ក្រសួងមហាផ្ទៃ​គ្រោង​ជួប​សង្គមស៊ីវិល​ពិភាក្សា​លើ​សេចក្ដី​ព្រាងច្បាប់​បទល្មើស​បច្ចេកវិទ្យា​ព័ត៌មាន

បុរស​ម្នាក់​កាន់​ទូរសព្ទ​របស់​ខ្លួន​ដែល​កំពុងតែ​ដំណើរការ​ចូល​ទៅ​ប្រើប្រាស់​កម្មវិធី​បណ្ដាញ​សង្គម​ហ្វេសប៊ុក។ (ហេង វិចិត្រ​)

​​​​មន្ត្រីជំនាញក្រសួងមហាផ្ទៃ គ្រោងជួបជាមួយមន្ត្រីអង្គការ​​សង្គមស៊ីវិលនៅក្នុងពេលឆាប់ៗនេះ ដើម្បី​ពិភាក្សានិង​ប្រមូល​យកធាតុ​​​​ចូល​​បំពេញ​​បន្ថែម​ លើខ្លឹ​ម​សារ​​​នៃ​​​សេចក្ដីព្រាងច្បាប់​ ស្តីពី «បទល្មើសបច្ចេកវិទ្យា» ដើម្បីឱ្យ​សេចក្ដីព្រាងច្បាប់នេះកាន់តែមានសុក្រឹតភាព​នៅពេ​ល​អនុម័ត។ 

​រដ្ឋលេខាធិការ​ក្រសួង​មហាផ្ទៃ ទទួលបន្ទុកក្រុមប្រឹក្សានីតិកម្ម​ លោក ប៊ុន ហុន បានឱ្យដឹងនៅថ្ងៃទី១៧ ខែវិច្ឆិកា ថា​​​ក្រសួង​មហាផ្ទៃ​គ្រោង​នឹង​រៀបចំជំនួប​​​​​ជាមួយ​​​​​អង្គ​​ការ​​សង្គម​ស៊ីវិល​ក្នុងពេលឆាប់ៗនេះ ដើម្បីពិភាក្សាគ្នា​លើ​សេចក្ដីព្រាងច្បាប់​បទល្មើស​បច្ចេកវិទ្យាព័ត៌មាននេះ​។

លោកថា​៖​ «ចាំមើលគេចេញកម្មវិធីសិន​ ព្រោះឥលូវគេត្រូវពិនិត្យ​កម្មវិធីសិន​ ចាំមើលសិន​»។​

សេច​ក្ដី​ព្រាង​ច្បាប់ស្ដីពី បទល្មើសបច្ចេកវិទ្យា (Cyber Crime Law) ត្រូវបា​នក្រសួងមហាផ្ទៃ​​​​​ចាប់​​ផ្ដើម​​​​តាក់​​​តែង​​​ឡើង​នៅឆ្នាំ២០១៦ និង​បានជួបប្រជុំពិភាក្សាជាបន្តបន្ទាប់រាប់សិបលើក​​ ក្នុង​កម្រិត​​​​កិច្ចប្រជុំជាមួយនាយកដ្ឋានជំនាញរបស់ក្រសួងមហាផ្ទៃ អន្តរ​ក្រសួង​ ព្រមទាំង​មានជំនួយ​ឧបត្ថម្ភ​ផ្នែក​បច្ចេកទេសពីក្រសួងយុត្តិធម៌សហរដ្ឋអាមេរិកផងដែរ។ នេះបើតាមការបញ្ជាក់​របស់លោក ប៊ុន ហុន នាពេលកន្លងមក។​

លោកបន្តថា ការដែលក្រសួង​​តាក់​តែង​​​សេច​ក្តី​ព្រាង​ច្បាប់​នេះ​ឡើង ដោយ​សារ​មាន​ក្តី​បារម្ភ​ពីបទល្មើស​បច្ចេក​វិទ្យា​កើនឡើង​ធ្វើឱ្យ​ប៉ះពាល់ដល់សន្តិសុខជាតិ និងសណ្តាប់ធ្នាប់សាធារណៈ ខណៈ​​វិស័យប​ច្ចេកវិទ្យា​​មាន​ការ​រីក​ចម្រើន​ ក្នុងនោះក៏មានបទល្មើសឧក្រិដ្ឋ​តាមប្រព័ន្ធបច្ចេកវិទ្យាកើនឡើងផងដែរ។

