តុលាការកំពូលបដិសេធបណ្ដឹងសាទុក្ខអតីត និងមន្ត្រីការពារសិទ្ធិមនុស្សអាដហុក ៥រូប ដោយតម្កល់សាលដីកាតុលាការថ្នាក់ក្រោម ដែលបានផ្ដន្ទាទោសឱ្យពួកគាត់ជាប់ពន្ធនាគារម្នាក់ៗ ៥ឆ្នាំ ក្រោមបទចោទប្រកាន់ «សូកប៉ាន់សាក្សី និងសមគំនិតសូកប៉ាន់សាក្សី» ទុកជាបានការ។
បុគ្គលិក និងអតីតបុគ្គលិកសមាគមការពារសិទ្ធិមនុស្សអាដហុក ៥រូបនោះ រួមមាន លោក នី សុខា លោក យី សុខសាន្ត និងលោកស្រី លឹម មុន្នី និងអតីតមន្ត្រីអាដហុកចំនួន២រូបទៀត គឺលោក ណៃ វ៉ង់ដា និងលោក នី ចរិយា។
ប្រធានក្រុមប្រឹក្សាជំនុំជម្រះតុលាការកំពូល លោក និល ណុន នៅថ្ងៃសុក្រនេះ បានប្រកាសសាលដីកាដោយច្រានចោលបណ្ដឹងសាទុក្ខរបស់បុគ្គលិក និងអតីតបុគ្គលិកសមាគមអាដហុក ទាំង៥រូប ដែលស្នើសុំឱ្យតុលាការកំពូលទម្លាក់រាល់បទចោទប្រកាន់លើពួកគេ។
ក្រៅពីនោះ លោក និល ណុន ក៏បានបដិសេធបណ្ដឹងសាទុក្ខព្រះរាជអាជ្ញា ដែលប្ដឹងសុំឱ្យតុលាការជាន់ខ្ពស់ លុបចោលទោសព្យួរ ហើយមកដាក់ទោសលើបុគ្គលិក និងអតីតបុគ្គលិកសមាគមការពារសិទ្ធិមនុស្សអាដហុក ៥រូប វិញផងដែរ។ តែយ៉ាងណា ការសម្រេចបដិសេធរបស់ប្រធានក្រុមប្រឹក្សាជំនុំជម្រះនេះមិនបានបញ្ជាក់អំពីមូលហេតុឡើយ។
លោក យី សុខសាន្ត បុគ្គលិកសមាគមអាដហុក ដែលបានចូលស្ដាប់ការប្រកាសសាលដីកា បានបង្ហាញការសោកស្ដាយចំពោះការសម្រេចរបស់តុលាការកំពូល និងបានចាត់ទុកការសម្រេចរបស់តុលាការជាន់ខ្ពស់នេះ ថាហាក់មិនមានឆន្ទៈក្នុងការស្វែងរកយុត្តិធម៌ឱ្យអ្នកការពារសិទ្ធិមនុស្សឡើយ។
លោកថា៖ «ថ្ងៃនេះ ខ្ញុំមានការសោកស្ដាយចំពោះសេចក្ដីសម្រេចរបស់តុលាការកំពូល ដែលខ្ញុំគិតថាតុលាការកំពូលនឹងរកយុតិ្តធម៌ឱ្យក្រុមអ្នកធ្វើការងារសង្គមផ្នែកសិទ្ធិមនុស្ស ប៉ុន្តែផ្ទុយទៅវិញ តុលាការកំពូលបែរជាបដិសេធបណ្ដឹងសមាគមសិទ្ធិមនុស្សអាដហុក ដោយតម្កល់ឱ្យយើងមានទោសដដែល។ ចំណុចនេះ ខ្ញុំគិតថា តុលាការកំពូលហាក់មិនមានឆន្ទានុសិទ្ធិក្នុងការសម្រេចរកយុត្តិធម៌ឱ្យក្រុមអង្គការសង្គមស៊ីវិលដែលធ្វើការផ្នែកសិទ្ធិមនុស្សទេ»។
