ព្រះសង្ឃមួយអង្គបង្កើតបណ្ណាល័យមួយក្នុងវត្តមហាមន្រ្តី ដែលមានសៀវភៅជិត៣ ០០០ក្បាល ដើម្បីចូលរួមចំណែកក្នុងការបណ្ដុះស្មារតីយុវជនឱ្យងាកមកចាប់អារម្មណ៍លើការអានសៀវភៅ។
ប្រធានស្ថាបនិកបណ្ណាល័យគំនិត ព្រះតេជគុណ រឹម ណាំឈាវ មានសង្ឃដីកាថា បណ្ណាល័យគំនិត បង្កើតឡើងកាលពីចុងឆ្នាំ២០១៨ ស្ថិតនៅកុដិលេខ២៨ វត្តមហាមន្ត្រី រាជធានីភ្នំពេញ ដោយមានគោលបំណងចែករំលែកក្នុងនាមជាអ្នកស្រឡាញ់ការអានសៀវភៅ។
ទន្ទឹមនេះ ព្រះអង្គថា បណ្ណាល័យគំនិតនេះបានរួមចំណែកក្នុងការលើកកម្ពស់ការអានសៀវភៅ និងជួយបំពេញបន្ថែមចំពោះការសិក្សាស្រាវជ្រាវរបស់និស្សិត ព្រមទាំងជួយកាត់បន្ថយការចំណាយរបស់យុវជនដោយអាចខ្ចីសៀវភៅយកទៅអានដោយឥតគិតថ្លៃ។
ព្រះអង្គមានសង្ឃដីកាថា៖ «ការបង្កើតបណ្ណាល័យ វារឿងមួយដ៏ល្អសម្រាប់ការលើកស្ទួយវិស័យអំណាននៅកម្ពុជា»។
ព្រះតេជគុណ រឹម ណាំឈាវ ឱ្យដឹងថា បច្ចុប្បន្ន បណ្ណាល័យគំនិត មានសៀវភៅទាំងផ្នែកអាណាចក្រ និងផ្នែកពុទ្ធចក្រ ជិត៣ ០០០ក្បាល ហើយបណ្ណាល័យនេះក៏បានបរិច្ចាគសៀវភៅទៅតាមបណ្ណាល័យផ្សេងៗទៀតនៅតាមបណ្ដាខេត្តផ្សេងៗផងដែរ។
ព្រះអង្គឱ្យដឹងទៀតថា បណ្ណាល័យគំនិត បើកឱ្យយុវជនចូលអានសៀវភៅនៅថ្ងៃសៅរ៍ និងថ្ងៃអាទិត្យ ហើយយុវជនអាចខ្ចីសៀវភៅទៅអាននៅឯផ្ទះ ដោយមានពេលកំណត់មួយសប្ដាហ៍។ ជាមួយគ្នានេះ បណ្ណាល័យកំពុងតែដំណើរការចុះបញ្ជីជាមួយក្រសួងមហាផ្ទៃ ដើម្បីប្រែក្លាយទៅជាមជ្ឈមណ្ឌលមួយផងដែរ។
ព្រះតេជគុណ ហ៊ឺន មករា ជាសមណសិស្សនៃពុទ្ធិកវិទ្យាល័យព្រះសុរាម្រឹត គង់់នៅវត្តមហាមន្រ្ដី ដែលតែងតែទៅអាន និងខ្ចីសៀវភៅនៅបណ្ណាល័យគំនិត ប្រាប់វីអូឌីថា បណ្ណាល័យនេះជាកន្លែងផ្ដល់ចំណេះដឹង និងអាចបង្កើតភាពស្និទ្ធស្នាលរវាងព្រះសង្ឃ និងគ្រហស្ថ។
ព្រះអង្គមានសង្ឃដីកាថា៖ «បណ្ណាល័យនេះ គឺជាបណ្ណាល័យមួយដ៏ល្អ ដែលមានសារៈសំខាន់មែនទែន ជាពិសេសសម្រាប់ព្រះសង្ឃនៅក្នុងវត្តអារាម»។
សមណសិស្សរូបនេះយល់ថា នៅតាមសាលារៀន និងវត្តអារាម គួរមានបណ្ណាល័យផ្ទាល់ខ្លួន ហើយសប្បុរសជនគួរតែជួយឧបត្ថម្ភសម្ភារ ដូចជាសៀវភៅជាដើម ដើម្បីឱ្យសន្ទុះនៃការអានកាន់តែមានភាពប្រសើរឡើង។
ប្រធានមជ្ឈមណ្ឌលប្រជាពលរដ្ឋ ដើម្បីអភិវឌ្ឍន៍ និងសន្តិភាព លោក យង់ គិមអេង បានលើកឡើងថា ការបង្កើតបណ្ណាល័យនេះជាកន្លែងមួយដែលផ្ដល់ចំណេះដឹងដល់សាធារណជន និងអាចលើកទឹកចិត្តពលរដ្ឋឱ្យស្រឡាញ់វិស័យអំណានបានច្រើន។ ប៉ុន្តែលោកសង្កេតឃើញថា ឥរិយាបថរបស់ពលរដ្ឋខ្មែរចូលចិត្តការស្ដាប់ជាជាងការអាន។
