នាយករដ្ឋមន្ត្រីហុងគ្រី លោក វិចទ័រ អ័របេន (Viktor Orban) បានឱ្យដឹងនៅថ្ងៃព្រហស្បតិ៍ម្សិលមិញថា សភានៃប្រទេសហុងគ្រី នឹងផ្ដល់សច្ចាប័នលើសមាជិកភាពអង្គការណាតូ (NATO) សម្រាប់ប្រទេសហ្វាំងឡង់ និងស៊ុយអែត នៅដើមឆ្នាំក្រោយ។ នេះបើតាមការចុះផ្សាយដោយទីភ្នាក់ងារសារព័ត៌មាន Reuters។
ថ្លែងក្នុងសន្និសីទសារព័ត៌មានបន្ទាប់ពីកិច្ចប្រជុំមួយនៅប្រទេសស្លូវ៉ាគី នាយករដ្ឋមន្ត្រីហុងគ្រី បានលើកឡើងថា រដ្ឋាភិបាលរបស់លោកបានធ្វើការសម្រេចចិត្តរួចរាល់ហើយថា ប្រទេសហុងគ្រី នឹងគាំទ្រដល់ការចូលជាសមាជិកអង្គការណាតូរបស់ប្រទេសហ្វាំងឡង់ និងស៊ុយអែត ខណៈសភាក៏នឹងកំណត់ប្រធានបទនេះនៅក្នុងរបៀបវារៈរបស់ខ្លួននៅក្នុងសម័យប្រជុំដំបូងរបស់ខ្លួននៅឆ្នាំក្រោយផងដែរ។
លោក វិចទ័រ អ័របេន បន្ថែមថា៖ «ហុងគ្រីប្រាកដជានឹងផ្តល់ការគាំទ្រដល់ការចូលជាសមាជិករបស់ពួកគេ [ហ្វាំងឡង់ និងស៊ុយអែត]។ ខណៈរដ្ឋាភិបាលបានសម្រេចរួចរាល់ហើយ សភាក៏នឹងសម្រេចដូចគ្នានេះផងដែរ»។
គួរបញ្ជាក់ថា សហរដ្ឋអាមេរិក កាលពីពេលកន្លងទៅ ក៏ធ្លាប់បានធានាក្នុងការដោះស្រាយរាល់ទុកកង្វល់ដែលពាក់ព័ន្ធនឹងបញ្ហាសន្តិសុខសម្រាប់ស៊ុយអែត និងហ្វាំងឡង់ ក្នុងអំឡុងពេលដែលប្រទេសទាំង២នេះដាក់ពាក្យស្នើសុំចូលជាសមាជិកអង្គការណាតូ និងមុនពេលដែលពួកគេត្រូវបានទទួលយកចូលក្នុងសម្ពន្ធមួយនេះផងដែរ។ ការធានានេះត្រូវបានធ្វើឡើងបន្ទាប់ពីប្រទេសទាំងពីរនេះបានលើកឡើងជាការព្រួយបារម្ភទាក់ទងនឹងការដាក់សំណើសមាជិកភាពទៅសម្ពន្ធយោធាណាតូ ដោយថា ពួកគេអាចនឹងងាយរងនូវការគំរាមកំហែងពីរុស្ស៊ី ក្នុងអំឡុងពេលដំណើរការដាក់ពាក្យស្នើសុំ ដែលអាចនឹងចំណាយរយៈពេលរហូតដល់ទៅមួយឆ្នាំក្នុងការទទួលបានការអនុម័តដោយសមាជិកណាតូទាំង៣០៕
