រដ្ឋបាលខេត្តកោះកុង ប្រាប់ទៅម្ចាស់សំណង់រឹងដែលសង់ចូលសមុទ្រមួយកន្លែងស្ថិតនៅភូមិខ្សាច់ក្រហម ឃុំជីខក្រោម ស្រុកស្រែអំបិល ផ្អាកសកម្មភាព ក្រោយរកឃើញថា ការសាងសង់នោះគ្មានច្បាប់អនុញ្ញាតត្រឹមត្រូវ។
កាលពីថ្ងៃទី៨ ខែវិច្ឆិកា ឆ្នាំ២០២២ មានការផ្សព្វផ្សាយតាមបណ្ដាញសង្គម និងតាមសារព័ត៌មានមួយចំនួនជាបន្តបន្ទាប់ អំពីសកម្មភាពចាក់ដីលុបព្រៃកោងកាង និងសាងសង់សំណង់រឹងចូលសមុទ្រ ស្ថិតនៅភូមិសាស្ត្រឃុំជីខក្រោម ដោយគ្មានការទប់ស្កាត់ពីអាជ្ញាធរ។ ក្រោយការចុះផ្សាយនេះ រដ្ឋបាលខេត្តកោះកុង ដឹកនាំដោយអភិបាលរងខេត្ត លោក សុខ សុទ្ធី បានចុះពិនិត្យមើលដល់កន្លែងជាក់ស្ដែង កាលពីថ្ងៃទី១៨ ខែវិច្ឆិកានេះ។
អភិបាលរងខេត្តកោះកុង លោក សុខ សុទ្ធី មានប្រសាសន៍នៅថ្ងៃចន្ទនេះថា ក្រោយចុះពិនិត្យមើលផ្ទាល់ គឺឃើញសកម្មភាពឈូសឆាយដីដើម្បីអភិវឌ្ឍន៍ចំនួន២ទីតាំង ដោយទីមួយមានច្បាប់អនុញ្ញាតត្រឹមត្រូវ ខណៈមួយទីតាំងមួយទៀតបានសាងសង់សំណង់រឹងចូលសមុទ្រដោយខុសច្បាប់ ស្ថិតនៅភូមិខ្សាច់ក្រហម ឃុំជីខក្រោម។
អភិបាលរងខេត្តរូបនេះបន្តថា លោកបានឱ្យម្ចាស់សំណង់ផ្អាកសកម្មភាពសាងសង់ និងប្រគល់ភារកិច្ចនេះទៅមន្ទីរកសិកម្ម រុក្ខាប្រមាញ់ និងនេសាទ អាជ្ញាធរមូលដ្ឋាន និងម្ចាស់ទីតាំងសំណង់ ដោះស្រាយករណីនេះតាមនីតិវិធីច្បាប់។
លោកបន្ថែមថា៖ «បងប្អូនប្រជាពលរដ្ឋ អ្នកវិនិយោគទាំងឡាយ មុននឹងធ្វើការអភិវឌ្ឍដី ឬវិនិយោគអ្វីមួយ សូមមេត្តាស្នើសូមច្បាប់អនុញ្ញាតជាមុនសិន ហើយជាជំហររបស់រដ្ឋបាលខេត្តកោះកុង គឺសូមស្វាគមន៍នូវរាល់ការចូលរួមអភិវឌ្ឍលើគ្រប់វិស័យ»។
មេឃុំជីខក្រោម លោក អាង ទី មានប្រសាសន៍ថា បច្ចុប្បន្នេះ សំណង់នោះមិនត្រូវបានសាងសង់បន្តនោះទេ ដោយរង់ចាំឱ្យម្ចាស់ទីតាំងសំណង់រៀបចំឯកសារស្នើសុំឱ្យត្រូវទៅតាមច្បាប់។
លោកបន្ថែមថា៖ «ឥលូវនេះ យើងកំពុងដំណើរការដោះស្រាយរឿងនេះ យើងឱ្យម្ចាស់ទីតាំងហ្នឹងគាត់រៀបចំឯកសារស្នើច្បាប់ឱ្យបានត្រឹមត្រូវឡើងវិញ»។
វីអូឌី មិនអាចសុំការបញ្ជាក់ពីប្រធានមន្ទីរកសិកម្មខេត្តកោះកុង លោក អ៊ី ម៉េងលាង បានទេ ពាក់ព័ន្ធករណីនេះ ខណៈអនុប្រធានមន្ទីរ អ្នកស្រី ឯម សុទ្ធារ៉ា ថាខ្លួនមិនទាន់បានដឹងរឿងនេះនៅឡើយ។