លោកបន្តថា៖ «ការបង្កើតបណ្ណាល័យជាការផ្ដល់ចំណេះដឹងមួយដ៏វិសេសវិសាល ហើយគួរតែមានការលើកទឹកចិត្តឱ្យបង្កើតបណ្ណាល័យ ហើយលើកទឹកចិត្តការអានឱ្យបានច្រើននៅទូទាំងប្រទេសកម្ពុជា ពីព្រោះយើងដឹងថា វិស័យនៃការអាននេះមានការធ្លាក់ចុះដែរបាទ ឃើញថាយុវជនក្រោយៗ ឬក៏ប្រជាពលរដ្ឋទូទៅ មិនសូវចូលចិត្តអានទេ បើស្ដាប់សំឡេង គាត់ងាយស្ដាប់»។
លោក យង់ គិមអេង យល់ថា ការបង្កើតបណ្ណាល័យ ដែលអាចពង្រីកការអានឱ្យបានច្រើន គួរតែរៀបចំបណ្ណាល័យឱ្យមានសោភ័ណភាពល្អ មានបរិយាកាសល្អក្នុងការអង្គុយអាន និងមានសៀវភៅគ្រប់ប្រភេទទៅតាមវ័យមនុស្ស ព្រមទាំងមានបណ្ណារក្សល្អ។
សម្រាប់ប្រធានស្ថាបនិកបណ្ណាល័យគំនិត នៅតែយល់ឃើញថា ការបង្កើតបណ្ណាល័យនេះត្រូវបង្កើតកម្មវិធីជំរុញទឹកចិត្តយុវជនឱ្យចាប់អារម្មណ៍លើវិស័យអំណាន និងអាចកាត់បន្ថយការប្រើប្រាស់ទូរសព្ទ ដើម្បីចូលរួមលើកស្ទួយវិស័យអំណាននៅកម្ពុជាឱ្យកាន់តែមានភាពប្រសើរឡើង។
ព្រះអង្គមានសង្ឃដីកាថា៖ «យើងមិនបានទៅចូលរួមលើកស្ទួយវិស័យសិក្សាធិការជាតិ វិស័យអំណានសម្រាប់ប្រទេសទាំងមូលបានទេ ប៉ុន្ដែវាក៏ជាការរួមចំណែកដ៏តូចមួយក្នុងការជ្រោមជ្រែងឱ្យយុវជនងាកត្រលប់ពីកាន់ទូរសព្ទដៃ មកកាន់សៀវភៅវិញម្ដង ផ្ដល់តម្លៃទៅលើចំណេះដឹងជាងផ្ដល់តម្លៃទៅលើការកម្សាន្ត ទៅលើ Social media»។
ចំណែកប្រធានមន្ទីរអប់រំ យុវជន និងកីឡា រាជធានីភ្នំពេញ លោក ហែម ស៊ីណារ៉េត សម្ដែងការសាទរចំពោះការបង្កើតបណ្ណាល័យនេះ ហើយលោកលើកទឹកចិត្តឱ្យមានការបង្កើតបណ្ណាល័យជាច្រើនទៀត ដើម្បីចូលរួមចំណែកលើកកម្ពស់ការអានសៀវភៅ។
លោកបន្តថា៖ «សម្រាប់ខ្ញុំគាំទ្រ ហើយជំរុញការលើកទឹកចិត្ត ដែលធ្វើឱ្យមានបណ្ណាល័យតាមវត្តអារាម។ រឿងនេះជារឿងល្អណាស់ ដើម្បីជំរុញឱ្យមិនមែនតែយុវជនទេ គឺប្រជាពលរដ្ឋគ្រប់រូបមានលទ្ធភាពចូលរួមអានសៀវភៅឱ្យបានច្រើន»។
លោក ហែម ស៊ីណារ៉េត ឱ្យដឹងថា សព្វថ្ងៃ ក្រសួងអប់រំមានយន្ដការជំរុញឱ្យមានសន្ទុះនៃការអាន ដោយរដ្ឋាភិបាលបង្កើតជាបណ្ណាល័យតាមគ្រឹះស្ថានសិក្សា និងតាមរយៈឃ្លីបវីដេអូអប់រំរបស់ក្រសួង។ ប៉ុន្ដែយ៉ាងណា លោកថា យន្ដការនេះនៅមានកម្រិត មិនបានដល់ប្រជាពលរដ្ឋទូទៅនៅឡើយនោះទេ។
លោកបន្តថា៖ «ជាគំនិតពូ ដើម្បីឱ្យបានចូលរួមទាំងអស់គ្នា គ្រប់ស្រទាប់វណ្ណៈទាំងអស់ គ្រប់កម្មវិធីទូរទស្សន៍ទាំងអស់គួរតែជំរុញឱ្យមានការបង្កើត ហើយជំរុញឱ្យមានការអានសៀវភៅដល់គ្រប់ប្រជាពលរដ្ឋទាំងអស់»។