សម្ពន្ធមិត្តអង្គការណាតូ (NATO) បានសន្យាផ្ដល់ជំនួយសព្វាវុធបន្ថែមទៀតសម្រាប់ទីក្រុងកៀវ (Kyiv) និងឧបករណ៍ដើម្បីជួយស្ដារថាមពល និងកម្ដៅឡើងវិញ ដែលត្រូវបានបំផ្លាញដោយការវាយប្រហាររបស់រុស្ស៊ី ខណៈប្រធានាធិបតីអ៊ុយក្រែន លោក វ៉ូឡូឌីមៀ ហ្សេលេនស្គី (Volodymyr Zelenskiy) បាននិយាយថា កងកម្លាំងរបស់ទីក្រុងម៉ូស្គូបាននិងកំពុងព្យាយាមរុលទៅមុខនៅក្នុងតំបន់ជាច្រើន។ នេះបើយោងតាមការចេញផ្សាយរបស់ទីភ្នាក់ងារសារព័ត៌មាន Reuters នៅថ្ងៃទី៣០ ខែវិច្ឆិកា ឆ្នាំ២០២២។
ប្រជាជនអ៊ុយក្រែន នៅថ្ងៃអង្គារម្សិលមិញនេះ បានភៀសខ្លួនទៅច្រកនៅតាមលេនដ្ឋាន បន្ទាប់ពីបានឮស៊ីរ៉ែនព្រមានពីការវាយប្រហារតាមអាកាសរបស់រុស្ស៊ី។ នៅតំបន់ដូណេតស៍ (Donetsk) ភាគខាងកើត កងកម្លាំងរុស្ស៊ីបានវាយប្រហារដោយកាំភ្លើងធំ កាំភ្លើងត្បាល់ និងរថក្រោះ។
លោក Zelenskiy បាននិយាយថា យោធារុស្ស៊ីក៏បាននិងកំពុងវាយប្រហារនៅតំបន់លូហាន់ស៍ (Luhansk) នៅភាគខាងកើត និងតំបន់ខាកៀវ (Kharkiv) នៅភាគឦសាន ជាតំបន់ដែលអ៊ុយក្រែនដណ្តើមបានមកវិញកាលពីខែកញ្ញា។
លោក Zelenskiy បាននិយាយនៅក្នុងសុន្ទរកថាតាមវីដេអូថា៖ «ស្ថានភាពជួរមុខ គឺពិបាក»។
លោកបន្ថែមថា៖ «ទោះបីជាមានការខាតបង់យ៉ាងធំធេងក៏ដោយ អ្នកកាន់កាប់ [កងទ័ពរុស្ស៊ី] នៅតែព្យាយាមរុលទៅមុខ នៅក្នុងតំបន់ដូណេតស៍ [Donetsk], លូហាន់ស៍ [Luhansk] និងខាកៀវ [Kharkiv]។ ពួកគេកំពុងរៀបចំផែនការធ្វើអ្វីមួយនៅភាគខាងត្បូង»។
រដ្ឋមន្ត្រីការបរទេសមកពីសម្ពន្ធមិត្ត NATO រួមទាំងរដ្ឋមន្ត្រីការបរទេសអាមេរិក លោក អេនតូនី ប្លីនខេន (Antony Blinken) បានបើកកិច្ចប្រជុំរយៈពេលពីរថ្ងៃ នៅទីក្រុងប៊ូឆារ៉េស (Bucharest) កាលពីថ្ងៃអង្គារ ដោយស្វែងរកមធ្យោបាយដើម្បីការពារសុវត្ថិភាពប្រជាជនអ៊ុយក្រែន ដើម្បីរក្សាកម្តៅនៅអ៊ុយក្រែន និងដើម្បីទ្រទ្រង់យោធារបស់ទីក្រុងកៀវ (Kyiv) តាមរយៈយុទ្ធនាការរដូវរងារខាងមុខនេះ។
អគ្គលេខាធិការអង្គការណាតូ លោក ជេន ស្តូលថិនបឺក (Jens Stoltenberg) បាននិយាយថា ប្រធានាធិបតីរុស្ស៊ី លោក វ្ល៉ាឌីមៀ ពូទីន «កំពុងព្យាយាមប្រើរដូវរងារជាអាវុធនៃសង្គ្រាម»។
គួររម្លឹកថា រុស្ស៊ីបានបើកការឈ្លានពានទ្រង់ទ្រាយធំរបស់ខ្លួនមកលើអ៊ុយក្រែន តាមផ្លូវគោក ផ្លូវអាកាស និងសមុទ្រ កាលពីខែកុម្ភៈ ដែលបានបង្កឱ្យជនស៊ីវិលរាប់ពាន់នាក់បានស្លាប់បាត់បង់ជីវិត។ បន្ថែមពីនេះ តំបន់ទីក្រុងជាច្រើនប្រែក្លាយទៅជាគំនរបាក់បែក និងបង្កឱ្យមានជាវិបត្តិមនុស្សធម៌ធ្ងន់ធ្ងរកើតឡើង ខណៈមនុស្សរាប់លាននាក់ក៏បានភៀសខ្លួនចេញពីប្រទេសអ៊ុយក្រែនផងដែរ៕
