ម្ចាស់រោងម៉ាស៊ីនកិនស្រូវរំពឹងថា ស្រូវនឹងរក្សាតម្លៃជាង១ ០០០រៀលក្នុងមួយគីឡូ ក្រោយរដ្ឋាភិបាលបានបញ្ចេញថវិកាជិត១០០លានដុល្លារ ដើម្បីគាំទ្រដល់រោងម៉ាស៊ីនកិនស្រូវ និងក្រុមហ៊ុនកែច្នៃនាំអង្ករចេញ ក្នុងការប្រមូលទិញស្រូវពីប្រជាកសិករតាមតម្លៃសមស្រប ចៀសវាងការទិញទម្លាក់ថ្លៃពីឈ្មួញខិលខូចមួយចំនួន។
ធនាគាអភិវឌ្ឍន៍ជនបទ និងកសិកម្ម បានចេញសេចក្ដីប្រកាសព័ត៌មានមួយនៅថ្ងៃទី២១ ខែវិច្ឆិកា ឱ្យដឹងថា រដ្ឋាភិបាលតាមរយៈក្រសួងសេដ្ឋកិច្ច បានបញ្ចេញថវិកា ១០លានដុល្លារ លើមូលនិធិសម្រាប់ទិញស្រូវ ៨៣លានដុល្លារតាយរយៈធនាគាអភិវឌ្ឍន៍ជនបទ និងកសិកម្ម ដើម្បីគាំទ្រដល់រោងម៉ាស៊ីនកិនស្រូវ និងក្រុមហ៊ុនកែច្នៃនាំអង្ករចេញ។
ធនាគាអភិវឌ្ឍន៍ជនបទ និងកសិកម្ម អះអាងថា ការសម្រេចនេះ ដើម្បីជំរុញការប្រមូលទិញស្រូវ និងជួយរក្សាស្ថិរភាពតម្លៃស្រូវជូនប្រជាកសិករនៅកម្ពុជា ស្របពេលរដូវប្រមូលផលស្រូវរបស់កសិករកំពុងសម្រុកខ្លាំង។
ជុំវិញករណីនេះ ប្រធានសហព័ន្ធស្រូវអង្ករកម្ពុជា និងជាប្រធានក្រុមហ៊ុន Amru Rice លោក សុង សារ៉ន បង្ហាញសុទិដ្ឋិនិយមចំពោះការបញ្ចេញកញ្ចប់ថវិកា ដើម្បីគាំទ្រដល់រោងម៉ាស៊ីនកិនស្រូវ ឬសហគ្រាស ដើម្បីទិញស្រូវពីកសិករ និងរក្សាតម្លៃមិនឱ្យធ្លាក់ចុះនោះ។
បន្ថែមពីនេះ លោករំពឹងថា តម្លៃស្រូវនឹងអាចរក្សាក្នុងតម្លៃលើស ១ ០០០រៀលក្នុងមួយគីឡូក្រាម ហើយតម្លៃនេះនឹងជួយកសិករក្នុងការប្រមូលផលស្រូវឆ្នាំនេះ។
លោកថា៖ «មានតែល្អឡើងទៅលើ ព្រោះយើងទប់ស្ថានការណ៍នេះបានហើយ ទាញឡើងបាន១ពាន់ជាងហើយ។ ដូច្នេះមិនមានការថយក្រោយ មានតែថ្លៃ ឬទប់ថេររហូត»។
ចំណែកលោក ថេង សាវឿន ប្រធានសមាគមសម្ព័ន្ធសហគមន៍កសិករកម្ពុជា (CCFC) បានលើកឡើងថា ការបញ្ចេញថវិការបស់រដ្ឋនេះ គឺជាផ្នែកមួយដើម្បីជួយដល់កសិករ ដែលអាចរក្សាតម្លៃស្រូវកុំឱ្យចុះថោកពេក។
តែយ៉ាងណា សង្គមស៊ីវិលរូបនេះស្នើដល់ក្រសួងសាម៉ីជួយតាមដានដល់រោងម៉ាស៊ីនកិនស្រូវ ឬសហគ្រាសដែលទទួលបានកញ្ចប់ថវិកាពីរដ្ឋាភិបាលទាំងនោះ ដើម្បីធានាការផ្ដល់ប្រយោជន៍ដល់កសិករពិតប្រាកដ។
លោកថា៖ «ឱ្យមានមន្រ្តីទៅតាមដានលើរោងម៉ាស៊ីនកិនស្រូវ ឬសហគ្រាសដែលក្រុមហ៊ុនដែលទទួលបានកម្ចីពីរដ្ឋាភិបាលបានត្រឹមត្រូវដែរឬទេ! ហើយការទិញស្រូវនេះ ឬដាក់ហិរញ្ញប្បទានបានជួយដោះស្រាយចំពោះមុខ ឬក៏ជួយដល់ប្រជាពលរដ្ឋកម្រិតណា»។
នៅក្នុងខែវិច្ឆិកា ឆ្នាំ២០២២ កសិករមួយនៅតាមបណ្ដាខេត្តមួយចំនួន ដូចជា ខេត្តបាត់ដំបង ខេត្តបន្ទាយមានជ័យ ជាដើម បានបង្ហោះសារជាបន្តបន្ទាប់នៅលើបណ្ដាញសង្គមហ្វេសប៊ុក ពាក់ព័ន្ធនឹងករណីតម្លៃស្រូវចុះថោក ឬគ្មានទីផ្សារលក់ចេញ។ ពួកគេនិយាយថា នៅពេលតម្លៃស្រូវចុះថោក លក់មិនចំណេញ ស្របពេលការចំណាយដើមទុន រួមមាន ថ្នាំ ជី ប្រេងសាំង កម្លាំងពលកម្ម និងសម្ភារប្រើប្រាស់ផ្សេងៗទៀតមានតម្លៃថ្លៃ៕