អ្នកសម្របសម្រួលសមាគមអាដហុកប្រចាំខេត្តកោះកុង លោក ថោង ច័ន្ទតារា អះអាងថា ក្នុងខេត្តកោះកុង បទល្មើសរំលោភយកដីក្នុងដែនសមុទ្របានកើតឡើងស្ទើរគ្រប់ទីកន្លែង ដែលប្រព្រឹត្តឡើងដោយអ្នកមានលុយមានអំណាច ហើយពុំសូវមានចំណាត់ការតឹងរ៉ឹងណាមួយពីមន្ត្រីជំនាញនោះទេ។
មន្ត្រីសិទ្ធិមនុស្សរូបនេះបានដាក់ការសង្ស័យថា បញ្ហានេះកើតឡើងបានអាចជាប់ពាក់ព័ន្ធអំពើពុករលួយជាប្រព័ន្ធ រវាងអាជ្ញាធរ និងជនល្មើសដែលជាអ្នកមានលុយមានអំណាច។ លោកថា អាជ្ញាធរថ្នាក់ជាតិ និងមន្ត្រីជំនាញ ត្រូវចាត់វិធានការករណីនេះឱ្យបានតឹងរ៉ឹងតាមផ្លូវច្បាប់ និងមានតម្លាភាព ដើម្បីព្រមានដល់មន្ត្រីខិលខូច និងអ្នករំលោភបំពានធនធានសមុទ្រផ្សេងទៀត។
លោក ថោង ច័ន្ទតារា បានបារម្ភពីការបាត់បង់ធនធានធម្មជាតិសមុទ្រយ៉ាងឆាប់រហ័ស និងរាលដាលទៅកន្លែងផ្សេងៗទៀតកាន់តែច្រើន ប្រសិនបើអាជ្ញាធរថ្នាក់ជាតិ មិនចុះស៊ើបអង្កេត និងពង្រឹងការអនុវត្តច្បាប់ ឬចាត់វិធានការច្បាប់តឹងរ៉ឹងចំពោះជនល្មើស និងអ្នកពាក់ព័ន្ធជាមួយបទល្មើសនោះ។
លោកបន្ថែមថា៖ «អ៊ីចឹងមន្ត្រីជំនាញ និងអាជ្ញាធរ ត្រូវតែពង្រឹងការអនុវត្តច្បាប់ ដោយចុះបង្ក្រាបឱ្យបានតឹងរ៉ឹង និងម៉ឺងម៉ាត់។ ហើយអាជ្ញាធរថ្នាក់ជាតិ ត្រូវសកម្មចុះធ្វើអធិការកិច្ចពិនិត្យមើលករណីនេះ និងទប់ស្កាត់កុំឱ្យមានការប្រព្រឹត្តអំពើពុករលួយជុំវិញបទល្មើសធនធានសមុទ្រនេះ»។
បើតាមអនុក្រឹត្យស្តីពីការគ្រប់គ្រងអាងទន្លេ ដែលរដ្ឋាភិបាលចេញកាលពីឆ្នាំ២០១៥ ត្រង់មាត្រា៨ បានកំណត់ថា ឆ្នេរនិងពាមសមុទ្រ ត្រូវទុកចម្ងាយ១០០ម៉ែត្រ (ពេលទឹកជោរអតិបរមា) ដោយគិតពីមាត់ឆ្នេរ និងមាត់ពាមសមុទ្រ។
ចំពោះមាត្រា៩៨ នៃច្បាប់ស្ដីពីជលផល ចែងថា ការកាប់ឆ្ការ គាស់រាន ឈូសឆាយព្រៃលិចទឹក និងព្រៃកោងកាង ឬហ៊ុមព័ទ្ធកាន់កាប់ព្រៃលិចទឹក និងព្រៃកោងកាង ត្រូវផ្ដន្ទាទោសពី៣ឆ្នាំ ទៅ៥ឆ្នាំ ហើយវត្ថុតាងទាំងអស់ត្រូវរឹបអូសជាសម្បត្តិរដ្ឋ ឬបំផ្លាញចោល។
ចំណែកមាត្រា១០២ នៃច្បាប់ដដែលនេះ បញ្ជាក់ថា បើបទល្មើសនោះប្រព្រឹត្តឡើងដោយអាជ្ញាធរដែនដី មន្ត្រីនគរបាល មន្ត្រីយោធា និងមន្ត្រីពាក់ព័ន្ធផ្សេងទៀត ត្រូវផ្ដន្ទាទោសពី១ឆ្នាំ ទៅ៣ឆ្នាំ និងពិន័យជាប្រាក់ពី៥លានរៀល ទៅ៥០លានរៀល៕