មជ្ឈមណ្ឌលសម្ព័ន្ធភាពការងារ និងសិទ្ធិមនុស្ស (CENTRAL) បានឱ្យដឹងថា ពលករចំណាកស្រុកមួយចំនួនបានជួបបញ្ហាក្នុងជីវភាពគ្រួសារជាខ្លាំង ប៉ុន្តែមិនទទួលបានបណ្ណក្រីក្រ ឬបណ្ណសមធម៌ពីរដ្ឋ។
ថ្លែងក្នុងសិក្ខាសាលាពិគ្រោះយោបល់ថ្នាក់ជាតិ ស្ដីពីការលើកកម្ពស់កិច្ចគាំពារសង្គមដល់ពលករចំណាកស្រុក នៅរាជធានីភ្នំពេញ ថ្ងៃទី២៥ ខែវិច្ឆិកា ឆ្នាំ២០២២ មន្ត្រីកម្មវិធីនៃមជ្ឈមណ្ឌលសម្ព័ន្ធភាពការងារ និងសិទ្ធិមនុស្ស (CENTRAL) លោក ឌីថេ ហូយ៉ា បានឱ្យដឹងថា មានពលករខ្មែរប្រមាណ២លាននាក់បានចំណាកស្រុកទៅធ្វើការងារនៅប្រទេសថៃ។
មន្ត្រីសិទ្ធិការងាររូបនេះបន្តថា ក្នុងចំណោមពលករទាំងនោះ មានពលករមួយចំនួនបានជួបបញ្ហាប្រឈមទាំងជីវភាព សុខភាព និងមិនទទួលបានកិច្ចគាំពារសង្គមទាំងនៅក្រៅប្រទេស នៅពេលដែលពួកគេត្រលប់មកកម្ពុជាវិញ ជាពិសេសមិនទទួលបានសេវាព្យាបាលសុខភាពអំឡុងពេលផ្ទុះជំងឺកូវីដ-១៩។
លោក ឌីថេ ហូយ៉ា បន្តថា តាមការកត់ត្រារបស់អង្គការសង់ត្រាល់ គឺនៅឆ្នាំ២០២២នេះ ពលករខ្មែរត្រូវបានឃាត់ខ្លួនប្រមាណ៨០ករណី ក្រោយពួកគេចាញ់បោកមេខ្យល់ចំណាកស្រុករកការងារធ្វើនៅប្រទេសថៃ ហើយក្រោយពេលបញ្ជូនពួកគេមកកម្ពុជាវិញ គឺពលករមួយចំនួនបានជួបបញ្ហាជីវភាពជាខ្លាំង ហើយពួកគេមិនទទួលបានបណ្ណក្រីក្រ ឬបណ្ណសមធម៌ពីរដ្ឋនោះទេ។
លោកបន្ថែមថា៖ «គាត់ប្រឈមមិនមានប្រាក់ចំណូល អ្នកខ្លះបានជំពាក់បំណុលគេ ហើយអ្នកខ្លះអត់មានដីស្រែដីចម្ការសម្រាប់ធ្វើកសិកម្មទេ ខ្វះខាតជីវភាព។ យើងបានជួបសម្ភាសជាច្រើនជាមួយអតីតពលករចំណាកស្រុកដែលវិលត្រលប់មកវិញហ្នឹង គឺថាហេតុអីមើលទៅផ្ទះ ដូចជាមិនមានទេ ផ្ទះតូច សួរថាមានដីស្រែចម្ការ មានអត់? [ពលករចំណាកស្រុកថា]អត់មានទេ! ដល់ពេលសួរថាមានបណ្ណក្រីក្រអត់? ក៏អត់មានដែរ។ គាត់បានលើកឡើងមកថា អ្នកខ្លះផ្ទះដំរីដើរចូលចុះ មានទូរទស្សន៍LCDមើល តែមានបណ្ណក្រីក្រ»។
បើតាមមជ្ឈមណ្ឌលសម្ព័ន្ធភាពការងារ និងសិទ្ធិមនុស្ស (សង់ត្រាល់) ការរៀបចំសិក្ខាសាលាពិគ្រោះយោបល់ថ្នាក់ជាតិ នៅថ្ងៃសុក្រនេះ ក្នុងគោលបំណងប្រមូលធាតុផ្សំដាក់ទៅរដ្ឋាភិបាល ដើម្បីជំរុញដល់ការលើកកម្ពស់កិច្ចគាំពារសង្គមដល់ពលករចំណាកស្រុក។
ថ្លែងក្នុងសិក្ខាសាលានេះដែរ ប្រធាននាយកដ្ឋានអត្តសញ្ញាណកម្មគ្រួសារក្រីក្រនៃក្រសួងផែនការ លោក កែវ អូលី បានទទួលស្គាល់ថា ការធ្វើបណ្ណក្រីក្រ ឬបណ្ណសមធម៌ ពិតជាមានភាពខ្វះចន្លោះខ្លះ ហើយលោកបានស្នើដល់ប្រជាពលរដ្ឋទីទ័លក្រី និងអ្នកពាក់ព័ន្ធ ត្រូវទៅដាក់ពាក្យស្នើសុំសម្ភាសសុំបណ្ណក្រីក្រ ក្នុងករណីអាជ្ញាធរមូលដ្ឋានមិនបានយកចិត្តទុកដាក់ ឬធ្វើការងារនេះមានភាពខ្វះចន្លោះ។
លោក កែវ អូលី អះអាងថា ការផ្តល់បណ្ណសមធម៌នេះ គឺពុំមានការរើសអើងប្រកាន់បក្ខពួក ឬនិន្នាការនយោបាយណាមួយឡើយ។
លោកបន្ថែមថា៖ «ហើយសម្រាប់ការផ្តល់បណ្ណសមធម៌នេះ គឺក្រសួងផែនការមិនមានពន្យល់ ឬក៏ណែនាំអាជ្ញាធរមូលដ្ឋានថាកុំឱ្យធ្វើបណ្ណក្រីក្រ ឬបណ្ណសមធម៌ ទៅឱ្យអ្នកមាននិន្នាការប្រឆាំង ក៏អត់ទេ! ពាក្យសមធម៌ គឺមានន័យថាស្មើភាពគ្នា ខាងរដ្ឋាភិបាលក៏មិនបានចាត់ទុកថាអ្នកប្រឆាំងមិនឱ្យបណ្ណ ក៏អត់ដែរ»។
បើតាមលោក ឌីថេ ហូយ៉ា កត្តាដែលនាំឱ្យពលរដ្ឋខ្មែរចំណាកស្រុកទាំងស្របច្បាប់ និងខុសច្បាប់ទៅរកការងារនៅក្រៅប្រទេស ដោយសារជីវភាពក្រីក្រ ក្នុងស្រុកអត់ការងារធ្វើ កសិកផលរបស់កសិករគ្មានទីផ្សារ ខណៈសម្ភារកសិកម្មឡើងថ្លៃ និងបញ្ហាផ្សេងៗទៀត៕
