មេដឹកនាំប្រទេសកូរ៉េខាងជើង លោក គីម ជុងអ៊ុន បាននិយាយថា កូរ៉េខាងជើងនឹងពង្រឹងកងកម្លាំងនុយក្លេអ៊ែររបស់ខ្លួនឱ្យខ្លាំងជាងគេនៅលើពិភពលោក ខណៈលោកបានស្ងើចសរសើរមន្ត្រីយោធារាប់សិបនាក់ដែលបានចូលរួមក្នុងការបាញ់ម៉ីស៊ីលផ្លោងនាពេលថ្មីៗនេះ។ នេះបើយោងតាមការចេញផ្សាយរបស់ទីភ្នាក់ងារសារព័ត៌មាន Reuters នៅថ្ងៃទី២៧ ខែវិច្ឆិកា ឆ្នាំ២០២២។
ការប្រកាសនេះធ្វើឡើងបន្ទាប់ពីលោក គីម ជុងអ៊ុន បានត្រួតពិនិត្យការបាញ់សាកល្បងមីស៊ីលផ្លោងអន្តរទ្វីប (ICBM) ឈ្មោះ Hwasong-17 ដ៏ធំបំផុតរបស់កូរ៉េខាងជើង កាលពីថ្ងៃទី១៨ ខែវិច្ឆិកា ឆ្នាំ២០២២ និងបានសន្យាថានឹងទប់ទល់ការគំរាមកំហែងនុយក្លេអ៊ែររបស់សហរដ្ឋអាមេរិក។
លោក គីម ជុងអ៊ុន បាននិយាយថា៖ «គោលដៅធំបំផុតរបស់យើង គឺធ្វើឱ្យកងកម្លាំងយុទ្ធសាស្រ្តរបស់យើងមានអានុភាពខ្លាំងជាងគេនៅលើពិភពលោក ដែលមិនធ្លាប់មានពីមុនមក»។
លោកបន្ថែមថា ការកសាងសមត្ថភាពនុយក្លេអ៊ែររបស់កូរ៉េខាងជើង នឹងការពារសេចក្ដីថ្លៃថ្នូរ និងអធិបតេយ្យភាពរបស់រដ្ឋ និងប្រជាជនប្រកបដោយភាពជឿជាក់។
លោកបានពិពណ៌នាថា មីស៊ីល Hwasong-17 គឺជា «អាវុធយុទ្ធសាស្ត្រដ៏ខ្លាំងបំផុតនៅលើពិភពលោក» ហើយថា វាបង្ហាញពីការប្ដេជ្ញាចិត្ត និងសមត្ថភាពរបស់កូរ៉េខាងជើង ក្នុងការកសាងកងទ័ពរបស់ខ្លួនឱ្យក្លាយជាកងទ័ពដ៏ខ្លាំងបំផុតនៅលើពិភពលោក។
លោក គីម ជុងអ៊ុន ក៏បានថ្លែងផងដែរថា «អ្នកវិទ្យាសាស្ត្រកូរ៉េខាងជើង មានការរីកចម្រើនឆ្ពោះទៅមុខដ៏អស្ចារ្យ ក្នុងការអភិវឌ្ឍបច្ចេកវិទ្យានៃការបំពាក់ក្បាលគ្រាប់នុយក្លេអ៊ែរនៅលើមីស៊ីលផ្លោង»។
ការបាញ់សាកល្បងមីស៊ីល Hwasong-17 បានជំរុញឱ្យសហរដ្ឋអាមេរិកអំពាវនាវឱ្យប្រធានក្រុមប្រឹក្សាសន្តិសុខអង្គការសហប្រជាជាតិចេញសេចក្តីថ្លែងការណ៍មួយ ដើម្បីឱ្យកូរ៉េខាងជើងទទួលខុសត្រូវចំពោះការសាកល្បងមីស៊ីលរបស់ខ្លួន ដែលត្រូវបានហាមឃាត់ដោយសេចក្តីសម្រេចរបស់ក្រុមប្រឹក្សាសន្តិសុខអង្គការសហប្រជាជាតិ។
ទីភ្នាក់ងារសារព័ត៌មានរដ្ឋកូរ៉េខាងជើង KCNA បាននិយាយថា «មីស៊ីល Hwasong-17 បានបង្ហាញឱ្យពិភពលោកឃើញយ៉ាងច្បាស់ថា កូរ៉េខាងជើងមានអានុភាពនុយក្លេអ៊ែរពេញលេញ ដែលមានសមត្ថភាពទប់ទល់នឹងអំណាចនុយក្លេអ៊ែររបស់ចក្រពត្តិនិយមអាមេរិក និងបង្ហាញថាខ្លួនជាប្រទេសដែលមានមីស៊ីលផ្លោងអន្តរទ្វីប (ICBM) ដ៏មានអានុភាពបំផុតនៅលើពិភពលោក»៕