អ្នកនាំពាក្យសមាគមការពារសិទ្ធិមនុស្សអាដហុក លោក ស៊ឹង សែនករុណា បានលើកឡើងដែរថា ការមិនទម្លាក់ចោលបទចោទលើអ្នកទាំង៥រូបនេះ បានឆ្លុះបញ្ចាំងឱ្យឃើញពីការបំបាក់ស្មារតី និងឆន្ទៈរបស់អ្នកការពារសិទ្ធិមនុស្ស ដែលបានខិតខំជួយដល់ប្រជាពលរដ្ឋ និងសង្គមជាតិ ក្នុងវិស័យការពារសិទិ្ធមនុស្ស។
លោកថា៖ «ផ្ទុយទៅវិញ មិនមានការលើកទឹកចិត្ត ហើយជាការបង្ហាញឱ្យកាន់តែច្បាស់ថា ប្រព័ន្ធយុត្តិធម៌យើងទោះបីជាមាន៣ថ្នាក់ក៏ដោយ តាំងពីសាលាដំបូង មកដល់ឧទ្ធរណ៍ ហើយតុលាការកំពូល នៅតែមិនអាចរកយុត្តិធម៌នៅក្នុងរឿងមួយដែលបំប្លែងការពិតពីជនដែលចោទប្រកាន់មកលើអ្នកទាំង៥ហ្នឹង មិនមានភស្ដុតាងអ្វីក្រៅពីលិខិត៤សន្លឹក ហើយមិនដែលចូលមកសវនាការម្ដងណាសោះ បែរជាតុលាការយករឿងហ្នឹងមកពិចារណា ខណៈមន្ត្រី ៥រូប បានព្យាយាមចូលគ្រប់ដំណាក់កាល ដើម្បីបំភ្លឺទាំងមានភស្តុតាងនិងមូលដ្ឋានបញ្ជាក់ច្បាស់លាស់ ក្នុងការជួយទៅលើជនរងគ្រោះ មិនមែនជាការជួយទៅលើសូកប៉ាន់សាក្សីដូចការចោទប្រកាន់បែបនេះទេ»។
លោក ស៊ឹង សែនករុណា បន្តថា ទោះបីជាតុលាការកំពូល មិនទម្លាក់ចោទបទចោទប្រកាន់ ហើយសាលក្រមនេះចូលជាស្ថាពរក្ដី ប៉ុន្តែពួកគាត់នៅមិនបោះបង់បេសកកម្ម និងបន្តធ្វើការងារវិស័យការពាសិទ្ធិមនុស្សដដែល ដើម្បីជួយដល់សង្គមជាតិ និងអ្នករងគ្រោះ។
បុគ្គលិក និងអតីតបុគ្គលិកសមាគមអាដហុកទាំង៥រូប ត្រូវបានសាលាដំបូងរាជធានីភំ្នពេញ កាត់ទោសឱ្យជាប់ពន្ធនាគារម្នាក់ៗចំនួន៥ឆ្នាំ ក្រោមបទចោទប្រកាន់ «សូកប៉ាន់សាក្សី និងសមគំនិតសូកប៉ាន់សាក្សី»។ ប៉ុន្តែតុលាការសម្រេចឱ្យអនុវត្តទោសក្នុងពន្ធនាគាររយៈពេល១៤ខែ ហើយទោសដែលនៅសល់ត្រូវព្យួរ។
ពួកគាត់ទាំង៥នាក់ត្រូវបានសមត្ថកិច្ចចាប់ខ្លួនកាលពីខែមេសា ឆ្នាំ២០១៦ ដោយរងការចោទថាបានផ្ដល់ប្រាក់ជាង២០០ដុល្លារទៅឱ្យអ្នកនាង ខុម ចាន់តារាទី ហៅ ស្រីមុំ ក្នុងនាមជនរងគ្រោះដែលរត់មករកអាដហុកឱ្យជួយពេលនោះ។
ស្ត្រីឈ្មោះ ខុម ចាន់តារាទី នៅពេលនោះ ត្រូវបានគេចោទថាជាស្រីកំណាន់របស់លោក កឹម សុខា ដែលមានតួនាទីជាអនុប្រធានគណបក្សសង្គ្រោះជាតិ ពេលនោះ។ ពួកគាត់ទាំង៥នាក់ត្រូវបានបញ្ជូនទៅឃុំខ្លួននៅពន្ធនាគារព្រៃស កាលពីថ្ងៃទី១ ខែឧសភា ឆ្នាំ២០១៦ រហូតដល់មានការដោះលែងពួកគេឱ្យនៅក្រៅឃុំបណ្ដោះអាសន្នវិញ កាលពីថ្ងៃទី២៩ ខែមិថុនា ឆ្នាំ២០១៧៕