ប្រព័ន្ធផ្សព្វផ្សាយមីយ៉ាន់ម៉ា បានរាយការណ៍នៅថ្ងៃព្រហស្បតិ៍នេះថា មេដឹកនាំយោធាមីយ៉ាន់ម៉ាបានដោះលែងលោក សៀន ថឺនែល (Sean Turnell) សេដ្ឋវិទូអូស្ត្រាលី និងជាអតីតទីប្រឹក្សាលោកស្រី អ៊ុងសាន ស៊ូជី (Aung San Suu Kyi) និងអ្នកទោសជិត៦ ០០០នាក់ផ្សេងទៀតពីពន្ធនាគារ។ នេះបើយោងតាមការចេញផ្សាយរបស់ទីភ្នាក់ងារសារព័ត៌មាន Reuters នៅថ្ងៃទី១៧ ខែវិច្ឆិកា ឆ្នាំ២០២២នេះ។
សារព័ត៌មាន Irrawaddy និង BBC ភាសាភូមា បានរាយការណ៍ថា លោកស្រី វីគី បូមែន (Vicky Bowman) អតីតឧបការីអង់គ្លេស និងលោក តូរូ គូបូតា (Toru Kubota) ដែលជាផលិតករភាពយន្តជនជាតិជប៉ុន ក៏ស្ថិតក្នុងចំណោមអ្នកដែលត្រូវបានដោះលែងផងដែរ។
លោក Turnell ត្រូវបានចោទប្រកាន់ពីបទ រំលោភបំពានច្បាប់រក្សាការសម្ងាត់របស់រដ្ឋ ខណៈលោកស្រី Bowman ត្រូវបានចោទប្រកាន់ពីបទ រំលោភបំពានលើច្បាប់អន្តោប្រវេសន៍ ហើយលោក Kubota ត្រូវបានចោទពីបទ បំបះបំបោរ និងបំពានច្បាប់ស្តីពីទំនាក់ទំនង។
លោកស្រី Bowman ត្រូវបានចាប់ដាក់ពន្ធនាគារជាមួយនឹងស្វាមីរបស់លោកស្រី ដែលជាសិល្បករជនជាតិភូមាដ៏ល្បីឈ្មោះម្នាក់ គឺលោក កូ តេន លីន (Ko Htein Lin)។
ប្រទេសមីយ៉ាន់ម៉ាបានស្ថិតក្នុងភាពចលាចលនយោបាយចាប់តាំងពីយោធាបានធ្វើរដ្ឋប្រហារកាលពីឆ្នាំមុន ដោយចាប់ខ្លួនមេដឹកនាំស៊ីវិល រួមទាំងលោកស្រី Aung San Suu Kyi កាលពីថ្ងៃទី១ ខែកុម្ភៈ ឆ្នាំ២០២១។
សារព័ត៌មានឯករាជ្យ Myanmar Now បានស្រង់សម្តីក្រុមប្រឹក្សាយោធាថា ការលើកលែងទោសត្រូវបានធ្វើឡើងដោយសារចំថ្ងៃបុណ្យជាតិមីយ៉ាន់ម៉ា។
សេចក្តីរាយការណ៍ព័ត៌មានបានបន្ថែមថា៖ «នៅថ្ងៃបុណ្យជាតិ ក្រុមប្រឹក្សាយោធាបានប្រកាសថា អ្នកទោសជិត៦ ០០០នាក់ត្រូវបានដោះលែង ក្នុងនោះមានទាំងជនបរទេស៤នាក់ និងតារាល្បីចំនួន១១នាក់»។
អ្នកនាំពាក្យរបបយោធា មិនបានលើកទូរសព្ទរបស់ទីភ្នាក់ងារសារព័ត៌មាន Reuters ដើម្បីសុំការអធិប្បាយបានឡើយ។
ក្រសួងការបរទេសអូស្ត្រាលី និងជប៉ុន មិនបានឆ្លើយតបភ្លាមៗចំពោះសំណើសុំការអធិប្បាយឡើយ៕
