រដ្ឋមន្ត្រីការពារជាតិសាធារណរដ្ឋឆែក លោកស្រី ចេណា សឺណូចូវ៉ា (Jana Cernochova) បាននិយាយកាលពីថ្ងៃពុធម្សិលមិញថា រដ្ឋាភិបាលប្រទេសឆែក គ្រោងនឹងហ្វឹកហ្វឺនទាហានអ៊ុយក្រែនចំនួន៤ ០០០នាក់ នៅឆ្នាំក្រោយនេះ។ នេះបើយោងតាមការចេញផ្សាយរបស់ទីភ្នាក់ងារសារព័ត៌មាន Reuters នៅថ្ងៃទី១៦ ខែវិច្ឆិកា ឆ្នាំ២០២២។
ក្រសួងការពារជាតិប្រទេសឆែក បានលើកឡើងថា ការហ្វឹកហ្វឺននឹងត្រូវធ្វើឡើងក្នុងរយៈពេលប្រហែល៤សប្ដាហ៍ ដែលមានទាហានរហូតដល់៨០០នាក់ចូលរួមក្នុងមួយវគ្គ ហើយចំណាយប្រាក់អស់៤១,៦០លានដុល្លារ។
សាធារណរដ្ឋឆែក បានគាំទ្រអ៊ុយក្រែនយ៉ាងខ្លាំង ចាប់តាំងពីការវាយប្រហាររបស់រុស្ស៊ីក្នុងខែកុម្ភៈឆ្នាំនេះ ហើយបានបញ្ជូនអាវុធធុនស្រាល និងធុនធ្ងន់ និងគ្រាប់រំសេវទៅកាន់ប្រទេសនេះ។
កម្មវិធីហ្វឹកហ្វឺននឹងត្រូវចាប់ផ្តើមជាមួយនឹងក្រុមទាហានដំបូងនៅឆ្នាំនេះ និងស្ថិតក្រោមគម្រោងហ្វឹកហ្វឺនរបស់សហភាពអឺរ៉ុប សម្រាប់អ៊ុយក្រែន។
រដ្ឋមន្ត្រីការបរទេសសហភាពអឺរ៉ុប បានយល់ព្រមបង្កើតបេសកកម្មមួយ ដើម្បីហ្វឹកហ្វឺនទាហានអ៊ុយក្រែនប្រហែល១៥ ០០០នាក់ និងផ្តល់មូលនិធិបន្ថែមចំនួន៥ ០០០លានអឺរ៉ូ សម្រាប់ការផ្តល់អាវុធដល់ទីក្រុងកៀវ (Kyiv) ក្នុងកិច្ចប្រជុំមួយក្នុងប្រទេសលុចសំបួ កាលពីថ្ងៃចន្ទ។
លោកស្រី Cernochova បាននិយាយថា អ៊ុយក្រែនបានបង្ហាញចំណាប់អារម្មណ៍ក្នុងការហ្វឹកហ្វឺនកងវរសេនាតូច ពេទ្យទាហាន កងវិស្វកម្ម និងកងទ័ពប្រយុទ្ធប្រឆាំងនឹងអាវុធគីមី។
សាធារណរដ្ឋឆែក ក៏នឹងបញ្ជូនទាហានចំនួន៥៥នាក់ដែលជាគ្រូបង្វឹក ឬសមាជិកនៃរចនាសម្ពន្ធបញ្ជាការនៃបេសកកម្មហ្វឹកហ្វឺនរបស់សហភាពអឺរ៉ុប ដែលបានគ្រោងទុកនៅក្នុងរដ្ឋសមាជិកសហភាពអឺរ៉ុបផ្សេងទៀត។
ទោះយ៉ាងណា ផែនការទាំង២នេះតម្រូវឱ្យមានការអនុម័តពីសភា៕
