ព្រះមហាក្សត្រម៉ាឡេស៊ី នៅថ្ងៃព្រហស្បតិ៍នេះ បានតែងតាំងមេដឹកនាំគណបក្សប្រឆាំង លោក អាន់វ៉ា អ៊ីប្រាហ៊ីម (Anwar Ibrahim) វ័យ៧៥ឆ្នាំ ជានាយករដ្ឋមន្ត្រីថ្មី ខណៈលោកនឹងត្រូវស្បថចូលកាន់តំណែងនៅម៉ោង៥រសៀលនេះ។
យោងតាមសេចក្តីថ្លែងការណ៍មួយចេញដោយព្រះរាជវាំង អ៊ីស្តាណា ណេហ្ការ៉ា (Istana Negara) ដែលត្រូវបានយកមកចុះផ្សាយបន្តដោយទីភ្នាក់ងារសារព័ត៌មាន CNA បានឱ្យដឹងថា៖ «ព្រះមហាក្សត្រក៏មានបំណងចង់ជម្រាបលោកនាយករដ្ឋមន្ត្រី និងរដ្ឋាភិបាលថ្មីដែលត្រូវបង្កើតនេះ ដើម្បីបង្ហាញពីការដាក់ចិត្តដាក់កាយក្នុងការដឹកនាំប្រទេសជាតិដោយគ្មានការលម្អៀង»។
សេចក្តីថ្លែងការណ៍បានឱ្យដឹងទៀតថា៖ «ស្របពេលដែលប្រទេសនេះត្រូវការរដ្ឋាភិបាលដែលមានស្ថិរភាពមួយ ដើម្បីជំរុញទិដ្ឋភាពសេដ្ឋកិច្ច និងការអភិវឌ្ឍប្រទេស ប្រជាជនសាមញ្ញមិនគួរទទួលបន្ទុកជាមួយភាពចលាចលនយោបាយមិនចេះចប់នោះទេ»។
ជាមួយគ្នានេះ សេចក្តីថ្លែងការណ៍របស់ព្រះរាជវាំង ក៏បានក្រើនរំលឹកដល់សមាជិកសភាដែលជាប់ឆ្នោតទាំងឡាយ ត្រូវបង្ហាញពីអាទិភាព ការប្តេជ្ញាចិត្តខ្ពស់ ក៏ដូចជាការផ្តល់សេវាល្អបំផុតជូនប្រជាពលរដ្ឋ។
សេចក្តីថ្លែងការណ៍នោះបន្ថែមថា៖ «អ្នកដែលឈ្នះមិនមែនមានន័យថា ឈ្នះអ្វីៗគ្រប់យ៉ាងទាំងអស់ឡើយ ខណៈអ្នកដែលចាញ់ក៏មិនបានបាត់បង់អ្វីៗទាំងអស់ផងដែរ»។
គួរបញ្ជាក់ថា ការតែងតាំងនាយករដ្ឋមន្ត្រីម៉ាឡេស៊ីថ្មីនេះ ត្រូវបានធ្វើឡើងបន្ទាប់ពីព្រះមហាក្សត្របានកោះប្រជុំក្រុមប្រឹក្សាពិសេសមួយ នៅព្រឹកថ្ងៃព្រហស្បតិ៍នេះ ដើម្បីទទួលយកការយល់ឃើញពីព្រះចៅស៊ុលតង់ដទៃទៀត លើបញ្ហានៃការបង្កើតរដ្ឋាភិបាលថ្មី ក្រោយប្រទេសជាតិជួបប្រទះវិបត្តិនយោបាយដែលជាប់គាំងអស់រយៈពេលប៉ុន្មានថ្ងៃ៕
