មន្ត្រីឥណ្ឌូនេស៊ី​បន្ត​ស្វែងរក​ជនរងគ្រោះ​ក្នុង​គ្រោះរញ្ជួយដី ខណៈ​ចំនួន​អ្នកស្លាប់​កើន​ដល់​ជាង​២០០នាក់

អ្នក​ស្រុក​ម្នាក់ឈរ​ក្បែរ​ផ្ទះ​ដែល​រង​ការ​ខូច​ខាត​បន្ទាប់​ពីការ​រញ្ជួយ​ដី​បាន​វាយ​ប្រហារ​នៅ Cianjur ខេត្ត West Java ប្រទេស​ឥណ្ឌូណេស៊ី កាល​ពី​ថ្ងៃ​ទី២១ ខែ​វិច្ឆិកា ឆ្នាំ​២០២២។ (Antara Foto/Yulius Satria Wijaya/ តាមរយៈ REUTERS)

ប្រធានាធិបតី​ឥណ្ឌូនេស៊ី លោក ចូកូ វីដូដូ (Joko Widodo) នៅថ្ងៃអង្គារនេះ បានជំរុញឱ្យក្រុមអ្នក​ជួយសង្គ្រោះផ្ដោត​សំខាន់​លើ​ការ​ជួយ​សង្គ្រោះជ​ន​រងគ្រោះដែលជាប់នៅក្នុងគំនរបាក់បែក ក្នុងរយៈ​ពេលមួយ​ថ្ងៃ​ បន្ទាប់ពីគ្រោះរញ្ជួយដីបានវាយប្រហារទីក្រុងមួយក្នុងខេត្ត West Java ដែលបានសម្លាប់មនុស្សរហូតដល់ជាង២០០នាក់ ខណៈរាប់រយនាក់ផ្សេងទៀតរងរបួស។ នេះបើតាមការចុះផ្សាយដោយទីភ្នាក់ងារសារព័ត៌មាន Reuters

ថ្លែងក្នុងអំឡុងពេលចុះទៅពិនិត្យដោយផ្ទាល់នៅតំបន់ដែលរងផលប៉ះពាល់ លោក ចូកូ វីដូដូ បានលើក​ឡើង​ថា៖ «ជាការស្នើសុំរបស់ខ្ញុំ គឺសូមផ្តល់អាទិភាពជាសំខាន់ដល់ការជម្លៀសជនរងគ្រោះទាំង​ឡាយ​ដែល​កំពុង​តែ​ជាប់​នៅក្រោម​គំនរ​បាក់​បែក»។

ជាមួយគ្នានេះ ប្រធានាធិបតីឥណ្ឌូនេស៊ីរូបនេះក៏បានចូលរួម​រំលែក​ទុក្ខ​ដល់​ជនរងគ្រោះទាំង​ឡាយ ខណៈលោក​ក៏​បាន​​សន្យាថា​​នឹងផ្ដល់ជំនួយគាំទ្រ​របស់រដ្ឋាភិបាល​ក្នុង​គ្រាអាសន្ននេះផងដែរ។

លោក​​បន្ត​ថា សម្រាប់​កិច្ចការងារ​សាងសង់​ឡើង​វិញ ​គឺគួរ​តែបូក​បញ្ចូលទាំងការសាងសង់​ផ្ទះ​ដែល​ធន់​នឹង​គ្រោះ​រញ្ជួយ​ដី ​ដើម្បី​ការពារ​ពលរដ្ឋពី​គ្រោះ​ធម្មជាតិ​​ដែលអាចនឹងកើតឡើងនាពេលខាងមុខ។

គួរបញ្ជាក់ថា គ្រោះរញ្ជួយដីកម្រិត ៥,៦​រិចទ័រ ដែលកើតឡើងកាលពីថ្ងៃចន្ទម្សិលមិញនេះ បាន​វាយប្រហារ​នៅ​តំបន់​ភ្នំ​នៃ​ខេត្ត​ដែល​មាន​ប្រជាជនច្រើនបំផុតរបស់ប្រទេសឥណ្ឌូនេស៊ី ដែលបានបណ្តាលឱ្យមានការខូចខាតដល់ទីក្រុង Cianjur ខណៈយ៉ាងហោចណាស់មានភូមិមួយក៏ស្ថិតនៅក្រោមការរអិល​បាក់​ដី​ផង​ដែរ។

ទាក់ទិននឹងករណីនេះ ក្រុមមន្ត្រីបានលើកឡើងថា អ្នកដែលស្លាប់ភាគច្រើន​ គឺជាអ្នកដែលជាប់នៅក្រោមអគារទាំងឡាយ​ដែល​ដួល​រលំ។

យោងតាមវីដេអូឃ្លីបដែត្រូវបានបង្ហោះនៅលើទូរទស្សន៍ Kompas TV ក្នុងនោះគេក៏សង្កេតឃើញប្រជាជននៅក្នុងតំបន់រងផលប៉ះពាល់ នាំគ្នាកាន់ផ្លាកសញ្ញាដើម្បីស្នើសុំអាហារ និង​ទីជម្រក ខណៈការផ្គត់ផ្គង់ទាំងឡាយហាក់មិនទាន់ទៅដល់ពួកគេនោះទេ។

ជាការឆ្លើយតប អ្នក​នាំពាក្យ​ប៉ូលិស​ឥណ្ឌូនេស៊ី ​លោក Dedi Prasetyo បានថ្លែងប្រាប់ទីភ្នាក់ងារព័ត៌​មាន​រដ្ឋ​មួយ​ថា សមត្ថកិច្ចរាប់រយនាក់ គឺត្រូវបានដាក់ពង្រាយដើម្បីជួយដល់កិច្ចខិតខំប្រឹងប្រែងជួយសង្គ្រោះ​នានា។

លោក​​​បន្ថែម​ថា​៖ «​​ភារកិច្ច​ចម្បង​សម្រាប់​មន្រ្តីសមត្ថកិច្ចនៅថ្ងៃ​នេះ ​គឺ​ផ្តោតសំខាន់​លើ​ការ​ជម្លៀស​ជន​រង​គ្រោះ​»៕

រក្សាសិទ្វិគ្រប់យ៉ាងដោយ ស៊ីស៊ីអាយអឹម

សូមបញ្ជាក់ថា គ្មានផ្នែកណាមួយនៃអត្ថបទ រូបភាព សំឡេង និងវីដេអូទាំងនេះ អាចត្រូវបានផលិតឡើងវិញក្នុងការបោះពុម្ពផ្សាយ ផ្សព្វផ្សាយ ការសរសេរឡើងវិញ ឬ ការចែកចាយឡើងវិញ ដោយគ្មានការអនុញ្ញាតជាលាយលក្ខណ៍អក្សរឡើយ។
ស៊ីស៊ីអាយអឹម មិនទទួលខុសត្រូវចំពោះការលួចចម្លងនិងចុះផ្សាយបន្តណាមួយ ដែលខុស នាំឲ្យយល់ខុស បន្លំ ក្លែងបន្លំ តាមគ្រប់ទម្រង់និងគ្រប់មធ្យោបាយ។ ជនប្រព្រឹត្តិ និងអ្នកផ្សំគំនិត ត្រូវទទួលខុសត្រូវចំពោះមុខច្បាប់កម្ពុជា និងច្បាប់នានាដែលពាក់ព័ន្ធ។

អត្ថបទទាក់ទង

សូមផ្ដល់មតិយោបល់លើអត្ថបទនេះ

VODEnglish.news

VODEnglish.news

Everybody Well-Informed, Everybody Empowered