ប្រធានាធិបតីកូរ៉េខាងត្បូង លោក យូន ស៊ុកយុល (Yoon Suk-yeol) បានព្រមានឆ្លើយតបរួមគ្នាដែលមិនធ្លាប់មានពីមុនមក ជាមួយសម្ពន្ធមិត្ត ប្រសិនបើកូរ៉េខាងជើងបន្តការសាកល្បងអាវុធនុយក្លេអ៊ែរ ហើយបានជំរុញឱ្យប្រទេសចិនជួយរារាំងកូរ៉េខាងជើងពីការបន្តការអភិវឌ្ឍអាវុធនុយក្លេអ៊ែរ និងមីស៊ីលដែលត្រូវបានហាមឃាត់។ នេះបើយោងតាមការចេញផ្សាយរបស់ទីភ្នាក់ងារ Reuters នៅថ្ងៃទី២៩ ខែវិច្ឆិកា ឆ្នាំ២០២២។
នៅក្នុងបទសម្ភាសជាមួយ Reuters កាលពីថ្ងៃចន្ទ លោក យូន ស៊ុកយុល បានអំពាវនាវឱ្យប្រទេសចិនដែលជាសម្ពន្ធមិត្តជិតស្និទ្ធបំផុតរបស់កូរ៉េខាងជើង បំពេញតួនាទីរបស់ខ្លួនក្នុងនាមជាសមាជិកអចិន្ត្រៃយ៍នៃក្រុមប្រឹក្សាសន្តិសុខអង្គការសហប្រជាជាតិ។
លោក យូន ស៊ុកយុល បានថ្លែងថា៖ «ប្រទេសចិនប្រាកដជាមានសមត្ថភាពដើម្បីមានឥទ្ធិពលលើកូរ៉េខាងជើង។ ចិនមានការទទួលខុសត្រូវក្នុងការចូលរួមក្នុងដំណើរការនេះ»។
លោកបានបន្ថែមថា វាអាស្រ័យលើរដ្ឋាភិបាលក្រុងប៉េកាំង ក្នុងការសម្រេចថាតើខ្លួននឹងប្រើឥទ្ធិពលនោះដើម្បីសន្តិភាព និងស្ថិរភាពឬអត់។
លោក យូន ស៊ុកយុល បានកត់សម្គាល់ថា សកម្មភាពរបស់កូរ៉េខាងជើងបាននិងកំពុងនាំឱ្យមានការបង្កើនការចំណាយលើវិស័យការពារជាតិនៅក្នុងបណ្តាប្រទេសជុំវិញតំបន់ រួមទាំងប្រទេសជប៉ុន និងការដាក់ពង្រាយយន្តហោះចម្បាំង និងនាវារបស់សហរដ្ឋអាមេរិកបន្ថែម
ទៀត។
នៅពេលសួរថាតើកូរ៉េខាងត្បូង និងសម្ពន្ធមិត្តរបស់ខ្លួន រួមមាន អាមេរិក និងជប៉ុន នឹងធ្វើអ្វី ប្រសិនបើកូរ៉េខាងជើងសាកល្បងអាវុធនុយក្លេអ៊ែរថ្មីរបស់ខ្លួន លោក យូន ស៊ុកយុល បាននិយាយថា ការឆ្លើយតបនឹងជាអ្វីដែលមិនធ្លាប់មានពីមុនមក ប៉ុន្តែលោកបដិសេធមិនបញ្ជាក់លម្អិតពីសកម្មភាពឆ្លើយតបឡើយ។
លោកបានប្រាប់ Reuters ថា៖ «ជាការឆោតល្ងង់បំផុតសម្រាប់កូរ៉េខាងជើង ក្នុងការសាកល្បងអាវុធនុយក្លេអ៊ែរលើកទីប្រាំពីរ»។
ការសាកល្បងអាវុធរបស់កូរ៉េខាងជើង កើតឡើងស្របពេលមានកិច្ចប្រជុំមេដឹកនាំពិភពលោកមួយចំនួនក្នុងខែវិច្ឆិកានេះ រួមទាំងកិច្ចប្រជុំបណ្តាប្រទេសសេដ្ឋកិច្ចឈានមុខ G20 នៅកោះបាលី ដែលលោក យូន ស៊ុកយុល បានជំរុញឱ្យប្រធានាធិបតីចិន លោក ស៊ី ជីនពីង (Xi Jinping) ខិតខំទប់ស្កាត់ការសាកល្បងនុយក្លេអ៊ែរ និងមីស៊ីលរបស់កូរ៉េខាងជើង។
ទោះយ៉ាងណា លោក ស៊ី ជីនពីង បានជំរុញឱ្យទីក្រុងសេអ៊ូល ធ្វើឱ្យប្រសើរឡើងនូវទំនាក់ទំនងជាមួយទីក្រុងព្យុងយ៉ាង។
ថ្មីៗនេះ លោក គីម ជុងអ៊ុន បាននិយាយថា កូរ៉េខាងជើងនឹងពង្រឹងកងកម្លាំងនុយក្លេអ៊ែររបស់ខ្លួនឱ្យខ្លាំងជាងគេនៅលើពិភពលោក ខណៈលោកបានស្ងើចសរសើរមន្ត្រីយោធារាប់សិបនាក់ដែលបានចូលរួមក្នុងការបាញ់សាកល្បងម៉ីស៊ីលផ្លោងអន្តរទ្វីប (ICBM) ឈ្មោះ Hwasong-17 បានជោគជ័យ កាលពីថ្ងៃទី១៨ ខែវិច្ឆិកា ឆ្នាំ២០២២៕
