សវនាការជំនុំជម្រះអតីតថ្នាក់ដឹកនាំគណបក្សសង្គ្រោះជាតិដែលត្រូវតុលាការរំលាយ និងអ្នកគាំទ្រ ពាក់ព័ន្ធនឹងការចោទប្រកាន់ជុំវិញការគាំទ្រដំណើរវិលត្រលប់មកកម្ពុជាវិញរបស់លោកស្រី មូរ សុខហួរ នឹងឈានដល់ការធ្វើសេចក្ដីសន្និដ្ឋានចុងក្រោយនៅដើមខែធ្នូ។
តុលាការសាលាដំបូងរាជធានីភ្នំពេញ បានបើកសវនាការជំនុំជម្រះជនជាប់ចោទចំនួន ៣៧នាក់ ដែលម្នាក់នៅក្រៅឃុំ ពាក់ព័ន្ធករណីគាំទ្រការប៉ុនប៉ងវិលត្រលប់មកកម្ពុជាមិនបានសម្រេចរបស់លោកស្រី មូរ សុខហួរ កាលពីឆ្នាំ២០២១។ ជនជាប់ចោទទាំងនេះប្រឈមនឹងបទចោទប្រកាន់ពីបទ រួមគំនិតក្បត់ ដែលអាចជាប់ពន្ធនាគារពី ៥ឆ្នាំ ទៅ ១០ឆ្នាំ បើរកឃើញថាមានពិរុទ្ធ។
ចៅក្រម លោកស្រី អ៊ុក រ៉េតគន្ធា បានសម្រេចនៅចុងបញ្ចប់នៃសវនាការកាលពីថ្ងៃព្រហស្បតិ៍ម្សិលមិញថា នឹងមិនមានការសួរដេញដោលបន្ថែមទៀតទេ ហើយថាតុលាការនឹងឈានទៅដល់ការធ្វើសេចក្តីសន្និដ្ឋានចុងក្រោយ។
លោកស្រីបានមានប្រសាសន៍ថា៖ «ឥឡូវនេះ សំណុំរឿងនេះចប់ហើយ។ យើងមិនមានអ្វីត្រូវបន្ថែមទៀតទេ»។
នៅមុនសវនាការ ចៅក្រមបានចាក់ឃ្លីបសំឡេង និងវីដេអូសរុបចំនួន៦ ដែលជាបទសម្ភាសរបស់វិទ្យុអាស៊ីសេរី ជាមួយលោកស្រី មូរ សុខហួរ និងអតីតតំណាងរាស្រ្តគណបក្សសង្រ្គោះជាតិដែលត្រូវតុលាការរំលាយ លោក អ៊ូ ច័ន្ទឫទ្ធិ ជាវីដេអូដែលលោកស្រី មូរ សុខហួរ និយាយ និងការសន្ទនាតាមទូរសព្ទចំនួន៤លើករវាងជនជាប់ចោទឈ្មោះ ខាន់ ប៊ុនផេង និងមនុស្សពីរនាក់ទៀត។
ទោះបីជាចៅក្រមបានបញ្ជាឱ្យបុគ្គលិកនៅតុលាការចាក់ឃ្លីបទាំងនេះក្ដី ស្ទើរតែគ្មានការពិភាក្សាអំពីខ្លឹមសារនៅក្នុងឃ្លីបនោះទេ។
លោកស្រី អ៊ុក រ៉េតគន្ធា បាននិយាយថា លោក ខាន់ ប៊ុនផេង បាននិយាយជាមួយមនុស្ស២នាក់តាមទូរសព្ទ ក្នុងនោះមានម្នាក់ឈ្មោះ ហេង សុខឡេង (ហៅ សេង សុខឡេង) ដែលជាជនជាប់ចោទម្នាក់ទៀតដែលនៅក្រៅឃុំ និងឈ្មោះ ឡេស ស្លែម៉ាត ដែលហាក់ដូចជាមិនពាក់ព័ន្ធដំណើរការសវនាការឡើយ។ នៅក្នុងឃ្លីបសំឡេងមួយក្នុងចំណោមឃ្លីបទាំងនោះ គេពិបាកស្ដាប់ថាតើកំពុងសន្ទនាពីអ្វី ហើយឈ្មោះ ខាន់ ប៊ុនផេង និយាយតិចតួចបំផុត។ នៅត្រង់ចំណុចមួយនៃឃ្លីប អ្នកដែលនិយាយជាមួយឈ្មោះ ខាន់ ប៊ុនផេង បាននិយាយអំពីការឡើងមករាជធានីភ្នំពេញ ដើម្បីទទួលស្វាគមន៍លោកស្រី មូរ សុខហួរ ប៉ុន្តែមិនច្បាស់ថាតើអ្នកដែលបាននិយាយនោះជា ហេង សុខឡេង ឬ ឡេស ស្លែម៉ាត។
លោក ឡោ ជុនធី មេធាវីការពារក្ដីរបស់ជនជាប់ចោទឈ្មោះ ខាន់ ប៊ុនផេង មានប្រសាសន៍ថា ការសន្ទនានេះភាគច្រើនជាសំឡេងតែម្ខាង មិនមែនជាសំឡេងកូនក្ដីរបស់លោកទេ។
លោក ឡោ ជុនធី បានថ្លែងថា៖ «ការសន្ទនាគួរតែមានភាគីទាំងសងខាងឆ្លើយឆ្លងគ្នា»។
ជនជាប់ចោទ ឈ្មោះ ខាន់ ប៊ុនផេង មានចម្ងល់អំពីសំឡេងនៅក្នុងឃ្លីបមួយ។
លោកថា៖ «សំឡេងនេះហាក់មិនមែនជាសំឡេងរបស់ សុខឡេង ទេ […] ខ្ញុំសុំឱ្យចៅក្រមពិចារណារឿងនេះ ហើយផ្ទៀងផ្ទាត់ម្ដងទៀត»។
លោក គង់ ម៉ាស់ និងលោក វឿង សំណាង ជាជនជាប់ចោទផ្សេងទៀតនៅក្នុងសវនាការ បាននិយាយថា ពួកគេគ្មានអ្វីត្រូវបន្ថែមទេ ហើយសវនាការត្រូវបានបិទ។ សវនាការនឹងបន្តនៅថ្ងៃទី៨ ខែធ្នូ ឆ្នាំ២០២២៕
បកប្រែនិងសម្រួលចេញពីអត្ថបទដើមភាសាអង់គ្លេស៖ Sochua Mass Trial Moves to Closing Arguments