លោកនាយករដ្ឋមន្ត្រី ហ៊ុន សែន បានប្រកាសថា លោកបានជាសះស្បើយពីជំងឺកូវីដ-១៩ ទាំងស្រុងវិញហើយ ក្រោយខកខានចូលរួមកិច្ចប្រជុំប្រទេសមានសេដ្ឋកិច្ចរីកចម្រើនទាំង២០ ឬហៅថាG20 នៅប្រទេសឥណ្ឌូនេស៊ី និងចូលរួមកិច្ចសន្ទនាក្រៅផ្លូវការរបស់ថ្នាក់ដឹកនាំ APEC នៅទីក្រុងបាងកក ប្រទេសថៃ ដោយត្រូវសម្រាកព្យាបាលជំងឺ និងតាមដានសុខភាពមួយរយៈពេលខ្លី។
កាលពីថ្ងៃទី១៥ ខែវិច្ឆិកា ឆ្នាំ២០២២ លោក ហ៊ុន សែន បានប្រកាសលើទំព័រហ្វេសប៊ុកផ្លូវការរបស់ខ្លួនថា លោកមានវិជ្ជមានកូវីដ-១៩ បន្ទាប់ពីពេទ្យប្រទេសឥណ្ឌូនេស៊ី បានយកសំណាកទៅធ្វើតេស្ត មុនពេលចូលរួមក្នុងកិច្ចប្រជុំ G20។
ក្រោយរកឃើញថា មានវិជ្ជមានជំងឺផ្លូវដង្ហើមមួយនេះ លោក ហ៊ុន សែន ក៏បានសម្រេចឱ្យប្រតិភូកម្ពុជាវិលត្រឡប់មកកម្ពុជាវិញទាំងអស់ ហើយកិច្ចប្រជុំ G20 នៅប្រទេសឥណ្ឌូនេស៊ី ដែលធ្វើឡើងនៅថ្ងៃទី១៥ និង១៦ ខែវិច្ឆិកា ព្រមទាំងកិច្ចសន្ទនាក្រៅផ្លូវការរបស់ថ្នាក់ដឹកនាំ APEC ជាមួយភ្ញៀវ ដោយកម្ពុជាក្នុងនាមប្រធានអាស៊ានក៏ត្រូវបានខកខានផងដែរ។
ក្រោយកិច្ចប្រជុំ G20 ដែលធ្វើឡើងនៅប្រទេសឥណ្ឌូនេស៊ី និងកិច្ចប្រជុំ APEC ចប់សព្វគ្រប់ នៅល្ងាចថ្ងៃទី១៩ ខែវិច្ឆិកា តាមរយៈទំព័រហ្វេសប៊ុកលោកនាយករដ្ឋមន្ត្រី បានប្រកាសថា សម្រាប់លោកមកដល់ពេលនេះ មេរោគកូវីដ-១៩ ត្រូវបានធ្វើតេស្តអវិជ្ជមានទាំងស្រុងហើយ។
ជាមួយគ្នានេះ លោកអះអាងថា គ្រូពេទ្យដែលព្យាបាលលោកក៏បានចេញលិខិតមួយបញ្ជាក់ថា រហូតមកទល់ថ្ងៃទី១៩ ខែវិច្ឆិកា សុខភាពរបស់នាយករដ្ឋមន្ត្រីវិលមកល្អជាធម្មតាវិញហើយ និងពុំមានរោគសញ្ញារំខានណាមួយឡើយ ក្រោយរកឃើញវិជ្ជមានកូវីដ-១៩ កាលពីថ្ងៃទី១៤ ខែវិច្ឆិកា នៅទីក្រុងបាលី ប្រទេសឥណ្ឌូនេស៊ី។
ក្នុងលិខិតរបស់ក្រុមវេជ្ជបណ្ឌិតដែលព្យាបាលលោក ហ៊ុន សែន ឱ្យដឹងថា ការព្យាបាល ឬតាមដានសុខភាពរបស់លោកនាយករដ្ឋមន្ត្រីត្រូវបានបញ្ចប់ ត្រឹមថ្ងៃទី១៩ ខែវិច្ឆិកា ដោយពុំតម្រូវឱ្យធ្វើចត្តាឡីស័កអ្វីទៀតនោះឡើយ។
ជាមួយគ្នានេះ លោក ហ៊ុន សែន បញ្ជាក់ថា ចាប់ពីថ្ងៃអាទិត្យនេះនិងពេញមួយសប្តាហ៍លោកមានកម្មវិធីពេញទាំងអស់ ប៉ុន្តែនឹងមិនហត់ពេកនោះទេ។
កាលពីថ្ងៃទី១៤ ខែវិច្ឆិកា ឆ្នាំ២០២២ លោកនាយករដ្ឋមន្ត្រី ហ៊ុន សែន បានដឹកនាំគណៈប្រតិភូធ្វើដំណើរទៅដល់កោះបាលី នៃប្រទេសឥណ្ឌូនេស៊ី ដើម្បីអញ្ជើញចូលរួមក្នុងកិច្ចប្រជុំ G20 បន្ទាប់ពីបញ្ចប់កិច្ចប្រជុំកំពូលអាស៊ាន ឆ្នាំ២០២២ ដែលកម្ពុជាជាម្ចាស់ផ្ទះ។
សេចក្តីប្រកាសរបស់ក្រសួងការបរទេស និងសហប្រតិបត្តិការអន្តរជាតិ ឱ្យដឹងថា កិច្ចប្រជុំកំពូល G20 នឹងប្រព្រឹត្តទៅពីថ្ងៃទី១៥-១៦ ខែវិច្ឆិកា ឆ្នាំ២០២២ នៅកោះបាលី ប្រទេសឥណ្ឌូនេស៊ី។ ក្រោយពីបញ្ចប់កិច្ចប្រជុំនោះ លោក ហ៊ុន សែន ដែលមានឋានៈជាភ្ញៀវរបស់ប្រធានកិច្ចប្រជុំកំពូល នឹងចូលរួមក្នុងកិច្ចសន្ទនាក្រៅផ្លូវការរបស់ថ្នាក់ដឹកនាំ APEC ជាមួយភ្ញៀវ នៅថ្ងៃទី១៨ ខែវិច្ឆិកា ឆ្នាំ២០២២ នៅទីក្រុងបាងកក តបតាមការអញ្ជើញរបស់នាយករដ្ឋមន្ត្រីថៃ លោក ប្រាយុទ្ធ ចាន់អូចា៕