អ្នកកាសែត​ជនជាតិជប៉ុន​ដែល​ទើប​ត្រូវ​របប​យោធា​មីយ៉ាន់ម៉ា​ដោះលែង​ជំរុញ​ឱ្យ​ជប៉ុន​ដាក់​សម្ពាធ​លើ​របប​នេះ

អ្នកកាសែតជនជាតិជប៉ុនម្នាក់ដែលទើបត្រូវបានដោះលែងដោយរបបយោធាមីយ៉ាន់ម៉ា នៅថ្ងៃចន្ទនេះ បានអំពាវឱ្យទីក្រុងតូក្យូដាក់សម្ពាធបន្ថែមទៀតលើរបបសឹកមួយនេះ និងអំពាវនាវឱ្យជប៉ុនទទួលយកជនភៀសខ្លួនពីប្រទេសមីយ៉ាន់ម៉ា។ នេះបើយោងតាមការចេញផ្សាយរបស់ទីភ្នាក់សារព័ត៌មាន CNA នៅថ្ងៃទី២៨ ខែវិច្ឆិកា ឆ្នាំ២០២២នេះ។

លោក តូរូ គូបូតា (Toru Kubota) បានជំរុញឱ្យប្រទេសជប៉ុន ដែលជាម្ចាស់ជំនួយ និងអ្នកវិនិយោគដ៏ធំជាយូរមកហើយនៅមីយ៉ាន់ម៉ា​ «ចាត់វិធានការយ៉ាងសកម្មចំពោះការរំលោភសិទ្ធិមនុស្សនៅក្នុងប្រទេសមីយ៉ាន់ម៉ា និងថ្កោលទោសរបបនេះ»។

លោកបាននិយាយនៅថ្ងៃចន្ទនេះថា ប្រទេសជប៉ុនគួរតែ «ពិនិត្យមើលយ៉ាងតឹងរ៉ឹងថាតើមូលនិធិទាំងនេះ [ដែលរដ្ឋាភិបាលជប៉ុនផ្តល់ឱ្យ] ត្រូវបានប្រើប្រាស់ដោយយោធា ហូរទៅកាន់យោធា និងថាតើមូលនិធិទាំងនេះត្រូវបានប្រើប្រាស់ដើម្បីសម្លាប់មនុស្សដែរឬទេ»។

លោក Kubota បាននិយាយថា «អ្វីដែលយើងត្រូវគិត គឺរបៀបការពារមនុស្សដែលរត់គេចពីការគ្រប់គ្រងបែបផ្តាច់ការ»។

គួរបញ្ជាក់ថា លោក Kubota បានជាប់ពន្ធនាគារអស់រយៈពេល៣ខែកន្លះ បន្ទាប់ពីត្រូវបានឃុំខ្លួនកាលពីខែកក្កដា។

លោកត្រូវបានផ្តន្ទាទោសឱ្យជាប់ពន្ធនាគាររយៈពេល៧ឆ្នាំ ពីបទថតសកម្មភាពតវ៉ាប្រឆាំងនឹងរដ្ឋប្រហារ។ លើសពីនេះ លោកក៏ត្រូវបានផ្តន្ទាទោសឱ្យជាប់ពន្ធនាគាររយៈពេល៣ឆ្នាំបន្ថែមទៀត ពីបទរំលោភលើច្បាប់ស្តីពីអន្តោប្រវេសន៍របស់ប្រទេសមីយ៉ាន់ម៉ា។

លោកត្រូវបានដោះលែងនៅថ្ងៃទី១៨ ខែវិច្ឆិកា ឆ្នាំ២០២២ រួមជាមួយអ្នកទោសរាប់ពាន់នាក់ផ្សេងទៀត រួមទាំងអតីតឯកអគ្គរដ្ឋទូតអង់គ្លេស លោកស្រី វីគី បូមែន (Vicky Bowman) និងសេដ្ឋវិទូជនជាតិអូស្ត្រាលី លោក សៀន ថឺនែល (Sean Turnell) ដែលជាទីប្រឹក្សារបស់លោកស្រី អ៊ុងសាន ស៊ូជី (Aung San Suu Kyi)៕