ក្នុងវេទិកាអាយស៊ីធី និងឌីជីថលកម្ពុជា ដែលរៀបចំឡើង​កាលពីថ្ងៃទី១៦ ខែវិច្ឆិកា នៅរាជធានី​​ភ្នំពេញ រដ្ឋលេខាធិការក្រសួងមហាផ្ទៃ លោក ហ៊ុយ វណ្ណៈ បានថ្លែង​ថា ទោះ​​​បីជាបច្ចុប្បន្ន​​ ក្រសួង​​មិនទា​ន់​កំណត់​​​ពេល​​វេលា​​​​នៃ​​ការ​ជួបពិភាក្សា​គ្នា​លើ​សេចក្ដីព្រាងច្បាប់​​ស្ដីពី​ «បទល្មើសបច្ចេកវិទ្យាព័ត៌មាន​» នេះ​ក្ដី តែ​ក្រសួង​នឹង​អនុញ្ញាត​ឱ្យ​​ភាគី​សង្គម​ស៊ីវិល​​បាន​លើក​ឡើង​ពីមតិយោបល់​ ​ដើម្បី​ជាធាតុចូល​បំពេញបន្ថែម​ក្នុងសេចក្តីព្រាងច្បាប់នេះ​​។

លោកថា៖ «ជាគោលការណ៍ គឺមាន​ហើយ! ​គឺ​គេបើកឱ្យពិ​គ្រោះ!​ ប៉ុន្តែខ្ញុំមិន​កំណត់​ពេលវេលា ​ប៉ុន្តែនឹងធ្វើ គ្រាន់តែ​មិនទាន់​ដាក់​ពេល​វេលា​។ ពួកគេ [អង្គការសង្គមស៊ីវិល] ជាប្រជាជនខ្មែរដែរ ​គ្រាន់តែការរំពឹងទុក ​គ្រាន់តែជាមតិ​ទាំងអស់មក​ហើយ តែ​​យក​ក​ម្រិតណាបាន​កម្រិត​ណា ​ចាំមើលជាក់ស្ដែង​»។

នាយកទទួលបន្ទុកកិច្ចការទូទៅ​​​ នៃ​អង្គការ​សិទ្ធិ​មនុស្ស​លីកាដូ លោក អំ សំអាត សាទរ​ការដែល​ក្រសួង​អនុញ្ញាតឱ្យសង្គមស៊ីវិល​ចូលរួមផ្តល់ជាមតិយោបល់​លើសេចក្តីព្រាងច្បាប់​នេះ។

លោកថា៖ «ហ្នឹង​ជារឿងល្អ​ ​​ដើម្បីឱ្យច្បាប់​ហ្នឹង​មាន​ធាតុ​ចូល​​គ្រ​ប់​ជ្រុង​ជ្រោយ​ ហើយ​មិន​​រំលោភ​បំពានលើ​​សិទ្ធិសេរីភាពជាមូលដ្ឋានរបស់ពលរដ្ឋ​ធ្ងន់ធ្ង​រ​»។

​នាយក​​ប្រតិបត្តិ​អង្គការ​តម្លាភាព​កម្ពុជា លោក ប៉ិច ពិសី ក៏បានសាទរដូចគ្នាដែរ ប៉ុន្តែលោក​ស្នើ​ដល់​ក្រសួង​​​ផ្ដល់​​សេចក្តីព្រាងច្បាប់នេះ​ដល់សង្គមស៊ីវិល នៅមុនកិច្ចប្រជុំ។

