជនបានកាត់ឆ្វៀលដីឱ្យពលរដ្ឋវិញ ប៉ុន្តែអាជ្ញាធរនៅតំបន់នោះបែរជាគប់គិតជាមួយអ្នកមានលុយមានអំណាច ចង់រំលោភយកដីរបស់ពលរដ្ឋទៅវិញ។
ជុំវិញករណីវិវាទដីធ្លីនេះដែរ លោកអះអាងថាមានប្រជាពលរដ្ឋជាង១០០នាក់បានរងបណ្តឹងនៅតុលាការ និងតំណាងពលរដ្ឋ៤នាក់បានជាប់ពន្ធនាគារ ពាក់ព័ន្ធនឹងបទ «ញុះញង់ ធ្វើឱ្យខូចខាតដោយចេតនា និងកំហែងយក» ជាដើម ក្នុងនោះក៏មានរូបលោកផ្ទាល់ផងដែរ ត្រូវបានតុលាការផ្តន្ទាទោសដាក់ពន្ធនាគារ១ឆ្នាំ ពាក់ព័ន្ធនឹងបទ «ញុះញង់នៅលើបណ្ដាញសង្គម» ហើយលោកទើបនឹងត្រូវបានតុលាការដោះលែងឱ្យមានសេរីភាពវិញ ក្រោយអនុវត្តទោសចប់។
ករណីនេះ លោកបានស្នើដល់ក្រសួង ស្ថាប័នពាក់ព័ន្ធ ដែលពលរដ្ឋបានដាក់ញត្តិនៅថ្ងៃនេះ ជួយអន្តរាគមន៍ និងពន្លឿនការដោះស្រាយបញ្ហាដីធ្លីរបស់ពួកគាត់ឱ្យបានឆាប់ ដើម្បីឱ្យពលរដ្ឋមានដីធ្លីសម្រាប់បង្កបង្កើនផលចិញ្ចឹមជីវិតឡើងវិញ៕