លោកបន្តថា ​​​​​​​ការ​ផ្ដល់​មតិ​នៃ​ការដាក់​នូវធាតុចូល​របស់ក្រុមអង្គការសង្គមស៊ីវិល ​នឹង​​ជួយ​​កែ​លម្អសេចក្តីព្រាងច្បាប់នេះឱ្យ​កាន់​តែប្រសើ​​រ​ មុន​​ពេល​ដែល​អនុម័ត​ឱ្យ​សាធារណជនប្រើប្រាស់​។

លោកថា៖ ​«​សំខាន់ខាងអង្គការសង្គមស៊ីវិលត្រូវការ​ព័ត៌មានពេញលេញ អំពី​សេចក្ដីព្រាងច្បាប់​ដែលត្រូវជជែកគ្នាហ្នឹង ដើម្បី​ធ្វើការឈ្វេងយល់​ ហើយ​ជាទូទៅអង្គការសង្គមស៊ីវិលតែងតែធ្វើការសហការជាក្រុម​ អ៊ីចឹងប្រសិនបើអង្គការសង្គមស៊ីវិលមានឯកសារហ្នឹង ​យើងអាចផ្ដល់ធាតុចូល​ប្រកបដោយប្រយោជន៍ដល់​ការតាក់តែងច្បាប់ហ្នឹង​»។

យោងតាម​របាយការណ៍មួយមាន​ចំណងជើងថា «សេរីភាពអ៊ិនធឺណិតនៅកម្ពុជា ជាច្រកទ្វារត្រួតពិនិត្យ» ពីមជ្ឈមណ្ឌលអាស៊ី (Asia Center) កាលពីឆ្នាំ​២០២១​ ដែលមានមូលដ្ឋាននៅទីក្រុងបាងកក បានបង្ហាញថា រដ្ឋាភិបាលកម្ពុជាកំពុងប្រើប្រាស់ច្បាប់ទាក់ទង ដើម្បីបង្ក្រាបអ្នកប្រឆាំងតាមប្រព័ន្ធអ៊ីនធឺណិត រួមទាំង​ការធ្វើវិសោធនកម្មនាពេលថ្មីៗនេះទៅលើច្បាប់រដ្ឋធម្មនុញ្ញ ច្បាប់ស្តី​ពីទូរគមនាគមន៍ ក្រមព្រហ្មទណ្ឌ ប្រកាសអន្តរក្រសួងលេខ១៧០ សេចក្តីព្រាងច្បាប់ស្តីពីបទល្មើសបច្ចេកវិទ្យា និងអនុក្រឹត្យថ្មីបំផុតស្តីពីច្រកទ្វារ​អ៊ីនធឺណិតជាតិ៕

រក្សាសិទ្វិគ្រប់យ៉ាងដោយ ស៊ីស៊ីអាយអឹម

សូមបញ្ជាក់ថា គ្មានផ្នែកណាមួយនៃអត្ថបទ រូបភាព សំឡេង និងវីដេអូទាំងនេះ អាចត្រូវបានផលិតឡើងវិញក្នុងការបោះពុម្ពផ្សាយ ផ្សព្វផ្សាយ ការសរសេរឡើងវិញ ឬ ការចែកចាយឡើងវិញ ដោយគ្មានការអនុញ្ញាតជាលាយលក្ខណ៍អក្សរឡើយ។
ស៊ីស៊ីអាយអឹម មិនទទួលខុសត្រូវចំពោះការលួចចម្លងនិងចុះផ្សាយបន្តណាមួយ ដែលខុស នាំឲ្យយល់ខុស បន្លំ ក្លែងបន្លំ តាមគ្រប់ទម្រង់និងគ្រប់មធ្យោបាយ។ ជនប្រព្រឹត្តិ និងអ្នកផ្សំគំនិត ត្រូវទទួលខុសត្រូវចំពោះមុខច្បាប់កម្ពុជា និងច្បាប់នានាដែលពាក់ព័ន្ធ។

អត្ថបទទាក់ទង

សូមផ្ដល់មតិយោបល់លើអត្ថបទនេះ

VODEnglish.news

VODEnglish.news

Everybody Well-Informed, Everybody Empowered